ក្រុមហ៊ុនដែលធ្វើការពាក់ព័ន្ឋនឹងការសាងសង់ របស់ប្រទេសកូរ៉េចំនួន ៨៣០ក្រុមហ៊ុន បានមកធ្វើការសិក្សាស្វែងយល់លម្អិត ពីឱកាសបណ្តាក់ទុនវិនិយោគនៅកម្ពុជា ខណៈដែលពេលបច្ចុប្បន្ននេះ វិស័យអចលនទ្រព្យកំពុងតែមានសន្ទុះលើការអភិវឌ្ឍយ៉ាងខ្លាំងក្លា។
តាមរយៈសមាគមអ្នកម៉ៅការសាងសង់អន្តរជាតិ របស់ប្រទេសកូរ៉េខាងត្បូង (ICAK) ដែលដឹកនាំដោយលោក Kang Se Ki ជាអនុប្រធានគ្រប់គ្រងទូទៅនៃសមាគមមួយនេះ បានចូលជួបសម្ដែងការគួរសម និងពិភាក្សាការងារជាមួយអ្នកតំណាងសមាគមអ្នកសាងសង់កម្ពុជា។
នៅក្នុងឱកាសស្វែងយល់បន្ថែមពីការទទួលបានឱកាសវិនិយោគ និងសហការជាដៃគួនៅកម្ពុជា លោក Kang Se Ki បានប្រាប់ឱ្យដឹងថា ក្រុមហ៊ុនជាច្រើនជាង៨០០ ដែលស្ថិតនៅក្នុងសមាគមសាងសង់អន្តរជាតិនៃប្រទេសកូរ៉េ បានបង្ហាញពីការចាប់អារម្មណ៍ក្នុងការចាប់ដៃជាគូវិនិយោគនៅកម្ពុជា។
លោកបានបន្តទៀតថា តាមរយៈសមាគមសាងសង់អន្តរជាតិនៃប្រទេសកូរ៉េនេះ ក្រុមហ៊ុនដែលជាសមាជិកទាំងតូច ទាំងធំបានចេញធ្វើការវិនិយោគក្រៅប្រទេសរហូតដល់ចំនួន១៥៣ ប្រទេសនៅលើសាកលលោក ជាមួយនឹងទំហំទឹកប្រាក់ប្រមាណ៨ពាន់លានដុល្លារសហរដ្ឋអាមេរិក។
លោកបានបន្តទៀតថា “វិស័យសាងសង់ក្រៅប្រទេសរបស់កូរ៉េខាងត្បូង ត្រូវបានក្រុមអ្នកជំនាញរបស់សហរដ្ឋអាមេរិក ធ្វើការសិក្សាស្រាវជ្រាវយ៉ាងលម្អិត និងស្ថិតនៅក្នុងចំណាត់ថ្នាក់ទី៦ទូទាំងសាកលលោក”។
អ្នកវិភាគសេដ្ឋកិច្ចកម្ពុជា លោកង៉ែត ជូ បានបង្ហាញនូវក្ដីសាទរ និងស្វាគមន៍ចំពោះវត្តមានរបស់បណ្តាក្រុមហ៊ុន សាងសង់មកពីប្រទេសកូរ៉េខាងត្បូង។ លោកបានបន្តទៀតថា “វាជារឿងល្អនៅពេលមានរូបភាពបែបនេះ ព្រោះការធ្វើទស្សនកិច្ចសិក្សាអំពីឱកាសវិនិយោគជាដៃគូ វាជាចំណុចចាប់ផ្តើមដ៏ល្អមួយ។
លោកបានបន្តទៀតថា “បច្ចុប្បន្នវិស័យសាងសង់សំណង់ និងអចលនទ្រព្យនៅកម្ពុជា ភាគច្រើនគឺជាការវិនិយោគរបស់ក្រុមហ៊ុនចិន ប៉ុន្តែបើមានក្រុមហ៊ុនមកពីកូរ៉េខាងត្បូង បន្ថែមទៀតវាកាន់តែប្រសើរ និងជម្រុញឱ្យវិស័យមួយនេះរីកចម្រើនខ្លាំង។
លោកបានបន្តទៀតថា “ប្រទេសកូរ៉េមានបច្ចេកវិទ្យាខ្ពស់ នៅពេលដែលគេចូលមកកាន់កម្ពុជា ក្រៅពីអាចទទួលបានប្រយោជន៍ និងចំណូលបន្ថែមលើសេដ្ឋកិច្ចកម្ពុជា យើងក៏អាចទទួលបានចំណេះដឹងបន្ថែមថ្មីៗពីវិស័យមួយនេះ”។ លោកបន្តងថា “វាក៏ជាឱកាសដ៏ល្អសម្រាប់អ្នកវិនិយោគក្នុងស្រុក ក្នុងការចាប់ដៃធ្វើជំនួញឆ្ពោះទៅកាន់ប្រទេសកូរ៉េធ្វើជាដៃគូវិញ”៕
