សម្តេចតេជោនាយករដ្ឋមន្រ្តី ហ៊ុន សែន បានជួយដោះស្រាយបញ្ហាអទិភាពមួយចំនួនជូនប្រជាពលរដ្ឋទាក់ទងនឹងការអនុវត្តច្បាប់ចរាចរណ៍ផ្លូវគោកថ្មី និងសម្តេចអំពាវនាវសូមអោយប្រជាពលរដ្ឋអត់ធ្មត់ ក្នុងដំណាក់កាលសមត្ថកិច្ចចាប់ផ្តើម ពង្រឹងការអនុវត្តច្បាប់នេះ ។
ប្រសាសន៍អំពាវនាវរបស់សម្តេច បានធ្វើឡើងបន្ទាប់ពីការអនុវត្តតែប៉ុន្មានថ្ងៃកន្លង មកនេះ សមត្ថកិច្ចបានរកឃើញជនមានកំហុសក្នុងការបើកបរជាច្រើន… ហើយក្នុងចំណោមអ្នកប្រព្រឹត្តខុសទាំងនោះ សំណូមពរជាច្រើន ត្រូវគេឃើញបានសរសេរមកកាន់រាជរដ្ឋាភិបាល ទាំងការចោទប្រកាន់… ទាំងការរិះគន់ បែបស្ថាបនាផង និងចំណុចវាយប្រហារពាក្យសម្តីថែមទៀត ។ សម្តេចតេជោសែន បានមានប្រសាសន៍អំពាវប្រ ជាពលរដ្ឋសូមរក្សាការអត់ធ្មត់ក្នុងដំណាក់កាលដំបូងនេះ ។
នៅថ្ងៃនេះដែរ សម្តេចបានដោះស្រាយបញ្ហាអទិភាពមួយចំនួនផងដែរ ជូនប្រជាពលរដ្ឋទាក់ទងនឹងការអនុវត្តច្បាប់ចរាចរណ៍ផ្លូវគោកថ្មី ។
ដំណោះស្រាយជាអាទិភាពរួមមានៈ
១- រាជរដ្ឋាភិបាលបានអនុញ្ញាតិអោយម្ចាស់ឡានចង្កូតស្តាំដែលមានស្រាប់ ត្រូវចូលទៅបង់ពន្ឋធម្មតា ហើយមិនចាំបាច់កែចង្កូតឡើយ ប៉ុន្តែរដ្ឋាភិបាលហាមដាច់ខាត ការនាំចូលរថយន្តចង្កូតស្តាំចាប់ពីថ្ងៃនេះតទៅ ។
២- ចំពោះប័ណ្ណបើកបរម៉ូតូខ្នាតតូច ដែលពីមុនត្រូវបង់ថ្លៃ ៦ម៉ឺនសម្រាប់ការប្រឡង និង ១ម៉ឹន ៤ពាន់រៀល សម្រាប់ថ្លៃពិនិត្យសុខភាព គឺបានបញ្ចុះនាពេលនេះ មកនៅត្រឹម ២ម៉ឺន ៥ពាន់រៀល ដោយមិនចាំបាច់ប្រឡងយកប័ណ្ណបើកបរ និងពិនិត្យសុខភាពឡើយ ។ រីឯម៉ូតូខ្នាតធំគឺពីមុនថ្លៃ ៦ម៉ឺនរៀល តែពេលនេះចុះមកត្រឹម ៤ម៉ឺនរៀលវិញ ។ ចំពោះការប្តូរប័ណ្ណបើកបរ គឺពីមុនតម្លៃ ២ម៉ឺន ៥ពាន់រៀល ចុះមកនៅត្រឹម ២ម៉ឺនរៀលវិញ ។ ដោយឡែកចំពោះការបញ្ចុះតម្លៃលើប័ណ្ណបើកបររថយន្ត គឺក្រសួងពាក់ព័ន្ឋនឹងដោះស្រាយជាបន្តបន្ទាប់ថែមទៀត ។ នៅជាមួយគ្នានោះផងដែរ សាលារាជធានីបានប្រកាសការធ្វើប័ណ្ណយានយន្តម៉ូតូសាឡើងវិញក្រោយ ការកំណត់តម្លៃសាជាថ្មីរួចរាល់ ។
នៅក្នុងការដោះស្រាយចំពោះប្រជាពលរដ្ឋដែលរស់នៅតាមបណ្តោយផ្លូវជាតិលេខ៤ ទាក់ទងនឹងការបង់ថ្លៃផ្លូវនោះវិញ សម្តេចតេជោសែននៅព្រឹកមិញនេះ បានមានប្រសាសន៍ថា ការចេញចូលយានយន្តរបស់ប្រជាជនរស់នៅលើផ្លូវជាតិលេខ៤ ដែលតម្រូវបង់ថវិកានោះ គឺនឹងបញ្ឈប់ចាប់តាំងពីថ្ងៃទី៧ មករា ឆ្នាំ២០១៦ ទៅ ដោយនឹងមិនអោយមានការបង់តទៅទៀតឡើយ ។
