ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មការជាតិពិគ្រោះយោបល់គោលនយោបាយចំពោះគ្រួសារ ថ្លែងថា ទិវាអន្តរជាតិស្តីពីគ្រួសារ ១៥ឧសភា ជាទិវាមួយដែលប្រទេសនានាលើពិភពលោក តែងប្រារព្ធធ្វើឡើងជារៀងរាល់ឆ្នាំ ដោយឡែកសម្រាប់ប្រទេសកម្ពុជា រាជរដ្ឋាភិបាលបានកំណត់យកថ្ងៃទី១៥ ឧសភា ជាទិវាអន្តរជាតិស្តីពីគ្រួសារ ដើម្បីបង្ហាញពីការយកចិត្តទុកដាក់របស់រាជរដ្ឋាភិបាល ក្នុងការទទួលទិវាអន្តរជាតិស្តីពីគ្រួសារ ១៥ ឧសភា ឆ្នាំ២០២៦។
ឯកឧត្តមបន្តថា ទិវាអន្ដរជាតិស្តីពីគ្រួសារ រៀបចំឡើងដើម្បីស្គាល់គុណតម្លៃរបស់គ្រួសារជាកោសិកាសង្គម ដ៏មានសារៈសំខាន់ក្នុងការអប់រំសីលធម៌សមាជិកគ្រួសារ ដើម្បីក្លាយខ្លួនទៅជាប្រជាពលរដ្ឋល្អនៅក្នុងសង្គមជាតិ។
ការលើកឡើងរបស់ឯកឧត្តមរដ្ឋមន្រ្តីបានធ្វើឡើងនៅក្នុងពិធីប្រារព្ធទិវាអន្ដរជាតិស្តីពីគ្រួសារ ១៥ ឧសភា ឆ្នាំ ២០២៥ ក្រោមប្រធានបទ «ការវិនិយោគភាពធន់សេដ្ឋកិច្ចគ្រួសារ នាំឱ្យសង្គមជាតិរីកចម្រើន និងមានសុខសន្តិភាព» នាទីស្តីការក្រសួងសង្គមកិច្ច នៅថ្ងៃទី២៥ ខែឧសភា ឆ្នាំ២០២៦។
ឯកឧត្តម ជា សុមេធី បានបន្ថែមថា ទិវានេះ បានបង្កលក្ខណៈឱ្យយើងជួបជុំអបអរសាទរ ចែករំលែកបទពិសោធន៍ និងចំណេះដឹងព្រមទាំងផ្សព្វផ្សាយអំពីគុណតម្លៃនៃគ្រួសារ តាមរយៈខ្សែវីដេអូអប់រំខ្លីៗ ដើម្បីអប់រំទូន្មានដល់កូនចៅប្រុសស្រី ឱ្យក្លាយជាកូនល្អ សិស្សល្អ និងពលរដ្ឋល្អសម្រាប់គ្រួសារ សហគមន៍ និងសង្គមជាតិ។
ការរៀបចំទិវាអន្តរជាតិស្តីពីគ្រួសារឆ្នាំនេះ ក៏មិនខុសប្លែកពីឆ្នាំកន្លងទៅដែរ គឺក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំព្រឹត្តិការណ៍នេះ តាមរូបភាពមួយចំនួន រួមមាន៖
១៖ ផ្សព្វផ្សាយសារលិខិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្តីនព្រះរាជាណាចក្រកម្ពុជា ផ្ញើជូនជនរួមជាតិក្នុងឱកាសទិវាអន្តរជាតិស្តីពីគ្រួសារ ១៥ឧសភា
២៖ សារាចរណែនាំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា អំពីការចាត់តាំងរៀបចំទិវាអន្តរជាតិស្តីពីគ្រួសារ ១៥ឧសភា ឆ្នាំ២០២៦ សម្រាប់មន្ទីររាជធានី ខេត្ត និងអង្គភាពនានា
