ភ្នំពេញ៖ ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា មហិច្ឆតាចង់ចងកម្មចងពៀរនៅបន្ត ដែលន័យនេះ សំដៅទៅដល់ អតីតមន្ត្រីគណបក្សសង្គ្រោះជាតិ (CNRP) ដែលកំពុងបន្តសកម្មភាព ស្វែងរកការអន្តរាគមន៍ពីសំណាក់បរទេស ក្នុងការទាមទារ ឲ្យដោះលែងអតីតមេបក្សប្រឆាំង លោក កឹម សុខា ។
ថ្លែងក្នុងបណ្តាញផ្ញើសារ តេឡេក្រាម នៅថ្ងៃទី២៦ ខែមករា ឆ្នាំ២០១៨នេះ ឯកឧត្តម សុខ ឥសាន បានលើកឡើងថា “ថ្មីៗនេះ ឮថាមានសមាជិព្រឹទ្ធសភា អាមេរិក ២-៣ នាក់បានលើកសំណើរ ឲ្យតំណាងអចិន្ត្រៃយ៍ប្រចាំ អសប(អង្គការសហប្រជាជាតិ) ឲ្យបន្តដាក់គំនាប មកលើរាជរដ្ឋាភិបាលកម្ពុជា ដោយចោទថាផ្តាច់ការ ធ្វើទុកបុកម្នេញ លើគណបក្សប្រឆាំង” ។
ឯកឧត្តម បន្តថា “ប៉ុន្តែ បញ្ហានេះ មិនមែនជារឿងថ្មីទេ ។ កន្លងទៅ កូនស្រីកឹម សុខា ក៏ធ្លាប់បានទៅជួបប្រជុំ រួមជាមួយប៉ា ងួនទៀង ជាមួយតំណាង សរអា (សហរដ្ឋអាមេរិក) អចិន្ត្រៃយ៍ អសប និង តំណាងអចិន្ត្រៃយ៍សហគមន៍អឺរ៉ុប ប្រចាំ អសប សុំឲ្យព្យួរអសនៈកម្ពុជានៅអសប ។ តែឥតប្រយោជន៍ រឿងនេះ ផ្ទុយទៅនឹងធម្មនុញ្ញអសប ដែលមិនឲ្យជ្រៀតជ្រែក ចូលកិច្ចការផ្ទៃក្នុង បណ្តាប្រទេសជាសមាជិកអសប” ។
ឯកឧត្តម បានលើកឡើងបន្ថែមថា “ដូច្នេះ ឥឡូវជារឿងដដែល មិនមានឥទ្ធិពលអ្វី ប៉ះពាល់ដល់ឯករាជ្យ អធិបតេយ្យ និង បូរណភាពទឹកដី កម្ពុជាឡើយ ។ រាជរដ្ឋាភិបាលកម្ពុជា ដឹកនាំដោយ សម្តេចតេជោ ហ៊ុន សែន ជានាយករដ្ឋមន្ត្រី នៅតែបន្តដឹកនាំប្រទេស ក្រោមដំបូលសន្តិភាព ស្ថេរភាពនយោបាយ និងសន្តិសុខ សុវត្ថិភាព នៃជីវភាពរស់នៅ របស់ប្រជាជនកម្ពុជា សម្បូរសប្បាយរុងរឿង ជានិច្ចនិរន្តតទៅ”៕
