ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងជាប្រធានកិត្តិយសក្រុមការងារសកម្មភាពជនពិការក្រសួងទេសចរណ៍ នៅថ្ងៃទី២៣ ខែតុលា ឆ្នាំ២០២៥ បានអញ្ជើញជាអធិបតី ក្នុងពិធីបើកសិក្ខាសាលាផ្សព្វផ្សាយផែនការយុទ្ធសាស្រ្តជាតិស្តីពីពិការភាព ឆ្នាំ២០២៤-២០២៨ នាទីការក្រសួងទេសចរណ៍។
ពិធីបើកសិក្ខាសាលានាព្រឹកនេះ មានការអញ្ជើញចូលរួមពី លោក ម៉េត មករា រដ្ឋលេខាធិការក្រសួងសង្គមកិច្ច អតីតយុទ្ធជននិងយុវនីតិសម្បទា និងជាអនុប្រធានទី១ ក្រុមប្រឹក្សាសកម្មភាពជនពិការ, លោកស្រី ហ៊ុន ដានី រដ្ឋលេខាធិការ និងជាប្រធានក្រុមការងារសកម្មភាពជនពិការ ក្រសួងទេសចរណ៍, លោក លោកស្រី ថ្នាក់ដឹកនាំក្រសួងទេសចរណ៍, ឧកញ៉ា លោក លោកស្រី សមាគមទេសចរណ៍ សមាគមតន្ត្រីសំនៀងជនពិការ និងវិស័យឯកជន, និងលោក លោកស្រី អ៊ំ ពូ មីង បងប្អូនជនមានពិការភាព និងអង្គសិក្ខាសាលាទាំងអស់ប្រមាណ ២៦០រូប។
ថ្លែងក្នុងឱកាសនៃអង្គសិក្ខាសាលា រដ្ឋមន្រ្តី ហួត ហាក់ បានជម្រាបជូនថា ការយកចិត្តទុកដាក់លើការធ្វើឱ្យប្រសើរឡើងនូវគុណភាពជីវិត របស់ប្រជាជន ជាពិសេសជនមានពិការភាព គឺជាការងារមួយដ៏មានសារៈសំខាន់ និងតែងតែទទួលបានការយកចិត្តទុកដាក់ខ្ពស់ ពីប្រមុខរាជរដ្ឋាភិបាល ចាប់តាំងពីការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា តាមរយៈការដាក់ចេញផែនការយុទ្ធសាស្ត្រជាតិស្តីពីពិការភាព ចំនួន ២ ដំណាក់កាល ពោលគឺ ដំណាក់កាលទី១ ឆ្នាំ២០១៤-២០១៨, និងដំណាក់កាលទី២ ឆ្នាំ ២០១៩-២០២៣។
ចំណែកនៅដំណាក់កាលទី៣, ការរៀបចំដាក់ឱ្យអនុវត្តផែនការយុទ្ធសាស្ត្រជាតិស្តីពីពិការភាពឆ្នាំ ២០២៤-២០២៨ គឺជាការបន្តកម្មវិធីកែទម្រង់ ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ នៅក្នុងនីតិកាលទី៧ នៃរដ្ឋសភា ក្រោមការដឹកនាំពោរពេញដោយសមត្ថភាព ថាមពល និងបញ្ញាញាណដ៏ឆ្នើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ ដើម្បីធានាថា ជនមានពិការភាពគ្រប់វ័យ និងគ្រប់ប្រភេទទាំងអស់ រស់នៅប្រកបដោយគុណភាព ក្នុងគ្រប់ទិដ្ឋភាពទាំងអស់នៃជីវិត ព្រមទាំងអាចចូលរួមដោយស្មើភាព ក្នុងសង្គមមួយប្រកបដោយបរិយាបន្ន ដែលគោរពសិទ្ធិ សេចក្តីថ្លៃថ្នូរ និងភាពចម្រុះ។
ជាមួយគ្នានេះ រដ្ឋមន្រ្តី ហួត ហាក់ ក៏បានគូសរំលេចថា ក្រសួងទេសចរណ៍ បានចូលរួមគាំទ្រ និងអនុវត្តការងារលើកកម្ពស់សិទ្ធិជនមានពិការភាព ដោយបង្កើតបរិស្ថានអំណោយផល និងឱកាសឱ្យពួកគេបានចូលរួមយ៉ាងពេញលេញក្នុងការអនុវត្តសិទ្ធិ និងករណីយកិច្ច ព្រមទាំងទទួលបានផលពីកិច្ចអភិវឌ្ឍវិស័យទេសចរណ៍ប្រកបដោយសមភាព និងសមធម៌ តាមរយៈការលើកកម្ពស់កិច្ចគាំពារ ការគាំទ្រ ការផ្តល់សេវាកម្ម និងឱកាសសមស្រប ដល់ជនមានពិការភាពនៅក្នុងវិស័យទេសចរណ៍ រាប់ទាំងការគិតគូរពី ផាសុកវត្ថុសម្រាប់បងប្អូនជនពិការ នៅតាមមណ្ឌលកម្សាន្ត អាជីវកម្មទេសចរណ៍ និងសេវាកម្មទេសចរណ៍ ថែមទៀតផងដែរ៕
