សម្តេចនាយករដ្ឋមន្ត្រីហ៊ុន សែនបានថ្លែងថា សម្តេចនឹងអញ្ជើញ ចូលរួមពិធីឆ្លងឆ្នាំ នៅវេលាម៉ោង១២យប់ ថ្ងៃទី៣១ខែធ្នូឆ្នាំ២០១៨ ឈានចូលថ្ងៃទី០១ខែមករាឆ្នាំ២០១៩ នៅវិមានឈ្នះឈ្នះ។ សម្តេច ហ៊ុន សែនបានបញ្ជាក់បន្ថែម ពីការរៀបចំពិធីសម្ពោធវិមានឈ្នះឈ្នះថា តាមពិតវិមានឈ្នះឈ្នះ សម្ពោធតែមួយថ្ងៃប៉ុណ្ណោះ គឺនៅថ្ងៃទី២៩ខែធ្នូ ប៉ុន្តែគាប់ជួននឹងពេលចុងឆ្នាំ ទើបសម្រេចយកទីតាំងវិមានឈ្នះឈ្នះ រៀបចំកម្មវិធីកម្សាន្តសប្បាយនានា ២ថ្ងៃជាប់គ្នា គឺថ្ងៃទី៣០ដល់៣១ខែធ្នូ ដើម្បីចូលរួមអបអរពិធីឆ្លងឆ្នាំសកល។
ការថ្លែងរបស់សម្តេចហ៊ុន សែនធ្វើឡើងនៅក្នុងឱកាសជួបសំណេះសំណាល ជាមួយកម្មករ- កម្មការិនីប្រមាណ ១៥,៦០៦នាក់ មកពីរោងចក្រសហគ្រាសចំនួន២២ មកពីខេត្តកំពង់ស្ពឺ និងខេត្តកណ្តាល នៅព្រឹកថ្ងៃទី២៦ខែធ្នូឆ្នាំ២០១៨។ ជំនួបរវាងសម្តេចហ៊ុន សែន ជាមួយកម្មករ-កម្មការិនីថ្ងៃនេះ ក៏ជាជំនួប លើកចុងក្រោយ សម្រាប់ឆ្នាំ២០១៨នេះ៕
