លោកប៉ា សុជាតិវង្ស ប្តូរយុទ្ធសាស្ត្រក្នុងការអភិវឌ្ឍទីក្រុងភ្នំពេញ “ផ្តុំ៣_ផ្តល់២_ផ្តើម១”


ភ្នំពេញ: ​ឯកឧត្តម ប៉ា សុជាតិ​វង្ស អភិបាល​រាជធានី​ភ្នំពេញ បានប្រកាស​ផ្លាស់ប្តូរ នូវ​យុទ្ធសាស្ត្រ​ក្នុងការ​អភិវឌ្ឍ​ទីក្រុង​ភ្នំពេញ ក្នុង​អាណត្តិ​របស់លោក ដោយបាន​ប្តូរ​ពី ផ្តុំ​៣_​ផ្តាច់​២_​ផ្តើម​១ ត្រូវ​ប្តូរ​ទៅជា “​ផ្តុំ​៣_​ផ្តល់​២_​ផ្តើម​១” វិញ​។​
ឯកឧត្តម ប៉ា សុជាតិ​វង្ស បាន​ប្រសាសន៍ថា ពិតជា​មាន​មោទនភាព​ជាមួយនឹង​ក្រុមការងារ​ទាំងអស់ ដែល​ខិតខំ​ប្រឹងប្រែង​ផ្តាច់​បាន​នូវ​បញ្ហា​បុរី​កីឡា និង​បញ្ហា​បឹងកក់ ប្រកបដោយ​ភាពជោគជ័យ​។ ជាមួយគ្នានេះ លោក​អភិបាល សូម​ប្តូរ​ពាក្យ​ផ្តាច់​២ ទៅជា​ផ្តល់​២ វិញ​ម្តង គឺ​ផ្តល់​សេវា​ឱ្យបាន​កាន់តែ​ល្អ និង​ផ្តល់​ដំណោះស្រាយ​នូវ​រាល់​សំណូមពរ​ទាំងឡាយ របស់​បងប្អូន​ប្រជាពលរដ្ឋ​។​
​ដើម្បី​សម្រេចបាន​នូវ​គោលការណ៍​ខាងលើ កាលពី​ព្រឹក​ថ្ងៃទី​២១​ខែមេសា​ឆ្នាំ​២០១៦​នេះ រដ្ឋបាល​រាជធានី​ភ្នំពេញ បានរៀបចំ​កិច្ចប្រជុំ​បន្ទាន់​មួយ ផ្តោតលើ​កិច្ចការ​សំខាន់ៗ ៤ ចំណុច​ដូចខាងក្រោម​៖
១-​រៀបចំ​ផ្លាស់ប្តូរ និង​ដាក់​ដំឡើង​ភ្លើងស្តុប​ស្វ័យប្រវត្តិ​ថ្មី​ចំនួន ១០០​ទីតាំង​បន្ថែម នៅក្នុង​ភូមិសាស្ត្រ​រាជធានី​ភ្នំពេញ​យើង ដើម្បី​កាត់បន្ថយ​នូវ​បញ្ហា​កកស្ទះ​ចរាចរណ៍ ហើយ​កិច្ចការ​នេះ យើង​នឹង​សម្រេច​ឱ្យបាន​ទាំងស្រុង នា​ខែមីនា ឆ្នាំ​២០១៧​។ ជាពិសេស ត្រូវ​សិក្សា​ជាបន្ទាន់​នូវ​ការកែប្រែ​រង្វង់​មូល​៣ ឱ្យទៅជា​ភ្លើងស្តុប​វិញ ដូចជា​រង្វង់​មូល​ទួលគោក រង្វង់​មូល​ចោមចៅ និង​រង្វង់​មូល​កាំ​កូ​ស៊ី​ធី​។​
២-​កំណត់ និង​ដាក់​កម្លាំង​នៅតាម​គោលដៅ​កកស្ទះ​ចរាចរណ៍​សំខាន់ៗ​ក្នុង​រាជធានី​ ភ្នំពេញ ដើម្បី​ជួយ​សម្រួល​ចរាចរ​ជូន​ប្រជាពលរដ្ឋ តាម​ការសិក្សា​មាន​ចំនួន ១៨២​គោលដៅ​សំខាន់ៗ​។​
៣-​កែសម្រួល និង​កំណត់​ទាំង​ពេលវេលា និង​យន្ត​ការផ្តល់​សេវាសាធារណៈ​លើ​សេវា​សុរិយោដី និង​សំណង់ ឱ្យបាន​កាន់តែ​ប្រសើរឡើង និង​ច្បាស់លាស់​។​
៤-​ការងារ​ថែទាំ​ប្រព័ន្ធ​ ហេដ្ឋារចនាសម្ព័ន្ធ​ទាំង​ការជួសជុល​គ្រលុក​សំបុកមាន់ ការជួសជុល​រ៉ឺ​ហ្គ័​រ និង​ការថែរក្សា​លូ​ជាដើម ត្រូវ​ផ្តល់​ការទទួលខុសត្រូវ​ដល់​មូលដ្ឋាន​ខណ្ឌ​នីមួយៗ​តែម្តង​។ កិច្ចការ​ទាំងនេះហើយ ដែលជា​ម៉ែត្រ​សម្រាប់​វាស់​សមត្ថភាព​របស់​ខ​ណ្ឌ​នីមួយៗ ថា​តើន​រណា​ធ្វើ ឬ​មិន​ធ្វើ​?
