ការអនុវត្តច្បាប់ចរាចរណ៍ផ្លូវគោកថ្មី បានបន្តនៅថ្ងៃទី៤ ក្នុងរង្វង់ដែលការរិះគន់បានបន្តជុំវិញការអនុវត្តច្បាប់ ។
ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោកឧត្តមសេនីយ៍ឯក រុន រ័ត្នវាសនា បានមានប្រសាសន៍ក្នុងសន្និសីទកាសែតនាល្ងាចមិញថា ការផាកពិន័យនៅថ្ងៃនេះ មានជាង ៨ពាន់គ្រឿង ។ ការអនុវត្តច្បាប់ចរាចរណ៍ផ្លូវគោកថ្មី បានប្រព្រឹត្តិទៅក្នុងគោលបំណងកាត់បន្ថយជីវិតអ្នករងគ្រោះដោយសារចរាចរណ៍ ដែលមានចំនួនច្រើនសន្ធឹកពីមួយឆ្នាំ ទៅមួយឆ្នាំ… ប៉ុន្តែការអនុវត្តច្បាប់នេះ ទោះជាយ៉ាងណាក៏ដោយ នៅតែរងការរិះគន់ពីប្រជាពលរដ្ឋ ។ ប្រជាពលរដ្ឋវេលាចុងក្រោយនេះ បានថ្លែងថាគាត់បារម្ភជុំវិញការមិនមានប័ណ្ណសម្គាល់យានយន្ត ដែលអាចនាំអោយមានការផាកពិន័យ ។
ចំនួនមនុស្សរងគ្រោះដោយសារគ្រោះថ្នាក់ចរាចរណ៍ នាវេលាចុងក្រោយនេះ បានធ្លាក់ចុះបន្ទាប់ពីមានការពង្រឹងច្បាប់ ។ តួលេខនៅមុនការអនុវត្តច្បាប់នេះ គឺក្នុងមួយថ្ងៃៗមានមនុស្សស្លាប់ប្រមាណពី៦ ទៅ ៧នាក់ និងមនុស្សរងរបួសមានជាង ២០នាក់ ផងដែរ… ប៉ុន្តែចាប់ពីថ្ងៃអនុវត្តច្បាប់ទី១ មករា ឆ្នាំ ២០១៦ ចំនួនមនុស្សស្លាប់ និងរងរបួសត្រូវគេឃើញមានការប្រែប្រួលគួរអោយកត់សម្គាល់ ។ នៅថ្ងៃទី១ មករា ឆ្នាំ ២០១៦ មនុស្សស្លាប់ដោយសារចរាចរណ៍មានចំនួន ២នាក់ ប៉ុន្តែអ្នករងរបួសមានរហូតដល់ ៦៨នាក់ ក្នុងគ្រោះថ្នាក់កើតឡើង ៦លើក ទូទាំងប្រទេស ។
នៅថ្ងៃទី២ មករា មនុស្សស្លាប់ចំនួន ៥នាក់ និងរងរបួសចំនួន ៩នាក់ ក្នុងគ្រោះថ្នាក់ ៨លើក… នៅថ្ងៃទី៣ មករា មនុស្សស្លាប់ ២នាក់… រងរបួស ១៥នាក់ ក្នុងគ្រោះថ្នាក់ចំនួន ៩លើក… និងនៅថ្ងៃទី៤ មករានេះ មនុស្សស្លាប់ដោយសារគ្រោះថ្នាក់ចរាចរណ៍ មានចំនួន ៦នាក់ និងរងរបួស ៣៩នាក់ ។
