ព្រឹកថ្ងៃព្រហស្បត្តិ៍ ៣កេីត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៧ ខែកុម្ភៈ ឆ្នាំ២០១៩ ឯកឧត្តម អឹង ហឿន ប្រធានក្រុមប្រឹក្សាខេត្តសៀមរាប និងលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំសាមញ្ញលេីកទី៥៧ របស់ក្រុមប្រឹក្សាខេត្តសៀមរាប អាណត្តិទី២ នៅសាលប្រជុំធំសាលាខេត្ត ដោយមានការចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត លោក ម៉ូត លីណា តំណាងអគ្គនាយកអាជ្ញាធរអប្សារា លោកនាយក នាយករងរដ្ឋបាលខេត្ត លោកនាយក នាកយករង ទីចាត់ការ អង្គភាព ចំណុះសាលាខេត្ត លោក លោកស្រី ប្រធាន អនុប្រធាន មន្ទីរ-អង្គភាព ជុំវិញខេត្ត កងកំលាំងប្រដាប់អាវុធខេត្ត លោកអភិបាលក្រុងសៀមរាប និងក្រុមការងារលេខាធិការដ្ឋានលេខាក្រុមប្រឹក្សា សរុបចំនួន ៦៩រូប។
កិច្ចប្រជុំនេះ ផ្តោតលេីរបៀបវារៈដូចខាងក្រោម ៖
១-ពិនិត្យ និងអនុម័តលេីសេចក្តីព្រាងកំណត់ហេតុកិច្ចប្រជុំសាមញ្ញលេីកទី៥៦ របស់ក្រុមប្រឹក្សាខេត្ត អាណត្តិទី២ កាលពីថ្ងៃទី១១ ខែ មករា ឆ្នាំ២០១៩។
២-ពិនិត្យ ពិភាក្សា និងអនុម័តលេីសេចក្តីព្រាងរបាយការណ៍ប្រចាំខែមករា ឆ្នាំ២០១៩ ស្តីពីការអនុវត្តការងាររបស់រដ្ឋបាលខេត្តសៀមរាប។
៣-ពិនិត្យ ពិភាក្សា និងផ្តល់យោល់លេីការរៀបចំសន្និបាត បូកសរុបលទ្ធផលអនុវត្តការងារប្រចាំឆ្នាំ២០១៨ និងលេីកទិសដៅការងារសម្រាប់អនុវត្តឆ្នាំ២០១៩ របស់រដ្ឋបាលខេត្តសៀមរាប។
៤-ពិនិត្យ ពិភាក្សា និងអនុម័តលេីសេចក្តីព្រាងរបាយការណ៍ស្តីពីលទ្ធផល នៃការរៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តសៀមរាប អាណត្តិទី២ ឆ្នាំ២០១៨។
កិច្ចប្រជុំនេះក៏បានពិភាក្សាលេីចំណុចមួយចំនួនដូចជា អំពីគម្រោងធ្វេីផ្លូវ របស់មន្ទីរអភិវឌ្ឍន៍ជនបទ អំពីរបបរាយការណ៍របាយការណ៍របស់មន្ទីរ អង្គភាព បញ្ហាការងារ ចរាចរណ៍ សណ្តាប់ធ្នាប់សាធារណៈ សំខាន់គំនូសសញ្ញាចរាចរណ៍នៅតាមដងផ្លូវ ភ្លេីងស្តុប ព្រមទាំងបញ្ហារថយន្តដឹកដី ដឹកខ្សាច់ ចូលក្នុងក្រុង និងការដ្ឋានសំណង់ រួមទាំងភាពអណាធិបតេយ្យតូបលក់ដូរនៅជុំវិញរបងមន្ទីរពេទ្យបង្អែកខេត្តសៀមរាប និងផ្សាររាត្រីនៅតំបន់អង្គរឃ្យុងយូរ។ ក្នុងនោះដែរ លោក ពិន ប្រាកដ ក៏បានគូសបញ្ជាក់ដែរថា បញ្ហាការរំលោភដី ចំណីផ្លូវនេះ អាជ្ញាធរខេត្ត បានមានចំណាត់ការ និងចាត់វិធានការដល់អាជ្ញាធរក្រុង ធ្វេីការអនុវត្តចំពោះសំណង់អាណាធិបតេយ្យ ដែលបានយកដីចំណីផ្លូវ និងដីរបស់រដ្ឋធ្វេីជាកម្មសិទ្ធិ ដែលធ្វេីអោយប៉ះពាល់ដល់ការធ្វេីចរាចរណ៍ និងសោភណ្ឌភាពក្រុងទៀតផង និងធ្វេីអោយប៉ះពាល់ដល់បរិស្ថាន ភ្ញៀវទេសចរជាតិ និងអន្តរជាតិ។
បន្ទាប់ពីអង្គប្រជុំធ្វេីការពិនិត្យ ពិភាក្សា ព្រមទាំងផ្តល់យោបល់ ក្នុងកិច្ចប្រជុំនេះរួចមក ឯកឧត្តម ប្រធានក្រុមប្រឹក្សាខេត្ត បានជម្រុញអោយថ្នាក់ដឹកនាំខេត្ត មន្ទីរ អង្គភាព ក្រុង ស្រុក សំដៅឆ្ពោះទៅរកមូលដ្ឋានបម្រេីប្រជាពលរដ្ឋអោយបានល្អបំផុត កែលម្អភាពអសកម្មនានា និងដោះស្រាយបញ្ហាប្រឈមដែលនៅសេសសល់ ហេីយត្រូវយកចិត្តទុកដាក់ខ្ពស់ចំពោះបញ្ហាការរំលោភយកដីចំណីផ្លូវ និងដីចិញ្ចេីមផ្លូវនៅក្នុងក្រុង និងបញ្ហាផ្សាររាត្រីតំបន់អង្គរឃ្យុងយូរ៕