៣៖ រៀបចំផ្សព្វផ្សាយអំពីទិវាអន្តរជាតិស្តីពីគ្រួសារ ១៥ឧសភា តាមស្ថានីយ៍វិទ្យុ និងទូរទស្សន៍នានា រៀបចំពិធីសំណេះសំណាលជាមួយតំណាងគ្រួសារ ដែលបាននិងកំពុងប្រព្រឹត្តទៅនាពេលនេះនិងរៀបចំឲ្យមានពិធីសំណេះសំណាលជាច្រើនទៀតតាមសហគមន៍រាជធានី ខេត្ត ដើម្បីរំលឹកនូវតួនាទីដ៏មានសារៈសំខាន់ និងគុណតម្លៃរបស់គ្រួសារ និងធានាថាគ្រួសារនីមួយៗ ទទួលបានភាពសុខដុមរមនា និងភាពកក់ក្ដៅ។
ឯកឧត្តមបានបន្តថា រាជរដ្ឋាភិបាលបានខិតខំយកចិត្តទុកដាក់ និងចាត់វិធានការនានា ដើម្បីលើកកម្ពស់ជីវភាពរបស់ប្រជាពលរដ្ឋ និងសុខុមាលភាពរបស់គ្រួសារ ដើម្បីឱ្យគ្រួសារដើរតួនាទីយ៉ាងសំខាន់ក្នុងការរួមចំណែកអភិវឌ្ឍន៍ និងធ្វើសុខដុមនីយកម្មសង្គម ដោយបង្កើតឱ្យមានច្បាប់ គោលនយោបាយ និង់បទប្បញ្ញត្តិជាច្រើនពាក់ព័ន្ធនឹងការងារលើកកម្ពស់តម្លៃគ្រួសារ ព្រមទាំងបានដាក់ចេញនូវគោលដៅអភិវឌ្ឍន៍មួយចំនួន រួមមាន៖ ការលុបបំបាត់ភាពក្រីក្រ និងភាពអត់ឃ្លាន, ការសម្រេចបាននូវការអប់រំមូលដ្ឋានសម្រាប់ទាំងអស់គ្នា, បង្កើនការអប់រំសីលធម៌សង្គម តម្លៃស្ត្រី និងតម្លៃគ្រួសារ, បង្កើនការអប់រំបែបវិជ្ជមានដល់ឪពុកម្ដាយអាណាព្យាបាល ដើម្បីកាត់បន្ថយអំពើហិង្សាក្នុងគ្រួសារ, ការបង្កើនសុខុមាលភាពមាតា និងទារក និងការកាត់បន្ថយអត្រាមរណភាពកុមារ, ការប្រយុទ្ធប្រឆាំងនឹងមេរោគអេដស៍ ជំងឺអេដស៍ គ្រុនចាញ់ និងជំងឺផ្សេងៗទៀត ការរៀបចំបង្កើនភាពជាដៃគូសម្រាប់ការអភិវឌ្ឍគ្រួសារ តាមរយៈកម្មវិធីពង្រឹងភាពធន់សេដ្ឋកិច្ចគ្រួសារក្រីក្រ ងាយរងគ្រោះនិងរងគ្រោះបន្តសហការជាមួយអង្គការមិនមែនរដ្ឋាភិបាលជាតិ អន្តរជាតិ និងដៃគូអភិវឌ្ឍ ជួយដល់គ្រួសារក្រីក្រ ងាយរងគ្រោះនិងរងគ្រោះ ដូចជា ជនអនាថា ជនដែលត្រូវគេជួញដូរ ជនផ្ទុកមេរោគអេដស៍និងជំងឺអេដស៍ជាដើម ដោយផ្តល់សេវាថែទាំ គាំទ្រផ្នែកអប់រំ សុខាភិបាល ស្តារនីតិសម្បទា និង
សមាហរណកម្មទៅកាន់សហគមន៍វិញ៕
