សំណង់សិក្សាវិទ្យាល័យមួយ និងស្ពានបេតុងថ្មីប្រវែង ១៨០ម៉ែត្រ ក្នុងស្រុកក្រូចឆ្មារ ខេត្តត្បូងឃ្មុំ បានដាក់សម្ពោធឱ្យប្រើប្រាស់នៅព្រឹកថ្ងៃទី៣០ ខែមីនា ឆ្នាំ ២០១៦ ក្រោមអធិបតីភាព សម្តេចតេជោនាយករដ្ឋមន្រ្តី ហ៊ុន សែន និង សម្តេចកិត្តិព្រឹទ្ធបណ្ឌិត ។
សំណង់វិទ្យាល័យប៊ុនរ៉ានីហ៊ុនសែនអម្ពរវ័ន្តជំនីក គឺជាវិទ្យាល័យថ្មីមួយ ដែលស្ថិតក្នុងឃុំជំនីក មានកម្ពស់ ៣ជាន់… មាន ២៤បន្ទប់… មាន បន្ទប់ទឹក១៤ និងឃ្លាំងចំនួន៣ ។ ចំណែកស្ពានបេតុងព្រែកតាកុច គឹជាស្ពានស្ថិតក្នុងឃុំរកាខ្នុរ ស្រុកក្រូចឆ្មារ ។ សម្តេចតេជោសែន បានមានប្រសាសន៍ថា ទីតាំងអគារសិក្សានេះ គឺជាសាលាដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធ្លាប់បានសិក្សាកាលពីនៅវ័យក្មេង មុនសង្គ្រាមឆ្នាំ ១៩៧០ ។ បើរាប់ទាំងសំណង់សិក្សាថ្មីចុងក្រោយនេះមួយទៀត គឺសំណង់អគារសិក្សាដែលជាអំណោយរបស់ សម្តេចតេជោសែន និង សម្តេចកិត្តិព្រឹទ្ធបណ្ឌិត ក្នុងខេត្តត្បូងឃ្មុំនេះ សរុបមានចំនួន ២៩៧ខ្នង ស្មើនឹង ១៥៣០បន្ទប់ ហើយ ។ ចំណែកស្ពានព្រែកតាកុច មានប្រវែង ១៨០ម៉ែត្រ គឺជាស្ពានមួយដែលបានជួយសម្រួលគមនាគមន៍ដឹកជញ្ជូនរបស់កសិករច្រើនពាន់នាក់ រវាងឃុំជំនីក និងឃុំរកាខ្នុរ នាពេលនេះ ។
សម្តេចតេជោសែន បានថ្លែងសន្យាបង្កើនប្រាក់បៀរវត្សជូនគ្រូបង្រៀនក្នុងពិធីសម្ពោធនៅថ្ងៃនេះ ។ សម្តេចបានបញ្ជាក់ថា ការសន្យារបស់សម្តេច មិនមែនជាការសន្យាខ្យល់នោះទេ ។ ក្នុងពិធីសម្ពោធនោះផងដែរ សម្តេចតេជោសែន បានសម្រេចផ្តល់នូវផ្លូវលំជនបទក្នុងស្រុកត្បូងឃ្មុំ ដែលបានស្ថាបនា និងជួសជុលហើយ សរុប ២៤ខ្សែ មានប្រវែង ១៧០គីឡូម៉ែត្រ ថែមទៀត ក្នុងនោះរួមមានផ្លូវចាក់ក្រាលក្រួសក្រហមប្រវែង ៧៧គីឡូម៉ែត្រ… ផ្លូវក្រាលកៅស៊ូប្រវែង ៩១គីឡូម៉ែត្រ… ផ្លូវក្រាលបេតុងប្រវែង ២គីឡូម៉ែត្រ ។ ដោយឡែកខេត្តត្បូងឃ្មុំ គ្រោងបើកការដ្ឋាននៅដើមឆមាសទី២ ឆ្នាំ ២០១៦នេះ ក្នុងការស្ថាបនាផ្លូវ ២៩ខ្សែ ប្រវែង ៣៣៩គីឡូម៉ែត្រ ក្នុងនោះរួមមានផ្លូវក្រាលក្រួសក្រហម ១២០គីឡូម៉ែត្រ… ផ្លូវកៅស៊ូ ១៧៧គីឡូម៉ែត្រ និងផ្លូវបេតុងប្រវែង ៤២គីឡូម៉ែត្រ ផងដែរ ។
កម្ពុជាក្នុងសម័យតេជោសែន ត្រូវគេចាត់ទុកថាជាសម័យនាំប្រទេសរុងរឿង បំបាត់សង្គ្រាមស៊ីវិលក្នុងស្រុក… បំបាត់តំបន់អបគមន៍ និងបានប្រមូលក្រុមគណបក្សនយោបាយ ដែលឈ្លោះគ្នា ឱ្យស្ថិតក្រោមដំបូលរដ្ឋធម្មនុញ្ញតែមួយ… ក្រោយម្លប់ព្រះមហាក្សត្រតែមួយ និងក្រោមរាជរដ្ឋាភិបាលតែមួយ ។ ក្នុងសម័យតេជោសែននេះផងដែរ អគារស្កឹមស្កៃរាប់សិបជាន់ដែលកម្ពុជាក្នុងប្រវត្តិសាស្ត្រមិនធ្លាប់មាន បានកើតឡើងជាច្រើន… សំណង់ស្ពានអាកាស… ស្ពានឆ្លងកាត់ទន្លេមេគង្គ… ស្ពានឆ្លងកាត់ទន្លេបាសាក់… ទន្លេសាប… ទន្លេសេកុង… ទន្លេសេសាន ។ល។ បានបង្កើតឡើងជាមួយនឹងសមិទ្ធផលជាច្រើនទៀត ដែលកម្ពុជាក្នុងសម័យអតីតកាលមិនធ្លាប់មានសោះឡើយ ។
