ឯកឧត្ដម ចម ប្រសិទ្ធ អញ្ជើញជាអធិបតីក្នុងវេទិកាអប់រំផ្សព្វផ្សាយ ក្នុងការ អនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់


នៅព្រឹកថ្ងៃទី ០២ ខែ តុលា ឆ្នាំ ២០១៧ ឯកឧត្ដម ចម​ ប្រសិទ្ធ ទេសរដ្ឋមន្ត្រី
រដ្ឋមន្ត្រីក្រសួងឧស្សាហកម្ម និងសិប្បកម្ម ជាអនុប្រធានគណៈកម្មការទទួលបន្ទុកផ្សព្វផ្សាយអប់រំ នៃគណៈកម្មការចម្រុះប្រយុទ្ធប្រឆាំងគ្រឿងញៀន និងជាប្រធានគណៈ កម្មការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ក្នុងវិស័យឧស្សាហកម្ម និងសិប្បកម្ម បានអញ្ជើញជាអធិបតីក្នុងវេទិកាអប់រំផ្សព្វផ្សាយ ក្នុងការ អនុវត្តយុទ្ធនាការ​ប្រយុទ្ធ​ប្រឆាំងគ្រឿងញៀនខុសច្បាប់ នៅសាលប្រជុំសាលាខេត្តព្រះសីហនុ ដោយមានការចូលរួមពីអជ្ញាធរ និងមន្ទី-អង្គភាព ពាក់ព័ន្ធ ព្រមទាំងវិស័យឯកជនជាច្រើនរូបទៀត ។
មានប្រសាសន៍នាឱកាសនោះ ឯកឧត្តម ទេសរដ្ឋមន្ត្រី ចម ប្រសិទ្ធ បានបញ្ជាក់ថា៖នៅក្នុងនីតិកាលទី៥ នៃរដ្ឋសភានេះ រាជរដ្ឋាភិបាលកម្ពុជា បាននិងកំពុងបន្តខិតប្រឹងប្រែងរបស់ខ្លួនក្នុង​គោលដៅ​ពង្រឹង​​ថែមទៀតនូវ​កិច្ចការពារអធិបតេយ្យភាពជាតិ បូរណភាពទឹកដី ឯកភាពជាតិ និងឯកភាពទឹកដី សន្តិភាព ស្ថេរភាព​នយោបាយ សន្តិសុខ សណ្តាប់ធ្នាប់សាធារណៈ ការគោរពសិទ្ធិនិងសេចក្តីថ្លៃថ្នូររបស់មនុស្ស និង​ភាព​សុខុដុមក្នុង​សង្គម។ យើងដឹងហើយថា សត្រូវធំជាងគេ ក្នុងការអភិវឌ្ឍន៍ប្រទេស គឺ​គ្រឿងញៀន! ដែលជា​ហេតុ​កន្លងមក បច្ចុប្បន្នក៏ដូចជាទៅអនាគត រាជរដ្ឋាភិបាលកម្ពុជា បាននិងកំពុង​ខិតខំ​យកចិត្ត​ទុកដាក់ជាទី បំផុត ដែលគោលដៅអាទិភាពមួយក្នុងគោលដៅអាទិភាពជាច្រើន ដើម្បីសម្រេចបាននូវ​គោលនយោបាយខាងលើ គឺ ការទប់ស្កាត់ និងការបង្រ្កាបបទល្មើសគ្រប់ប្រភេទ ជាពិសេសការប្រឆាំងនឹងសកម្មភាព​ខុសច្បាប់ពាក់ព័ន្ធនឹងគ្រឿងញៀន រួមមាន៖ (១)ការកាត់បន្ថយតម្រូវការគ្រឿងញៀន (២)ការកាត់បន្ថយការផ្គត់ផ្គង់​គ្រឿងញៀន (៣)ការព្យាបាល ស្តារនីតិសម្បទា និងធ្វើសមាហរណកម្ម (៤)ការពង្រឹងសម្ថភាពអនុវត្តច្បាប់ (៥)កិច្ចសហប្រតិបត្តិការអន្តរជាតិ។
រាជរដ្ឋាភិបាលបានដាក់ឲ្យអនុវត្តវិធានការយុទ្ធសាស្រ្តមួយចំនួនដូចខាងក្រោម៖
‑ការអប់រំ ផ្សព្វផ្សាយ បង្ការទប់ស្កាត់ បដិសេធគ្រឿងញៀន
‑ការព្យាបាល ស្តារនីតិសម្បទា បណ្តុះបណ្តាលវិជ្ជាជីវៈ បំណិនជីវិត ការធ្វើសមាហរណកម្ម និងការចាកចេញពី​គ្រឿងញៀន
