បន្ទាប់ពីតម្កល់ធ្វើបុណ្យទក្ខិណានុប្បទានឧទ្ទិសកុសលផលបុណ្យជូនវិញ្ញាណក្ខន្ធ នៅគេហដ្ឋានអស់រយៈពេលប្រមាណ៥ថ្ងៃ នៅព្រឹកថ្ងៃសុក្រ ទី៦ ខែកញ្ញា ឆ្នាំ២០២៤នេះ សពសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល បានរៀបចំពិធីបូជាហើយនៅវត្តជម្ពូវ័ន។
ពិធីបូជាសពត្រូវបានរៀបចំឡើងប្រកបដោយកិត្តិយសឧត្តុង្គឧត្តមបំផុតឱ្យស័ក្តិសមទៅវីរភាព និងស្នាដៃជាច្រើនដែលសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល បានខិតខំបំពេញអស់កម្លាំងកាយចិត្តក្នុងមួយជន្មាយុរបស់សម្តេច។ ពិធីបូជាសពត្រូវបានប្រព្រឹត្តទៅក្រោមទិដ្ឋភាពនៃក្តីសង្វេគក្រៀមក្រំស្តាយស្រណោះអាឡោះអាល័យជាពន់ពេកពីសំណាក់ក្រុមគ្រួសារសាច់សារលោហិត ក៏ដូចជាថ្នាក់ដឹកជាតិ និងឥស្សរជននយោបាយជាច្រើនរូប ដែលធ្លាប់មានអនុស្សាវរីយ៍ជាមួយគ្នាច្រើនរាប់មិនអស់ក្នុងបេសកកម្មបម្រើជាតិមាតុភូមិ។
ក្នុងពិធីបូជាសពទទួលបានការនិមន្តចូលរួមពីសម្តេចព្រះសង្ឃ ព្រះសង្ឃប្រមាណ៩៤អង្គ មានការអញ្ជើញចូលរួមពីសម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ព្រមទាំងសមាជិក សមាជិកាព្រឹទ្ធសភា រដ្ឋសភា សមាជិក សមាជិការាជរដ្ឋាភិបាល ឥស្សរជននយោបាយជាន់ខ្ពស់ជាច្រើនរូបទៀត។
ពិធីបូជាសពត្រូវបានប្រព្រឹទ្ធទៅបវេណីព្រះពុទ្ធសាសនា ដោយសម្តេចព្រះនាយកស្តីទី សម្តេចព្រះសង្ឃនាយករង សម្តេចព្រះសង្ឃ ព្រះសង្ឃ៩៤អង្គ ស្វាធ្យាយព្រះសត្តប្បករណាភិធម្ម (បង្សុកូល)។ បន្ទាប់មកពិធីដង្ហែប្រទក្សិណសពបីជុំមេរុ ជាឧត្តរាព័ត៌ដោយញាតិនៃសព។
បន្ទាប់ពីនោះ មានការអញ្ជើញគោរពវិញ្ញាណក្ខន្ធសពជាកិច្ចមច្ឆាមរណៈពីសំណាក់ភ្ញៀវកិត្តិយសជាតិ និងអន្តរជាតិ ដែលបានអញ្ជើញចូលរួមក្នុងពិធី និងការបូជាផ្កាខ្លឹមចន្ទន៍។
ក្រោយពេលគោរពវិញ្ញាណក្ខន្ធពីសំណាក់ភ្ញៀវកិត្តិយសហើយនោះ ឧកញ៉ាធម្មាមង្គលមុនី ថាយ វ៉ា គង់សំអុល និងកុលបុត្រ កុលធីតា អញ្ជើញសុំភ្លើងពីសម្តេចព្រះសង្ឃនាយកស្តីទី សម្តេចព្រះសង្ឃនាយករង រួចនាំភ្លើងនោះជូនសម្តេចតេជោ ហ៊ុន សែន ប្រមុខរដ្ឋស្តីទី។ សម្តេចតេជោ ក៏បានផ្តល់កិត្តិយសដ៏ខ្ពង់ខ្ពស់ជូនភ្លើងបូជាសពប្រកបដោយក្តីវិយោគក្រៀមក្រំស្តាយស្រណោះអាឡោះអាល័យជាពន់ពេកចំពោះការឃ្លាតឆ្ងាយលែងវិលត្រឡប់របស់សហការីដ៏ចំណានក្នុងកិច្ចការបម្រើជាតិអស់ជាទសវត្សរ៍។
