ថ្ងៃពុធ ១១កើត ខែស្រាពណ៍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ២២ ខែសីហា ឆ្នាំ ២០១៨ នេះ ឯកឧត្តម ពេជ្រ វាសនា អគ្គនាយករងកិច្ចការរដ្ឋបាលក្រសួងធនធានទឺក និងឧតុនិយម បានដឹកនាំមន្ត្រីបច្ចេកទេសរបស់ក្រសួង ដោយសហការជាមួយមន្ទីរធនធានទឹក និងឧតុនិយមខេត្តពោធិ៍សាត់ ចុះពិនិត្យស្ថានភាពទឹកនៅតាមដៃស្ទឹងសំខាន់ៗរបស់ស្ទឹងពោធិ៍សាត់ ដូចជា ស្ទឹងព្រៃខ្លុង, ស្ទឹងអារ៉ៃ និងស្ទឹងធំ ព្រមទាំងបានចុះពិនិត្យស្ថានភាពទឹកនៅតាមទីតាំងសំខាន់ៗតាមបណ្តោយស្ទឹងពោធិ៍សាត់ ដូចជា ស្ថានីយវាស់ទឹកបាក់ត្រកួន, សំណង់ក្បាលហុងទឹកដំណាក់អំពិល, ស្ពានក្រុងពោធិ៍សាត់ និងសំណង់ក្បាលហុងទឹកចារឹក ។ ជាក់ស្តែង ស្ថានភាពទឹកស្ទឹងពោធិ៍សាត់ ពុំមានអ្វីគួរឲ្យបារម្ភឡើយ ដោយកម្រិតកំពស់ទឹកនៅ ៖
១-ស្ថានីយបាក់ត្រកួន ទឹកមានកំពស់ ១,៦៦ ម ( កម្ពស់ប្រកាសឲ្យប្រុងប្រយ័ត ៦ ម )។
២- ស្ថានីយវាស់ទឹកក្រុងពោធិ៍សាត់ ទឹកមានកំពស់ ២,៧០ ម ( កម្ពស់ប្រកាសឲ្យប្រុងប្រយ័ត្ន ៤.៩០ ម ) ។
ចំណែកការងារបង្កបង្កើនផលស្រូវវស្សា នៅទូូទាំងខេត្តពោធិ៍សាត់ សម្រេចបានប្រមាណ ១១៧ % ហើយ ។
ឯកឧត្តម ពេជ្រ វាសនា ក៏បានណែនាំដល់មន្ទីរធនធានទឹក និងឧតុនិយមខេត្ត ឲ្យបន្តយកចិត្តទុកដាក់ តាមដានស្ថានភាពទឹកភ្លៀង និងទឹកជំនន់ ចាប់ពីពេលនេះទៅរហូតដល់ចុងរដូវវស្សា ក្នុងគោលបំណងបញ្ចៀស និងមានវិធានការឲ្យបានទាន់ពេលវេលា ដើម្បីកាត់បន្ថយនូវគ្រោះមហន្តរាយបង្កឡើងដោយគ្រោះទឹកជំនន់ទៅលើដំណាំស្រូវ ក៏ដូចជាហេដ្ឋារចនាសម្ព័ន្ធសាធារណៈក្នុងខេត្ត ព្រមទាំងពិនិត្យលទ្ធភាពក្នុងការរក្សាទឹកទុកសម្រាប់ស្រូវចុងរដូវវស្សា និងស្រូវប្រាំងខាងមុខ ។
