រដ្ឋមន្ត្រីក្រសួងទេសចរណ៍កម្ពុជា អញ្ជើញទស្សនាផ្សារទេសចរណ៍ «ខ្មែរភូមិខ្មែរអ្នកធ្វើ» ជាផលិតផលទេសចរណ៍ដ៏ទាក់ទាញថ្មីមួយដែលភ្ញៀវទេសចរជាតិ អន្តរជាតិ មិនគួរមើលរំលង

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងភរិយា នៅថ្ងៃទី១៩ ខែតុលា ឆ្នាំ២០២៥នេះ បានអញ្ជើញទស្សនា «ភូមិខ្មែរអ្នកធ្វើ» ផ្សារទេសចរណ៍ខ្មែរ ដែលជាផ្សារទេសចរណ៍ខ្មែរ បង្កើតឡើងក្នុងគោលបំណងជួយជំរុញសក្ដានុពលទេសចរណ៍ដ៏សម្បូរបែប និងការអភិវឌ្ឍផលិតផលទេសចរណ៍ រួមជាមួយការប្រមូលផ្ដុំផលិតផលក្នុងស្រុក សុទ្ធសឹងតែស្នាដៃរបស់ពលរដ្ឋខ្មែរនៅតាមមូលដ្ឋាន ដូចជាបន្លែ ផ្លែឈើ សម្ភារៈប្រើប្រាស់ វត្ថអនុស្សាវរីយ៍ ម្ហូបអាហារប្រចាំតំបន់ សេវាកម្មផ្សេងៗ នឹងមកប្រមូលផ្ដុំនៅក្នុងផ្សារទំនើប ជីប ម៉ុង ២៧១ មេហ្កាម៉ល។

នាឱកាសនេះ មានការអញ្ជើញទទួលបដិសណ្ឋារកិច្ចយ៉ាងកក់ក្តៅពី លោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុននិងលោកស្រី, អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន និងលោកស្រី, អ្នកឧកញ៉ា លាង ហួង (ហេនរី) អគ្គនាយកពហុពាណិជ្ជកម្មក្រុមហ៊ុនជីបម៉ុង និងលោកស្រី ព្រមទាំងអ្នកឧកញ៉ា ឧកញ៉ា និងលោកស្រីសហស្ថាបនិកក្រុមហ៊ុន ជីប ម៉ុង គ្រុប និងបណ្តាអគ្គនាយកក្រុមហ៊ុន ជីប ម៉ុង គ្រុបផងដែរ។

បើតាមក្រសួងទេសចរណ៍, ដើម្បីបង្ហាញពីភាពទាក់ទាញ និងបង្កើនការចាប់អារម្មណ៍ គម្រោង «ភូមិខ្មែរអ្នកធ្វើ» ឱ្យកាន់តែទូលំទូលាយ សូមអញ្ជើញបងប្អូនក្រុមអ្នកផលិតមាតិកាទេសចរណ៍កម្ពុជា(Influencers) KOL ទាំងអស់ចូលរួមផ្សព្វផ្សាយ ផ្សារទេសចរណ៍ខ្មែរ «ភូមិខ្មែរអ្នកធ្វើ» ទៅកាន់សាធារណជន ភ្ញៀវទេសចរជាតិ-អន្តរជាតិ ចូលរួមឱ្យកាន់តែច្រើន។

សូមជម្រាបថា «ភូមិខ្មែរអ្នកធ្វើ» មិនត្រឹមតែជាផ្សារលក់ផលិតផល ប៉ុន្តែក៏រួមបញ្ចូលជាមួយនឹងស្ថាបត្យកម្ម ​រចនាបទខ្មែរ សិល្បៈ វប្បធម៌ ប្រពៃណីដែលជាអត្តសញ្ញាណជាតិខ្មែរ៕