សម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី អតីតរដ្ឋមន្ត្រីក្រសួងព្រះបរមរាជវាំង បានទទួលមរណភាព នៅព្រឹកថ្ងៃចន្ទ ១៤រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែកញ្ញា ឆ្នាំ២០២៤ នៅវេលាម៉ោង ៨៖៣៥នាទី ក្នុងជន្មាយុ៩៤ឆ្នាំ ដោយជរាពាធ។
មរណភាពរបស់សម្តេច គង់ សំអុល បាននាំមកនូវការស្តាយស្រណោះអាឡោះអាល័យជាពន់ពេកពីសំណាក់ថ្នាក់ដឹកនាំ និងមន្ត្រីរាជការគ្រប់ក្រសួងស្ថាប័នរបស់ជាតិ។
សម្ដេចចៅហ្វាវាំង វរវៀងជ័យ អធិបតីស្រឹង្គារ ដែលជាស្វាមី ឪពុក ជីតា ជីតាទួត និងជាគ្រូបាធ្យាយគំរូដ៏ប្រសើរមួយរូប ប្រកបដោយព្រហ្មវិហារធម៌ សង្គហធម៌ សេចក្តីស្មោះសរ និងអធ្យាស្រ័យខ្ពស់ ចំពោះក្រុមគ្រួសារ ដែលកន្លងមក សម្តេចតែងយកអស់កម្លាំងកាយ ចិត្ត ប្រាជ្ញា ស្មារតីខិតខំចិញ្ចឹមបីបាច់ថែរក្សា និង អប់រំទូន្មានប្រៀនប្រដៅបុត្រីធិតា និងចៅៗរហូតបានក្លាយជាបញ្ញវន្ត និងជាធនធានមនុស្សដ៏មានតម្លៃសម្រាប់សង្គមជាតិ។
ថ្នាក់ដឹកនាំជាតិ និងមន្ត្រីរាជការ បានចាត់ទុកមរណភាពសម្ដេចចៅហ្វាវាំង ជាការបាត់បង់នូវឥស្សរជន និងថ្នាក់ដឹកនាំគំរូដ៏ ឆ្នើមមួយរូប ប្រកបដោយបញ្ញាញាណ ឆន្ទៈ មនសិការជាតិ គតិបណ្ឌិត និងបទពិសោធន៍ខ្ពស់ ដែលក្នុងមួយជីវិត សម្តេច បានតស៊ូពុះពារគ្រប់ឧបសគ្គ ដើម្បីជាតិ និងប្រជាជន ពិសេសក្នុងការបម្រើ ជាតិ សាសនា ព្រះមហាក្សត ក្នុងគ្រប់កាលៈទេសៈ ជាពិសេសដង្ហែតាម អង្គព្រះមហាក្សត្រ និងហ្លួងម៉ែជាអម្ចាស់ជាទីគោរពសក្ការៈដ៏ខ្ពង់ខ្ពស់បំផុត ទទួលបានជោគជ័យជាច្រើនលើកិច្ចការជាតិ និងអន្តរជាតិដើម្បីជាប្រយោជន៍ដ៏ឧត្តុង្គឧត្តមសម្រាប់ជាតិ មាតុភូមិ និងប្រជាជនរហូតមក ព្រមទាំងបានចូលរួមចំណែកដ៏ធំធេង និងយ៉ាងសកម្មក្នុងកិច្ចការមនុស្សធម៌ តាមរយៈការបំពេញបេសកកម្មដ៏ឧត្តុង្គឧត្តមជាមួយសមាគមកាកបាទក្រហមកម្ពុជា៕