​រដ្ឋបាល​រាជធានី​ភ្នំពេញ សង្ឃឹម និង​ជឿជាក់​លើ​ក្រុមការងារ​ទាំងអស់ ត្រូវខិតខំ​បម្រើ​ប្រជាពលរដ្ឋ ឱ្យបាន​ល្អ ហើយ​រដ្ឋបាល​រាជធានី​ភ្នំពេញ ក៏​សូម​ទទួល​នូវ​រាល់​ការ​សំណូមពរ​នានា របស់​បងប្អូន​ប្រជាពលរដ្ឋ​ផងដែរ ដើម្បី​ភាព​សុ​ខុ​ដុម​នីយកម្ម​ទាំងអស់គ្នា​។​
ឯកឧត្តម អភិបាល​បាន​បន្ថែមថា អាជ្ញាធរ​ខណ្ឌ​ទាំង ១២ ត្រូវ​បង្កើន​ការយកចិត្តទុកដាក់​ការងារ ដើម្បី​ធ្វើ​ឲ្យ​មានការ​ប្រែប្រួល​អំពី​ផែនការ​សកម្មភាព​ប្រចាំថ្ងៃ​។ ផែនការ​យុទ្ធសាស្ត្រ ផ្តុំ​៣_​ផ្តាច់​២_​ផ្តើម​១ គឺ​ផ្តុំ​៣ កំពុងតែ​ដំណើរការ​លើ​ការផ្តល់សេវា​ច្រកចេញចូល​តែមួយ​នៃ​កំណែ​ទម្រ​ង​ វិមជ្ឈការ និង​វិសហមជ្ឈការ និង​ផ្តាច់​២ ជា​បាតុភាព​ដែល​នៅ​សេសសល់​ក្នុង​ប្លុក​បុរី​កីឡា​និង​បឹងកក់ កំពុងស្ថិត​ក្នុងស្ថានភាព​បន្តិចបន្តួច​ដែល​គ្រោង​នឹង​បញ្ចប់​នៅពេល​ខាងមុខ​ ។ បញ្ហា​បុរី​កីឡា ត្រូវបាន​លោក​អភិបាល​រាជធានី បានប្រគល់​ភារកិច្ច​ដ៏​រ៉ាំរ៉ៃ​នេះ​ជូន​លោក​អភិបាលខណ្ឌ ដើម្បី​ធ្វើ​របង​ខ័​ណ្ឌ សហគមន៍​បុរី​កីឡា​ទៅនឹង​ដីឯកជន​របស់​ក្រុមហ៊ុន​ផាន​អ៊ី​ម៉ិច​។ លោក​អភិបាលខណ្ឌ ត្រូវ​ចាប់ផ្តើម​ជាបន្ទាន់ ដោយ​យក​ឯកសារ​ដែល​ពាក់ព័ន្ធ ហើយ​ទៅធ្វើ​របង​ខ័​ណ្ឌ ហើយ​បង្កើត​ឲ្យ​មាន​ស្ថានភាព​គ្រប់គ្រង​អគារ​ទាំង​៨​របស់​បុរី​កីឡា​ឲ្យ​បាន រួមទាំង​ការលក់ដូរ​ដោយ​លុប​កិច្ចសន្យា​លក់ដូរ ឬ​ត្រូវ​រក្សាទុក​នៅត្រឹម​ហ្នឹង ត្រូវធ្វើ​ឲ្យ​ដាច់ស្រេច កុំ​ទុក​ឲ្យ​នៅ​តទៅទៀត​។ ចំណែកឯ​អ្នក​ដែល​នៅ​សេសសល់ រួមទាំង​អ្នកមាន​វិញ្ញាបនបត្រ អ្នកមាន​ផ្ទះ អ្នក​តវ៉ា​ទាំងឡាយ ត្រូវ​ទាញយក​មក​ដោះស្រាយ​បញ្ចប់​ទាំងអស់ ហើយ​បញ្ហា​ដែល​ក្តៅ​នោះ​ត្រូវ​បានបញ្ចប់​ជិត​អស់ហើយ នៅសល់តែ​តិចតួច​ប៉ុណ្ណោះ​។
ឯកឧត្តម​បានលើកឡើង​អំពី​បញ្ហា​បឹងកក់ ដែល​មកដល់​ពេល​នៅ​សេសសល់​តិចតួច​ប៉ុណ្ណោះ ហើយ​អ្នក​មួយចំនួន​បានទទួល​យក​ដី​អស់ហើយ នៅសល់តែ​កែសម្រួល​របង​ជាមួយ​វិហារ​ឥស្លាម ចំណែក​ពលរដ្ឋ​នៅ​ប្រមាណ​៦​គ្រួសារ​ទៀត​នឹង​គ្រោង​បញ្ចប់​នៅពេល​ខាងមុខ​។ ចំណែក​បញ្ហា​ធំ​គឺ​ផ្តុំ​បី ដែល​ពាក់ព័ន្ធ​បញ្ហា​សណ្តាប់ធ្នាប់​សាធារណៈ ចរាចរណ៍ ការដឹកជញ្ជូន ហេដ្ឋារចនាសម្ព័ន្ធ សំរាម ប្រព័ន្ធ​លូ​ប្រឡាយ ការថែទាំង​ផ្លូវ​។ ចំណែក​យុទ្ធសាស្ត្រ​ថ្មី ផ្តល់​២ គឺ​ផ្តល់​សេវា​តម្រូវការ និង​សេវា​សំណូមពរ សម្រាប់​ជា​យុទ្ធសាស្ត្រ​ប្រចាំថ្ងៃ​របស់​អាជ្ញាធរ​រាជធានី ដែលជា​គោលការណ៍ ផែនការ​គ្រឹះ​តែមួយគត់​របស់​រាជរ​ដ្ឋា​ភិ​បាល​៕