រដ្ឋមន្ត្រីពាណិជ្ជកម្ម ផ្តល់ភ្លើងខៀវជូនទូរទស្សន៍ NiceTV ធ្វើការផ្សាយផ្ទាល់ ព្រឹត្តិការណ៍ពិព័រណ៍ចិន អាស៊ាន លើកទី១៥

នៅក្នុងជំនួប លោក ជេសុន លីស បានស្នើសុំកិច្ចសហការពីក្រសួងពាណិជ្ជកម្ម ដើម្បីធ្វើការផ្សាយផ្ទាល់ព្រឹត្តិការណ៍ ពិព័រណ៍ចិន អាស៊ាន លើកទី១៥ ដើម្បីចែករំលែកឲ្យបានទូលំទូលាយ អំពីសកម្មភាពទូទៅនៃពន្លាជាតិរបស់កម្ពុជា និងការចូលរួមរបស់ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នៅក្នុងកិច្ចប្រជុំផ្សេងៗសំដៅរួមចំណែកលើកស្ទួយកិត្តិនាមព្រះរាជាណាចក្រកម្ពុជា ដែលនឹងក្លាយជាប្រទេសកិត្តិយសក្នុងឆ្នាំនេះ។

លោក ជេសុន លីស បានជម្រាបជូន ឯកឧត្តមរដ្ឋមន្ត្រីថា ទូរទស្សន៍ NiceTV មានធនធានមនុស្ស និងបច្ចេកទេសគ្រប់គ្រាន់ ព្រមទាំងកិច្ចសហការល្អជាមួយទូរទស្សន៍មជ្ឈឹមចិន និងទូរទស្សន៍ខេត្តក្វាងស៊ី ដើម្បីផ្តិតយកទិដ្ឋភាពទាំងស្រុងនៃព្រឹត្តិការណ៍ពិព័រណ៍ សម្រាប់ផ្សព្វផ្សាយជូនទូរទស្សនិកជន នៅក្នុងប្រទេសកម្ពុជា។

ជាការឆ្លើយតប ឯកឧត្តម ប៉ាន សូរស័ក្តិ បានឯកភាពទៅនឹងសំណើសុំសហការរបស់ទូរទស្សន៍ NiceTV និងបានស្នើលោក ជេសុន លីស ធ្វើការបន្តជាមួយអគ្គនាយកដ្ឋានជំរុញពាណិជ្ជកម្ម ដែលជាសេនាធិការរបស់ក្រសួងពាណិជ្ជកម្ម មានភារកិច្ចទទួលខុសត្រូវរួម សម្រាប់ការរៀបចំព្រឹត្តិការណ៍ពិព័រណ៍ចិន អាស៊ាន លើកទី១៥។ លើសពីនេះ ឯកឧត្តមរដ្ឋមន្ត្រី បានស្នើលោក ជេសុន លីស ធ្វើការទំនាក់ទំនង និងជូនដំណឹងទៅខុទ្ទកាល័យសម្តេចតេជោ ដើម្បីទទួលបានព័ត៌មាន អំពីកម្មវិធីរបស់ប្រមុខរាជរដ្ឋាភិបាលកម្ពុជា។

គួររំលឹកដែរថា ទូរទស្សន៍ NiceTV ត្រូវបានបង្កើតឡើង តាមរយៈកិច្ចសហការរវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រុមហ៊ុន NICE Culture Investment Group ដែលមានទីស្នាក់ការកណ្តាលនៅក្នុងខេត្តក្វាងស៊ី ប្រទេសចិន។ បន្ទាប់ពីចំណាយពេលសាងសង់ និងរៀបចំយ៉ាងផ្ចិតផ្ចង់អស់រយៈពេលជាង ១ឆ្នាំ ទូរទស្សន៍នេះ បានដំណើរការផ្សាយជាផ្លូវការ ចាប់តាំងពីខែកញ្ញា ឆ្នាំ២០១៧ ដោយមានកម្មវិធីចម្រុះដូចជា ព័ត៌មាន វប្បធម៌ កីឡា និងសិល្បៈកម្សាន្ត ជាខេមរៈភាសា រយៈពេល ២៤ម៉ោង ក្នុង ១ថ្ងៃ៕