សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា នៅថ្ងៃទី០៥ ខែតុលា ឆ្នាំ២០២៦នេះ បានផ្ញើសារលិខិតអបអរសាទរជូន លោកបណ្ឌិត សនសៃ ស៊ីផាន់ដន (Sonexay SIPHANDONE) ក្នុងឱកាសដែលលោក ត្រូវបានរដ្ឋសភាឡាវបោះឆ្នោតជ្រើសតាំងជា ប្រធានរដ្ឋសភានៃសាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី០៥ ខែតុលា ឆ្នាំ២០២៦។
តាមរយៈសារលិខិត, សម្តេចប្រធានរដ្ឋសភាកម្ពុជា បានគូសបញ្ជាក់ថា ចំណងមិត្តភាពដ៏យូរអង្វែង ភាពជាអ្នកជិតខាងល្អ មិត្តភាពប្រពៃណីពិសេស និងភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងកម្ពុជា និងឡាវ ត្រូវបានកសាង ពូនជ្រំ និងលើកកម្ពស់ជាបន្តបន្ទាប់ក្នុងរយៈពេលជាច្រើនទសវត្សរ៍កន្លងមកនេះ ដោយឈរលើមូលដ្ឋានគ្រឹះនៃគោលការណ៍គោរពគ្នា ការយោគយល់គ្នា ការជឿទុកចិត្តគ្នាទៅវិញទៅមក និងការបម្រើផលប្រយោជន៍រួម។
សម្តេចបានបង្ហាញនូវជំនឿជាក់យ៉ាងមុតមាំថា ចំណងមិត្តភាពដ៏ល្អប្រសើរដែលមានស្រាប់រវាងប្រទេសទាំងពីរ នឹងបន្តរីកចម្រើនលូតលាស់កាន់តែខ្លាំងក្លាបន្ថែមទៀត នាពេលអនាគត ដើម្បីជាឧត្តមប្រយោជន៍ទៅវិញទៅមក សម្រាប់ប្រជាជនទាំងសងខាង។ ជាមួយគ្នានេះ សម្តេចប្រធានរដ្ឋសភាកម្ពុជា ក៏បានបញ្ជាក់ពីការត្រៀមខ្លួនរួចជាស្រេច ក្នុងការធ្វើការងារយ៉ាងជិតស្និទ្ធជាមួយលោកបណ្ឌិត សនសៃ ស៊ីផាន់ដន ក្នុងការពង្រឹង និងពង្រីកបន្ថែមទៀតនូវកិច្ចសហប្រតិបត្តិការអន្តរសភា ទាំងក្នុងក្របខណ្ឌទ្វេភាគី និងពហុភាគី សំដៅរួមចំណែកថែរក្សាសុខសន្តិភាព ស្ថិរភាព និងវិបុលភាពនៅក្នុងតំបន់ ព្រមទាំងការកសាងស្ថាបត្យកម្មតំបន់ដោយយកអាស៊ានជាស្នូល។
គួររំលឹកផងដែរថា លោកបណ្ឌិត សនសៃ ស៊ីផាន់ដន គឺជាឥស្សរជនជាន់ខ្ពស់ និងជាអ្នកនយោបាយដ៏លេចធ្លោមួយរូបរបស់ប្រទេសឡាវ ដែលធ្លាប់បានកាន់តំណែងសំខាន់ៗជាច្រើនក្នុងជួររដ្ឋាភិបាល ជាពិសេសគឺតំណែងជា នាយករដ្ឋមន្ត្រីឡាវ ចាប់តាំងពីខែធ្នូ ឆ្នាំ២០២២ រហូតដល់ដើមខែតុលា ឆ្នាំ២០២៦នេះ។
នៅក្នុងសម័យប្រជុំរដ្ឋសភាឡាវ នារដ្ឋធានីវៀងចន្ទន៍ អង្គសភាជាតិឡាវ បានបោះឆ្នោតជាឯកច្ឆន្ទជ្រើសតាំង លោកបណ្ឌិត សនសៃ ស៊ីផាន់ដន ឱ្យឡើងកាន់តំណែងជា ប្រធានរដ្ឋសភាឡាវថ្មី ជំនួស លោកបណ្ឌិត សាយសំផន ភូមវិហាន (Xaysomphone Phomvihane)។ ការផ្ទេរ និងរៀបចំក្បាលម៉ាស៊ីនដឹកនាំកំពូលនេះ ក៏បានសម្រេចជ្រើសតាំង លោក សាឡឺមសៃ គុំម៉ាស៊ីត (Saleumxay Kommasith) ឱ្យឡើងកាន់តំណែងជា នាយករដ្ឋមន្ត្រីថ្មីរបស់ប្រទេសឡាវផងដែរ។
កាលពីពេលបម្រើការងារជានាយករដ្ឋមន្ត្រីឡាវ លោកបណ្ឌិត សនសៃ ស៊ីផាន់ដន ធ្លាប់បានដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅកម្ពុជា និងបានជួបពិភាក្សាការងារយ៉ាងស៊ីជម្រៅជាមួយថ្នាក់ដឹកនាំកំពូលៗរបស់កម្ពុជា រួមមាន សម្តេចតេជោ ហ៊ុន សែន, សម្តេចធិបតី ហ៊ុន ម៉ាណែត និងសម្តេចរដ្ឋសភាធិការធិបតី ឃួន សុដារី ដោយបានរួមចំណែកយ៉ាងធំធេង ក្នុងការជំរុញកិច្ចសហប្រតិបត្តិការពាណិជ្ជកម្ម ការតភ្ជាប់ហេដ្ឋារចនាសម្ព័ន្ធ ថាមពល និងការផ្លាស់ប្តូររវាងប្រជាជននិងប្រជាជននៃប្រទេសទាំងពីរឱ្យកាន់តែស្អិតរមួត៕