‑ការពង្រឹងប្រសិទ្ធភាពស្ថាប័នអនុវត្តច្បាប់
‑ការត្រួតពិនិត្យសារធាតុគីមីផ្សំ
‑ការបន្តកិច្ចសហប្រតិបត្តិការអន្តរជាតិជាមួយប្រទេសជាប់ព្រំដែន
‑ការបន្តកិច្ចសហប្រតិបត្តិការអន្តរជាតិជាមួយប្រទេសក្នុងតំបន់ និងដៃគូអភិវឌ្ឍនានា
‑ការពង្រឹងយន្តការត្រួតពិនិត្យគ្រឿងញៀននៅថ្នាក់ជាតិ និងក្រោមជាតិ។
កន្លងមក រាជរដ្ឋាភិបាលកម្ពុជាបានដាក់ចេញនូវផែនការ ស្តីពីយុទ្ធនាការប្រយុទ្ធប្រឆាំង​គ្រឿងញៀនខុសច្បាប់​លើកទី១​ រយៈពេល០៦ខែ បានចាប់ពីថ្ងៃទី០១ ខែមករា ដល់​ថ្ងៃ​ទី​៣០ ខែមិថុនា ឆ្នាំ២០១៧ ដែល បានចាត់តាំង​អនុវត្ត​យ៉ាង​សកម្ម​​ផុលផុស ដោយមានការចូល​រួម​យ៉ាង​សស្រាក់សស្រាំពីគ្រប់​ស្រទាប់​​ប្រជាពល​រដ្ឋ មន្រ្តីរាជការ និង​មហាជនក្នុងសង្គម ដែលបង្កើតបានជាចលនា​ជាតិ​​ក្នុងការ​ប្រយុទ្ធ​ប្រឆាំង​គ្រឿងញៀន ដោយទទួលបានលទ្ធផល​ល្អ​ប្រសើរ ព្រមទាំងមានការគាំទ្រ និងវាយតម្លៃជា​វិជ្ជមាន ពី​សំណាក់​សាធារណៈ​មតិ​ជាតិ‑អន្តរជាតិ ចំពោះស្មារតីទទួល​ខុសត្រូវខ្ពស់របស់រាជរដ្ឋាភិបាលលើជោគវាសនា​ប្រទេស​ជាតិ និង​ប្រជាពលរដ្ឋ។
ជាក់ស្តែង ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​បានលើកកម្ពស់ការយល់ដឹងរបស់ប្រជាពលរដ្ឋទូទៅមួយកម្រិតថែមទៀត ក្នុងការប្រយុទ្ធប្រឆាំង​គ្រឿងញៀន បានចាត់វិធានការរដ្ឋបាល ដើម្បីទប់ស្កាត់ការរីក​រាលដាលនៃការជួញដូរ ប្រើប្រាស់គ្រឿងញៀនខុសច្បាប់ ព្រមទាំងបានបង្កើន​ប្រសិទ្ធភាព​ក្នុងការព្យាបាល និងស្តារ នីតិសម្បទាអ្នកញៀនគ្រឿងញៀន ជាពិសេស​បាន​បើក​ប្រតិបត្តិការយ៉ាងក្តៅគគុក បង្រ្កាបការជួញដូរ និងប្រើប្រាស់គ្រឿងញៀន​ខុសច្បាប់។ ក្នុងនោះ បាន បង្រ្កាបចាប់ខ្លួន​មេក្លោងជួញដូរគ្រឿងញៀនធំៗចំនួន ១៣ករណី ដោយបានកាត់ផ្តាច់ខ្សែរយៈ​បណ្តាញ ធ្វើឲ្យចរន្តនៃការចរាចរ ជួញដូរ​គ្រឿងញៀនខុសច្បាប់ ថមថយសកម្មភាពគួរឲ្យកត់សម្គាល់។
លទ្ធផលខាងលើនេះ បានធ្វើឲ្យបទល្មើសព្រហ្មទណ្ឌមានការថយចុះ និងជះទ្ធិពលជា​វិជ្ជមានដល់បរិយាកាស​សន្តិសុខ សណ្តាប់ធ្នាប់សង្គម និងបានជួយកាត់បន្ថយ​ទុក្ខលំបាក និងក្តីបារម្ភរបស់ប្រជាពលរដ្ឋ រួមចំណែកដល់ការ​អនុវត្តន៍​កម្មវិធី​នយោបាយ និង យុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាល។
