(ភ្នំពេញ)៖ កម្ពុជា នឹងធ្វើជាម្ចាស់ផ្ទះរៀបចំសន្និសីទថ្នាក់តំបន់ ស្តីពី ការប្រយុទ្ធប្រឆាំងឱសថក្លែងក្លាយ និងអន់គុណភាព ដោយមានការចូលរួមពីអ្នកជំនាញមកពីប្រទេសបារាំង ចិន ភូមា ថៃ ឡាវ វៀតណាម និងតំណាងជាន់ខ្ពស់របស់អង្គការសុខភាពពិភពលោក (World Health Organization-WHO) ជាដើម។ សន្និសីទថ្នាក់តំបន់នេះ នឹងធ្វើឡើង រយៈពេល ២ ថ្ងៃ នៅរាជធានីភ្នំពេញ នាថ្ងៃទី០៥-០៦ ខែវិច្ឆិកា ឆ្នាំ២០១៨។
សេចក្តីប្រកាសព័ត៌មានរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម បង្ហាញថា គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ( គ.ប.ផ.ក ) បានសហការជាមួយក្រសួងការបរទេស និងសហប្រតិបត្តិការអន្តរជាតិ ក្រសួងសុខាភិបាល និងវិទ្យាស្ថានស្រាវជ្រាវអន្តរជាតិ ប្រយុទ្ធប្រឆាំងឱសថក្លែងក្លាយ ( IRACM ) នៃសាធារណរដ្ឋបារាំង នឹងរៀបចំធ្វើសន្និសីទថ្នាក់តំបន់ ស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព” នាថ្ងៃទី០៥ ដល់ថ្ងៃទី០៦ ខែវិច្ឆិកា ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអថិបតីភាពក្នុងពិធីបើកសន្និសីទ នាព្រឹកថ្ងៃទី០៥ ខែវិច្ឆិកា ឆ្នាំ២០១៨ ហើយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទសន្និសី នារសៀលថ្ងៃទី០៦ ខែវិច្ឆិកា ឆ្នាំ២០១៨ នៅសណ្ឋាគារ សូហ្វីតែល ភ្នំពេញ ភូគីត្រា។
សេចក្តីប្រកាសដដែល លើកឡើងថា សន្និសីទនេះ មានការអញ្ជើញចូលរួមពីប្រតិភូ និងឥស្សរជនអន្តរជាតិនានា មកពីប្រទេសបារាំង ចិន ភូមា ថៃ ឡាវ វៀតណាម និងតំណាងជាន់ខ្ពស់របស់អង្គការសុខភាពពិភពលោក ស្ថាប័នស្រាវជ្រាវនានា ពាក់ព័ន្ធជាមួយវិស័យសុខាភិបាល និងផលិតផលសុខាភិបាល ក៏ដូចជា តំណាង UNITAID តំណាងនគរបាល INTERPOL ព្រមទាំងវត្តមានអស់លោកលោកស្រី មកពីក្រសួងស្ថាប័នរបស់រាជរដ្ឋាភិបាលកម្ពុជា និងវិស័យឯកជនពាក់ព័ន្ធ ចូលរួមសរុបប្រមាណ៤៥០នាក់៕
