ជីសរីរាង្គធម្មជាតិសុវណ្ណភូមិចំនួន១១តោន ដែលផលិតចេញពីសំណល់ក្នុងទីប្រជុំជនក្រុងពោធិ៍សាត់ របស់ក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក ត្រូវបានប្រគល់ជូនរដ្ឋបាលខេត្តពោធិ៍សាត់ ទុកចាត់ចែងបន្តដល់រដ្ឋបាលក្រុងស្រុក និងមន្ទីរពាក់ព័ន្ធ ដើម្បីបង្ហាញពីផលិតផល ក្នុងការចូលរួមចំណែកលើកកម្ពស់ការផលិតជីសរីរាង្គក្នុងស្រុក និងកាត់បន្ថយការនាំចូល ជីកសិកម្មពីក្រៅប្រទេស។
ពិធីប្រគល់-ទទួលជីខាងលើធ្វើឡើងនាថ្ងៃទី២៣ ខែកញ្ញា ឆ្នាំ២០២៤ នៅវេទិកាដោះស្រាយក្តីក្នុងសាលាខេត្ត ក្រោមវត្តមាន ឯកឧត្តម ខូយ រីដា អភិបាលខេត្តពោធិ៍សាត់ ឯកឧត្តមអភិបាលរងខេត្ត លោកនាយក នាយករងរដ្ឋបាលសាលាខេត្ត លោកអគ្គនាយកក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក និងសហការីមួយចំនួនទៀត។
បើតាមលោក ស៊ី ឡែន អគ្គនាយកក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក បានជម្រាបជូនថា ក្រុមហ៊ុន សេវ ឌឹ ឡាហ្វស៍ គឺជាក្រុមហ៊ុនផ្តល់សេវាសំអាត ប្រមូលដឹកជញ្ជូនទុកដាក់ និងកែច្នៃសំរាម សំណល់រឹងទីប្រជុំជន ស្របតាមយុទ្ធសាស្រ្តចក្រាវិស័យ បរិស្ថាន យុទ្ធសាស្ត្រស្នូល ភាពស្អាត បៃតង និងចីរភាព ក្នុងគោលដៅប្រែក្លាយសក្តានុពលវិស័យបរិស្ថានឱ្យទៅជាឧត្តមប្រយោជន៍ បម្រើជូនប្រជាជាតិកម្ពុជាគ្រប់ជំនាន់ និងលើកតម្កើងកិត្យានុភាពប្រទេសកម្ពុជាលើឆាកអន្តរជាតិ។
លោកអគ្គនាយកក្រុមហ៊ុនបានឱ្យដឹងថា ក្រុមហ៊ុនមានទស្សនវិស័យវែងឆ្ងាយ ដោយជំហានដំបូងយើងកែឆ្នៃឧត្តមប្រយោជន៍នៃសំរាមជាជីសរីរាង្គ និងបន្តផលិតជាសម្ភារៈប្រើប្រាស់ផ្សេងៗ ដូចជា គ្រាប់ផ្លាស្ទីក ធ្យូងអនាម័យ និងឥដ្ឋបរិស្ថានជាដើម។
លោកលើកឡើងថា សម្រាប់ជីសរីរាង្គធម្មជាតិសុវណ្ណភូមិរបស់ក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក មានអត្ថប្រយោជន៍ធំៗជាច្រើន៖ អាចប្រើប្រាស់បានលើដំណាំគ្រប់ប្រភេទ, បង្កើនទិន្នផលខ្ពស់, រក្សាគុណភាពដីបានយូរអង្វែង, ជួយបម្រែបម្រួលដីឱ្យមានជីវចម្រុះ, ផ្តល់សារធាតុចិញ្ចឹមឱ្យដំណាំ លូតលាស់ឆាប់រហ័ស, ជួយឱ្យដំណាំមានសុខភាពល្អ ពណ៌ ស្រស់ រសជាតិឆ្ងាញ់ និងមិនប៉ះពាល់ដល់សុខភាពទាំង អ្នកប្រើប្រាស់ និងអ្នកបរិភោគ។ បន្ថែមពីនោះ សារប្រយោជន៍ និងប្រសិទ្ធភាពនៃការប្រើប្រាស់ គឺជំនួយដល់ឫស ជំនួយដើម ស្លឹក មើម ផ្កា និងជំនួនដល់ផ្លែផងដែរ។