ក៏ប៉ុន្តែអាស្រ័យដោយនិន្នាការនៃការផលិត ការចរាចរ និងការជួញដូរគ្រឿងញៀន​ខុសច្បាប់នៅក្នុងតំបន់និង​លើ​​ពិភពលោក នៅតែមានកំណើន និងនៅតែបន្តជះ​ឥទ្ធិពល​ប្រកបដោយគ្រោះថ្នាក់នៅកម្ពុជា រាជរដ្ឋាភិបាលកម្ពុជា​ក៏សម្រេច​ដាក់​ចេញ​នូវផែនការ​យុទ្ធនាការ​ប្រឆាំងគ្រឿងញៀនខុសច្បាប់លើកទី២ រយៈពេល ០៦ខែ ដោយគិតចាប់ពី​ថ្ងៃទី០១ ខែកក្កដា រហូតដល់ថ្ងៃទី៣១ ខែធ្នូ ឆ្នាំ២០១៧ ដោយបន្តពង្រឹងយន្តការដែលមានស្រាប់ ក្នុងផែនការ​យុទ្ធនាការ​​​ប្រយុទ្ធ​​ប្រឆាំងគ្រឿងញៀនខុសច្បាប់លើកទី១ ដើម្បី​ប្រើប្រាស់ជាយន្តការសម្រាប់អនុវត្តផែនការ​យុទ្ធនាការ​​ប្រយុទ្ធ​ប្រឆាំង​គ្រឿងញៀនខុសច្បាប់លើកទី២​ ឲ្យកាន់តែមានប្រសិទ្ធភាពបន្ថែមទៀតដោយប្រមូលផ្តុំយក​ចិត្ត​ទុកដាក់​​លើការងារ​ចម្បងៗ ជាអាទិភាពដូចតទៅ៖
១) ត្រូវខិតខំធ្វើឲ្យប្រជាពលរដ្ឋទូទៅកាន់តែមានការយល់ដឹងថែមទៀត អំពីគ្រោះថ្នាក់ និងផល​អវិជ្ជមាន​ដែល​កើតចេញពីគ្រឿងញៀន សំដៅកាត់បន្ថយបទល្មើសគ្រឿងញៀន ការពារ​សុខមាលភាព​សង្គម ដោយត្រូវយកចិត្តទុក​ដាក់​ផ្តោតការអប់រំឲ្យចំគោលដៅ និងមុខសញ្ញាងាយ​រងគ្រោះ។
២) ជំរុញសកម្មភាពរៀបចំវេទិកាជួបជាមួយវិស័យឯកជន និងសប្បុរសជន ជាពិសេស ម្ចាស់ ឬអ្នកគ្រប់គ្រង អាជីវកម្មដែលងាយកើតមានបទល្មើសគ្រឿងញៀន និងសិល្បៈករ‑សិល្បៈការនី បណ្តាញព័ត៌មាន អ្នកដឹកនាំសាសនា ព្រមទាំងអង្គការ សង្គមស៊ីវិល ឲ្យបានគ្រប់រាជធានី‑ខេត្ត រហូតដល់មូលដ្ឋាន សំដៅប្រមូលផ្តុំឲ្យមានការចូលរួម សហការ​​គាំទ្រទាំងសកម្មភាព និងមូលនិធិ ក្នុងចលនាជាតិប្រយុទ្ធប្រឆំាងគ្រឿងញៀន។
៣) ពង្រឹងចំណាត់ការវិធានការរដ្ឋបាល និងការអនុវត្តវិធានការច្បាប់ឲ្យ​បានហ្មឺងម៉ាត់ ចំពោះ​គោលដៅដែល​ងាយ​បង្កឬកើតមានការជួញដូរ និងប្រើប្រាស់គ្រឿងញៀន តាមរយៈការជំរុញឲ្យ​មានការកំណត់ភូមិសាស្រ្ត និង​គោលដៅ​​អាទិភាពជាក់លាក់ ព្រមទាំងមានកម្មវិធីការងារសម្រាប់​កិច្ចការនេះច្បាស់លាស់ជាប្រចាំ។
៤) ជំរុញការរិះរកនីតិវិធីក្នុងការចាត់ចែងវត្ថុតាង និងទ្រព្យសម្បត្តិនានា ដែលត្រូវបានរឹបអូស និងបង្កក ពាក់ព័ន្ធ​នឹងបទល្មើសគ្រឿងញៀនឲ្យបានឆាប់រហ័សដើម្បីប្រសិទ្ធភាព ក្នុងសកម្មភាពប្រយុទ្ធប្រឆាំងគ្រឿងញៀន។
