សម្តេចតេជោនាយករដ្ឋមន្រ្តី ហ៊ុន សែន និងគណៈប្រតិភូ បានអញ្ជើញវិលត្រឡប់មកកម្ពុជាវិញហើយ ក្រោយការបញ្ចប់ចូលរួមកិច្ចប្រជុំកំពូលឡានឆាង-មេគង្គលើកទី១… និងចូលរួមសន្និសីទប្រចាំឆ្នាំ ២០១៦ នៃវេទិកាបូអាវសំរាប់អាស៊ី ។
កិច្ចប្រជុំកំពូលឡានឆាង-មេគង្គលើកទី១ គឺជាប់ទាក់ទងនឹងកិច្ចសហប្រតិបត្តិការរវាងប្រទេសទាំង៦ ដែលស្ថិតតាមបណ្តោយទន្លេមេគង្គ… និងវេទិកាបូអាវសំរាប់អាស៊ី គឺជាវេទិកាសំខាន់បំផុតសំរាប់ទ្វីបអាស៊ី ក្នុងការពិភាក្សា និងផ្លាស់ប្តូរទស្សន: ក្នុងការដោះស្រាយបញ្ហាសេដ្ឋកិច្ច សង្គម… បរិស្ថាន និងបញ្ហាបន្ទាន់ផ្សេងៗទៀត ។
សម្តេចតេជោសែន ក្នុងការចូលរួមកិច្ចប្រជុំកំពូលទាំង២ ក្នុងប្រទេសចិន បានថ្លែងសុន្ទរកថា២ ដាច់ដោយឡែកពីគ្នាគឺៈ ទី១ សុន្ទរកថា «ការចែករំលែកទន្លេ… ការចែករំលែកអនាគត» និងសុន្ទរកថា មួយទៀតគឺ «អនាគតថ្មីរបស់អាស៊ី៖ កម្លាំងចលករថ្មី និងចក្ខុវិស័យថ្មី» ។
ឯកសារចំនួន៣ ត្រូវបានចុះហត្ថលេខាដោយមេដឹកនាំទាំង៦នៃប្រទេសតាម ដងទន្លេមេគង្គ គឺប្រទេសចិន មីយ៉ាន់ម៉ា ថៃ ឡាវ កម្ពុជា និងវៀតណាម ។ សម្តេចតេជោនាយករដ្ឋមន្ត្រី បានគាំទ្រចំពោះសេចក្តីថ្លែងការណ៍ និងសេចក្តីប្រកាសរួម ទីក្រុងសានយ៉ា ដែលមានគោលដៅចំនួន ២៦ចំណុច ក្នុងការពង្រឹង កិច្ចសហប្រតិបត្តិការ នៃប្រទេសមេគង្គ-ឡានឆាង ។ សម្តេចតេជោ បានគាំទ្រ ចំពោះ ការរៀបចំឲ្យមាន កិច្ចប្រជុំកំពូល មេគង្គ-ឡានឆាង ២ឆ្នាំម្តង ដែលកម្ពុជានឹងធ្វើជាម្ចាស់ផ្ទះ នៃកិច្ចប្រជុំ កំពូលមេគង្គ-ឡានឆាង នៅឆ្នាំ ២០១៨ ខាងមុខ ។
ក្នុងការឯកភាពក្នុងគម្រោងមេគង្គ ឡានឆាង នាយករដ្ឋមន្ត្រីចិន បានផ្តល់នូវទឹកប្រាក់ចំនួន ១០ពាន់លានយ័ន សម្រាប់ប្រើប្រាស់ ក្នុងកិច្ចសហប្រតិបត្តិការមេគង្គ ឡានឆាង និង ១០ពាន់លានដុល្លារ ផ្សេងទៀត ក្នុងនោះទឹកប្រាក់ ចំនួន ៥ពាន់លានដុល្លា សម្រាប់ការទិញទំនិញ និង ៥ពាន់លានដុល្លា ផ្សេងទៀត ជាមូលនិធិពិសេស សម្រាប់ប្រើប្រាស់ក្នុងក្របខណ្ឌ នៃប្រទេសមេគង្គ ឡានឆាង ។ ជាមួយគ្នានេះ ប្រទេសចិន បានសន្យាផ្តល់ថវិកា ២៥០លានដុល្លារ សម្រាប់ កិច្ចសហប្រតិបត្តិការប្រទេសត្បូង-ត្បូង ។ ប្រទេសចិន បានប្រកាស ផ្តល់អាហារូបករណ៍ ដល់និស្សិតនៃប្រទេសមេគង្គទាំង៥ ដែលមានចំនួន រហូតដល់ ១ម៉ឺន ៨ពាន់ អាហារូបករណ៍ និង ៥ពាន់អាហារូបករណ៍ផ្សេងទៀត សម្រាប់ការបណ្តុះ បណ្តាលធនធានមនុស្ស ។
