សម្តេចតេជោនាយករដ្ឋមន្រ្តី ហ៊ុន សែន បានអំពាវនាវដល់ក្រុមយុវជន ត្រូវប្រឹងប្រែងសិក្សា និងដើរចៀសឱ្យផុតនូវអំពើអបាយមុខគ្រប់បែបយ៉ាង រួមទាំងគ្រឿងញៀនផងដែរ ។ ប្រសាសន៍អំពាវនាវបានធ្វើក្នុងទំព័រហ្វេសប៊ុក នៅថ្ងៃទី៣១ ខែមីនានេះ ក្នុងស្ថានការណ៍ដែលកម្ពុជាកំពុងមានសន្តិភាពពេញលេញ និងមិនមានសង្គ្រាមដូចពីអតីតកាលនោះទេ ។
យុវជនជាច្រើន ក្រោយរដ្ឋប្រហារថ្ងៃទី១៨ ខែមីនា ឆ្នាំ ១៩៧០ ដែលបានអូសកម្ពុជាឱ្យធ្លាក់ចូលក្នុងសង្គ្រាមស៊ីវិល មិនមានឱកាសដូចយុវជនក្នុងសម័យបច្ចុប្បន្ន សិក្សារៀនសូត្របានពេញលេញនោះទេ ។ ហ្វេសប៊ុកសម្តេចតេជោសែន បានសរសេរថា កាលពីជំនាន់សង្គ្រាមនោះ គឺយុវជនគ្មានឪកាសធ្វើអ្វីក្រៅពីការត្រៀមខ្លួនចូលធ្វើកងទ័ព ហើយអ្នកដែលមិនបានចូលធ្វើកងទ័ព ក៏រងប៉ះពាល់យ៉ាងខ្លាំងដោយសារសង្គ្រាមនោះផងដែរ ។ ប្រវត្តិសាស្ត្របានសរសេរថា សង្គ្រាមស៊ីវិលរយៈពេល ២៨ឆ្នាំ បានបញ្ចប់នៅចុងឆ្នាំ១៩៩៨… គឺនៅថ្ងៃទី៤ ខែធ្នូ ឆ្នាំ ១៩៩៨ ដែលមានការធ្វើសមាហរណកម្មចុងក្រោយបំផុត នៃកម្លាំងខ្មែរក្រហមក្នុងរាជរដ្ឋាភិបាល ។ ក្រោយសង្គ្រាមស៊ីវិល បានបញ្ចប់នោះហើយ ទើបយុវជនខ្មែរបានមានឱកាសសិក្សាពេញលេញ ។
ហ្វេសប៊ុករបស់ សម្តេចតេជោនាយករដ្ឋមន្រ្តី បានសរសេរអំពាវនាវថា សូមយុវជន យុវនារីកុំបណ្តោយឱ្យបាត់បង់ឪកាសល្អៗ… ត្រូវប្រឹងប្រែងសិក្សារៀនសូត្រ ហើយត្រូវចៀសឱ្យផុតពីអំពើអបាយមុខគ្រប់បែបយ៉ាង និងគ្រឿងញៀនគ្រប់ប្រភេទ ។