ឯកឧត្តមអភិបាល ខូយ រីដា បានថ្លែងអំណរគុណដល់ក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក និងសហការី ដែលបានជួយឧបត្ថម្ភនូវជីសរីរាង្គ យីហោ «ជីសរីរាង្គធម្មជាតិសុវណ្ណភូមិ» ចំនួន១១តោន ក្នុងនោះជូនដល់រដ្ឋបាលខេត្ត៨តោន និងមន្ទីរពាក់ព័ន្ធ៣តោន ក្នុងគោលបំណងសំខាន់គឺបង្ហាញពីផលិតផលកែឆ្នៃពីសំរាមផលិតចេញជាជាសរីរាង្គ ក្នុងការចូលរួមចំណែកលើកកម្ពស់ការផលិតជីសរីរាង្គក្នុងស្រុក និងកាត់បន្ថយការនាំចូលជីកសិកម្មពីក្រៅប្រទេស។
ឯកឧត្តមបានបន្តថា ពិតណាស់ផ្អែកតាមស្ថិតិពាណិជ្ជកម្មនាំចូល ក្នុងឆ្នាំ២០២៣ កម្ពុជាបាននាំចូលជីកសិកម្មពីបរទេស ជាពិសេសពីប្រទេសជិតខាង ក្នុងទំហំទឹកប្រាក់ជាង៣២៥លានដុល្លារអាមេរិក ដែលចំនួននេះ មានការកើនជាង១៧% បើធៀបនឹងឆ្នាំ២០២២ ដែលមានត្រឹមប្រមាណ២៧៦លានដុល្លារអាមេរិក។ ក្នុងនាមជាប្រទេស ដែលផ្អែកសំខាន់លើវិស័យកសិកម្ម ការនាំចូលជីកសិកម្មក្នុងចំនួនដ៏ច្រើននេះ ចាត់ទុកថាជាការខាតបង់សេដ្ឋកិច្ចមួយផ្នែក។ ជាដំណោះស្រាយ រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ដែលជាសេនាធិការបាននិងកំពុងជំរុញចលនាផលិតជីកសិកម្មនៅក្នុងស្រុកឱ្យបានច្រើន។ ជាក់ស្តែងដូចជាក្រុមហ៊ុន សេវ ឌឹ ឡាហ្វស៍ (ខេមបូឌា) ឯ.ក គឺចាត់ទុកថាជាក្រុមហ៊ុនឆ្នើមទី១ ដែលផ្តល់សេវាសម្អាត ប្រមូលដឹកជញ្ជូនទុកដាក់ និងកែច្នៃសំរាម សំណល់រឹងទីប្រជុំជនក្រុងពោធិ៍សាត់ឱ្យទៅជាឧត្តមប្រយោជន៍បម្រើជូនប្រជាជាតិកម្ពុជាគ្រប់ជំនាន់។
ឯកឧត្តមអភិខេត្តពោធិ៍សាត់បានអំពាវនាវដល់ប្រជាពលរដ្ឋសូមកុំចោលសំរាមតាមទីសាធារណៈ និងរៀបចំទុកដាក់សំរាមឱ្យបានល្អប្រសើរ ដើម្បីឱ្យក្រុមហ៊ុនមានលទ្ធភាពយកទៅកែច្នៃជាជី និងសម្ភារៈប្រើប្រាស់ផ្សេងៗ។ ជាមួយគ្នានោះ លោកប្តេជ្ញានឹងយកជីសរីរាង្គទាំងអស់នេះទៅសាកល្បងលើថ្លាលដាំដុះតាមបណ្តាក្រុង-ស្រុក ដើម្បីឱ្យដឹងជាក់ច្បាស់ពីគុណភាព ប្រសិទ្ធភាព និងអត្ថប្រយោជន៍នៃការកែឆ្នៃរបស់ក្រុមហ៊ុន៕