៥) ជំរុញការទប់ស្កាត់ និងបង្រ្កាបបទល្មើសគ្រឿងញៀន ជាពិសេសបន្តខិតខំទប់ស្កាត់ការនាំចូល​ពីក្រៅ​ប្រទេស និងស្រាវជ្រាវ បង្ក្រាបឲ្យបាននូវបណ្តាញខ្សែរយៈឧក្រិដ្ឋជនជួញដូរគ្រឿងញៀនធំៗ ព្រមជាមួយនឹងការ​យក​ចិត្តទុកដាក់ក្នុងការថែបំប៉ន និងលើកកម្ពស់សមត្ថភាពមន្ត្រីអនុវត្តច្បាប់ លើកកម្ពស់កិច្ចសហប្រតិបត្តិការ​អន្តរជាតិ សំដៅ​ធ្វើឲ្យប្រតិបត្តិការបង្រ្កាបគ្រឿងញៀនខុសច្បាប់ កាន់តែមានប្រសិទ្ធភាពខ្ពស់។
៦) ជំរុញឲ្យបានសម្រេច ការកសាងមជ្ឈមណ្ឌលស្តារនីតិសម្បទា និងបណ្តុះបណ្តាលវិជ្ជាជីវៈថ្នាក់​ជាតិ និង​មណ្ឌលបណ្តោះអាសន្នសម្រាប់ព្យាបាល និងស្តារ នីតិសម្បទាតាមរាជធានី‑ខេត្ត ដែលមានអំណោយផល ស្រប​ជាមួយ​​នឹងការ លើកកម្ពស់សមត្ថភាព គុណភាព និងពង្រីក​សេវា​ព្យាបាលដោយផ្អែកលើសហគមន៍។
ជាមូលដ្ឋានក្នុងការអនុវត្តការវិធានការទី២ ខាងលើ ក្រសួងឧស្សាហកម្ម និងសិប្បកម្ម បានរៀបចំវេទិកានេះ​ដើម្បីជួបជាមួយ​វិស័យឯកជន សំដៅប្រមូលផ្តុំឲ្យមានការចូលរួមសហការ​​គាំទ្រទាំងសកម្មភាព​ក្នុងចលនា​ជាតិ​ប្រយុទ្ធ​ប្រឆំាង​គ្រឿងញៀន និងពង្រឹងការ ស្វែងយល់បន្ថែមនិងផ្សព្វផ្សាយបន្ត ក្នុងការអនុវត្តយុទ្ធនាការ​ប្រយុទ្ធ​ប្រឆាំង​គ្រឿងញៀនខុសច្បាប់នេះ។ វាគ្មិនរបស់ក្រសួងឧស្សាហកម្ម និងសិប្បកម្ម នឹងជម្រាបជូន ឯកឧត្ដម លោកជំទាវ លោកឧកញ៉ា លោក លោកស្រី នាងកញ្ញា ​នៅពេលបន្តិចទៀតនេះ នូវប្រធានបទ ស្តីពីប្រភេទគ្រឿងញៀន បញ្ហាគ្រឿងញៀន និងសារសម្រាប់អប់រំនិងបង្ការគ្រឿងញៀន ក្នុងគោលបំណងរួមគ្នា​កាត់​បន្ថយ​ជា​បណ្តើរៗ ទប់ស្កាត់ និងឈានទៅរកការ​លុប​បំបាត់នូវរាល់ការផលិត ការចែកចាយ​លក់ឬ​ការចែកចាយ​ប្រើប្រាស់​នូវ​គ្រឿងញៀនខុសច្បាប់​ក្នុងវិស័យ​ឧស្សាហកម្ម និងសិប្បកម្ម។​
នៅក្នុងកំឡុងពេលនៃការធ្វើបទបង្ហាញរបស់វាគ្មិនទាំងអស់ ខ្ញុំសូមឯកឧត្ដម លោកជំទាវ លោកឧកញ៉ា លោក លោកស្រី នាងកញ្ញា ទាំងអស់ មេត្តាត្រងត្រាប់ស្តាប់ និងលើកជាសំណួរ ទៅលើបញ្ហា​ឬចំណុចទាំងឡាយណាដែលមាន​មន្ទិល​សង្ស័យ​ឬមិនច្បាស់លាស់ ក៏ដូចជាការចែករំលែកបទពិសោធន៍​គ្នាទៅវិញទៅមក​ដើម្បីមានមូលដ្ឋានគ្រប់គ្រាន់ ក្នុង ការ​ចូលរួមអនុវត្តយុទ្ធនាការប្រយុទ្ធប្រឆាំងគ្រឿងញៀន​ខុសច្បាប់លើកទី២ នៅពេល​ត្រឡប់ទៅមូលដ្ឋាន​រៀងៗខ្លួន​វិញ។​

ខ្ញុំជឿជាក់ថា ការផ្សព្វផ្សាយថ្ងៃនេះ គឺមានសារសំខាន់ណាស់ ប៉ុន្តែក៏មិនទាន់គ្រប់​គ្រាន់ដែរ ដូច្នេះ ខ្ញុំសង្ឃឹម​ជឿជាក់ថា មន្រ្តីនៃក្រសួងឧស្សាហកម្ម និងសិប្បកម្ម នឹងបន្តធ្វើ​ការផ្សព្វផ្សាយនេះបន្ថែមទៀតនាពេលខាងមុខ ជូន​ដល់សាធារណៈជនទូទៅ ។