សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញទៅចូលរួមវេទិកាលើកទី២ នៃគំនិតផ្ដួចផ្ដើមខ្សែក្រវ៉ាត់ និងផ្លូវនៅចុងខែមេសាខាងមុខនេះ ហើយក្នុងដំណើរទស្សនកិច្ចនេះដែរ សម្ដេចនឹងជួបថ្នាក់ដឹកនាំកំពូលៗរបស់ចិន ដើម្បីចុះហត្ថលេខាលើគម្រោងវិនិយោគជាច្រើនផងដែរ។
យោងតាមកិច្ចប្រជុំជាមួយក្រុមការងាររបស់គណៈកម្មាធិការជាតិអភិវឌ្ឍន៍ និងកំណែទម្រង់ចិន រវាងក្រសួងរ៉ែ និងថាមពលកាលពីថ្ងៃទី ២៥ ខែមីនា ម្សិលមិញនេះ បានពិនិត្យពិភាក្សាលើកិច្ចសហប្រតិបត្តិការសមត្ថភាពផលិតរវាងកម្ពុជា និងចិនលើគម្រោងផែនការវិនិយោគដែលបានចុះហត្ថលេខាលើអនុស្សារណៈនៃការយោគយល់ កាលពីឆ្នាំ២០១៥ និង២០១៦ កន្លងមក រួមជាមួយកិច្ចពិភាក្សាលើសេចក្តីព្រាងគម្រោងផែនការវិនិយោគថ្មីៗដើម្បីចុះអនុស្សារណៈនៃការយោគយល់ថ្មីដែលគ្រោងនឹងចុះហត្ថលេខានៅទីក្រុងប៉េកាំងក្នុងដំណើរទស្សនកិច្ចផ្លូវការរបស់សម្តេចតេជោនាយករដ្ឋមន្ត្រី នាខែមេសាខាងមុខនេះ។
សម្តេចតេជោហ៊ុន សែន នាយករដ្ឋមន្រ្តីកាលពីថ្ងៃ ២០-២៣ មករា ២០១៩ កន្លងមកនេះ បានទៅបំពេញទស្សនកិច្ចផ្លូវការនៅប្រទេសចិនរយៈពេល៣ថ្ងៃ ជាលើកដំបូងសម្រាប់ឆ្នាំ ២០១៩។ នៅក្នុងដំណើរទស្សនកិច្ចនោះ មានការពិភាក្សាការងារជាមួយ លោកប្រធានាធិបតីចិន ស៊ី ជិនពីង និង លោកនាយករដ្ឋមន្ត្រីចិន លី ឃឺឈាង ដើម្បីពង្រឹងនូវចំណងមិត្តភាព និងកិច្ចសហប្រតិបត្តិការ ក្នុងនាមជាប្រទេសដៃគូយុទ្ឋសាស្រ្តគ្រប់ជ្រុងជ្រោយ និងវិនិយោគផ្សេងផងដែឬ។
សម្តេចតេជោ ហ៊ុនសែន បានចាត់ទុកមិត្តចិនមានទំនាក់ទំនងល្អដូចជាបងប្អូន និងបានជួយកម្ពុជាយ៉ាងច្រើនចាប់តាំងពីជំនាន់ សម្តេចតាមកទល់សព្វថ្ងៃនេះ និងបានជួយជ្រោមជ្រែងបានធ្វើកម្ពុជាឱ្យ រីកចម្រើនមកទល់សព្វថ្ងៃ៕