ក្នុងដំណើរទស្សនកិច្ចក្នុងប្រទេសចិននោះផងដែរ សម្តេចតេជោសែន បានជួបពិភាក្សាទ្វេភាគីជាមួយនឹងឧបនាយករដ្ឋមន្ត្រីនៃសហព័ន្ធរុស្ស៊ី ឯកឧត្តម អាកាឌី វ្លាឌីមៀរ៉ូវីច្ឆ ដ្វូកូវិច និងជួបផ្សេងទៀតជាមួយ ឯកឧត្តម លី កឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន ផងដែរ ។ សម្តេចតេជោ និងឧបនាយករដ្ឋមន្ត្រីរុស្ស៊ី បានវាយតម្លៃខ្ពស់ ចំពោះក្រុមការងារនៃប្រទេសទាំងពីរកម្ពុជារុស្ស៊ី ដែលបានពិភាក្សាគ្នាយ៉ាងយកចិត្តទុកដាក់ លើការដោះស្រាយបញ្ហាបំណុលដែលកម្ពុជាជំពាក់ ពោល គឺធ្វើយ៉ាងណាឲ្យបំណុលកម្ពុជាពីអតីតកាល ត្រូវបានដោះស្រាយ ក្នុងពេលឆាប់ៗខាងមុខ តាមរយៈការប្រែក្លាយបំណុល មកជាការវិនិយោគ នៅក្នុង ប្រទេសកម្ពុជា ។ សម្តេចតេជោនាយករដ្ឋមន្ត្រី បញ្ជាក់ថា អ្វីដែលសម្តេច និងប្រជាជនកម្ពុជា ចង់បាននោះ គឺការខិតខំដោះស្រាយបំណុលទាំងអស់នោះ ឲ្យបានឆាប់បំផុត តាមដែលអាចធ្វើទៅបាន ។
ក្នុងជំនួបជាមួយនឹងនាយករដ្ឋមន្ត្រីចិន ឯកឧត្ដមនាយករដ្ឋមន្ត្រីចិន លី កឺឈាង បានថ្លែងថា ដោយសារតែ ជំនឿនិងកំរិតនយោបាយ នៃប្រទេសទាំងពីរកម្ពុជា ចិន កាន់តែមានសន្ទុះកើនឡើងខ្ពស់នោះ ចិននឹងពង្រីក កិច្ចសហប្រតិបត្តិការ ជាមួយប្រទេសកម្ពុជា ឲ្យកាន់តែរឹង មាំទ្វេឡើងថែមទៀត ពិសេសក្នុងក្របខណ្ឌ ដៃគូយុទ្ធសាស្ត្រគ្រប់ជ្រុងជ្រោយ ដែលប្រទេសទាំង២បានរួមគ្នាបង្កើតឡើង ។ នាយករដ្ឋមន្ត្រីចិន បានបញ្ជាក់ថា ភាគីចិននឹងបន្តជួយដល់គំរោងនានាដែលកម្ពុជា បានស្នើឡើង ពិសេសទៅទៀតនោះ រដ្ឋាភិបាលចិន នឹងលើកទឹកចិត្ត ឲ្យក្រុមហ៊ុនចិន មកបណ្ដាក់ទុនក្នុងប្រទេសកម្ពុជា ដែលក្នុងនេះដែរ នាយករដ្ឋមន្ត្រីចិន ក៏សុំស្នើភាគីកម្ពុជា ផ្តល់នូវកត្តាអំណោយផលដល់ក្រុមហ៊ុនចិនដែលបាន និងកំពុងបណ្តាក់ទុន ក្នុងប្រទេសកម្ពុជា ។
ឯកឧត្តម លីខឺឈាង បានមានប្រសាសន៍គាំទ្ររាល់គម្រោងរបស់កម្ពុជា ។ សម្តេចតេជោសែន បានមានប្រសាសន៍បញ្ជាក់ពីទំហំ ពាណិជ្ជកម្មទ្វេភាគីកម្ពុជា និងចិន ដែលបច្ចុប្បន្នមាន៤៣០០លានដុល្លារ និងសង្ឃឹមថាឆ្នាំ ២០១៧ នឹងកើនដល់ ៥០០០លានដុល្លារ ។
ពាក់ព័ន្ធនឹងការជួសជុលប្រាសាទព្រះវិហារឡើងវិញ ឯកឧត្ដមនាយករដ្ឋមន្ត្រីចិន មាន ប្រសាសន៍ថា ភាគីចិន សំដែងនូវសេចក្ដីរីករាយក្នុងការជួយដល់គម្រោង ជួសជុលឡើងវិញ នូវ ប្រាសាទព្រះវិហារ ពោល គឺជួយទាំងបច្ចេកទេស និងជួយទាំងហិរញ្ញវត្ថុដល់គម្រោងទាំងមូល៕