ឯកឧត្តម​ នាយឧត្តមសេនីយ៍​ កែ គឹមយ៉ាន​ ប្រាប់មន្រ្តីបក្សពីសាខាបក្សគ្រប់មន្ទីរអង្គភាពជុំវិញបក្សខេត្តបោះឆ្នោតគាំទ្រសម្តេចតេជោហ៊ុន​ សែន​ ជានាយករដ្ឋមន្រ្តីនៅអាណត្តិទី៦​ ទី៧​ និងអាណត្តិក្រោយៗទៀតនៅថ្ងៃទី២៩​ ខែកក្កដា​ ឆ្នាំ២០១៨


បន្ទាយមានជ័យ ៖ ថ្ងៃអង្គារ១២កើត ខែទុតិយាសាឍ ឆ្នាំច សំរឹទ្ធិស័ក ពស.២៥៦២ត្រូវនឹងថ្ងៃទី២៤​ ខែកក្កដា ឆ្នាំ២០១៨​ ​ឯកឧត្តម​ នាយឧត្តមសេនីយ៍​ កែ គឹមយ៉ាន​សមាជិកអចិន្ត្រៃយ៍​គណកម្មាធិការកណ្តាល អ្នកតំណាងរាស្រ្ត​ ប្រធានក្រុមការងារថ្នាក់កណ្តាលចុះជួយខេត្តបន្ទាយមានជ័យ​ អមដំណើរដោយក្រុមការងារថ្នាក់ជាតិ​ ខេត្ត​ ក្រុង​ ស្រុក​ និងមូលដ្ឋាន អញ្ជើញជាអធិបតីពិធីសំណេះសំណាលជាមួយមន្រ្តីបក្សពីសាខាបក្សគ្រប់មន្ទីរអង្គភាពជុំវិញបក្សខេត្តបន្ទាយមានជ័យ​ចំនួនជាង១៤០០នាក់ នៅមន្ទីរបក្សខេត្ត។

ក្នុងឱកាសនោះ​ ឯកឧត្តម នាយឧត្តមសេនីយ៍​ កែ​ គឹមយ៉ាន​ បានមានមតិសំណេះសំណាលនិងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់បក្សមាន​សម្ដេចអគ្គមហាសេនាបតីតេជោ ហ៊ុន សែន​ នាយករដ្ឋមន្រ្តី ប្រធានគណបក្ស​ សម្ដេចអគ្គមហាពញាចក្រីហេង សំរិន ប្រធានរដ្ឋសភា​ ប្រធានកិត្តិយសគណបក្ស។

ក្នុងឱកាសនោះដែរ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានបន្ថែមថា​ :គោលនយោបាយដើរលើផ្លូវត្រូវរបស់គណបក្សប្រជាជនកម្ពុជាដឹកនាំដោយសម្តេចតេជោហ៊ុនសែន​ ប្រទេសជាតិមានសុខសន្តិភាព​ និងការអភិវឌ្ឍ​ ប្រជាពលរដ្ឋរស់នៅយ៉ាងសុខសាន្តជាមួយនឹងការរីកចម្រើនរបស់ប្រទេសជាតិលើគ្រប់វិស័យ​ដែលផ្ទុយពីរបបអតីតកាលមានតែឈាមនិងទឹកភ្នែក​។

ជាមួយគ្នានេះ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានថ្លែងអំណរគុណនិងដឹងគុណដល់សមាជិក​ សមាជិកា​ទាំងអស់នៃមហាគ្រួសារគណបក្សប្រជាជនកម្ពុជាគ្រប់ជាន់ថ្នាក់ទាំងអស់ដែលបានបម្រើប្រជាពលរដ្ឋដោយស្មោះត្រង់​ និងសូមបន្តខិតខំផ្តល់សេវាសាធារណជូនប្រជាពលរដ្ឋ
ឲ្យបានល្អស្គាល់សុខទុក្ខរបស់ប្រជាពលរដ្ឋឲ្យបានច្រើន​អាចដោះស្រាយសភាពការទាន់ពេលវេលា និងច្បាស់លាស់ដើម្បីបម្រើផលប្រយោជន៍ប្រជាពលរដ្ឋ​ រួមសុខ រួមទុក្ខជាមួយប្រជាពលរដ្ឋគ្រប់ពេលវេលា។

ជាមួយគ្នានេះដែរ​ ឯកឧត្ត​ម​ នាយឧត្តមសេនីយ៍​ កែ​ គឹមយ៉ាន​ បានផ្តាំផ្ញើដល់សមាជិក​ សមាជិកា​ ទាំងអស់ត្រូវ​ត្រៀមឯកសារជូនក្រុមគ្រួសារឲ្យបានរួចរាល់និងអញ្ជើញទៅបោះឆ្នោតនៅថ្ងៃទី២៩​ ខែកក្កដា​ ឆ្នាំ២០១៨​ ខាងមុខ​ ដើម្បីបន្តសន្តិភាពនិងការអភិវឌ្ឍឆ្ពោះទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០​ និងគាំទ្រសម្តេចតេជោហ៊ុន​ សែន​ ជានាយករដ្ឋមន្រ្តីនៅអាណត្តិទី៦​ ទី៧​ និងអាណត្តិក្រោយៗទៀត។