ការផលិតកង់រាប់លានគ្រឿងនៅកម្ពុជា នឹងចាប់ផ្តើមនៅឆ្នាំនេះ ខណៈក្រុមហ៊ុនផលិតកម្មជាច្រើនរបស់ចិន កំពុងធ្វើផ្លាស់ប្តូរទីតាំងវិនិយោគខ្លួនមកកម្ពុជា។
យោងតាមក្រសួងពាណិជ្ជកម្មកម្ពុជាឲ្យដឹងកាលពីពេលថ្មីៗនេះថា ក្រុមហ៊ុនផលិតកង់ Shanghai General Sports ដែលមានមូលដ្ឋាននៅសៀងហៃ នឹងបើករោងចក្រថ្មីមួយនៅភ្នំពេញនៅខែនេះ ជាមួយនឹងក្រុមហ៊ុនផលិតកង់ធំៗពីរ គឺក្រុមហ៊ុន Evergrand និងក្រុមហ៊ុនកង់ XDS ដែលត្រូវបានចុះបញ្ជីកាលពី៣ខែមុន។
ការផ្លាស់ប្តូរទីតាំងផលិតកម្មពីចិនមកកម្ពុជា គឺដោយសារតែការតម្លើងពន្ធគយពាណិជ្ជកម្ម ដែលកើតចេញពីសង្រ្គាមពាណិជ្ជកម្មអាម៉េរិក ចិន ហើយទំនិញរបស់ចិនត្រូវបានតម្លើងពន្ធរហូតដល់២៥ភាគរយ។ តើពន្ធថ្មីនេះនឹងចូលជាធរមានឬយ៉ាងណា នឹងត្រូវបានកំណត់នៅក្នុងខែនេះ នៅឯកិច្ចប្រជុំកំពូល G20 ក្នុងប្រទេសជប៉ុន ទីដែលលោកប្រធានាធិបតីអាមេរិក Donald Trump និងប្រធានាធិបតីចិន លោកហ្សី ជីនភីង នឹងត្រូវជួបប្រជុំគ្នា។
លោក Arnold Kamler ប្រធានក្រុមហ៊ុនកង់អាមេរិក Kent International ដែលប្រើប្រាស់ក្រុមហ៊ុន Shanghai General Sports ជាអ្នកផ្គត់ផ្គង់ធំ បានប្រាប់សារព័ត៌មាន The Straits បានថ្លែងថា “ប្រសិនបើកិច្ចប្រជុំ [G-20] ដំណើរការយ៉ាងល្អនោះ ផលិតកម្មនៅកម្ពុជានឹងដំណើររលួន”។
លោកបានបន្ថែមថា “ប្រសិនបើវាពិតជាមានរឿងបែកបាក់គ្នាទាំងស្រុង [ផលិតកម្ម] នឹងមានល្បឿនលឿន”។ លោកបន្តថា “ជាក់ស្ដែង ក្រុមហ៊ុនផលិតកង់ដ៏ធំបំផុតមួយនៅលើពិភពលោកគឺក្រុមហ៊ុន Giant Manufacturing Co. បានធ្វើការគណនាថា ទំនាក់ទំនងពាណិជ្ជកម្មអាម៉េរិក និងចិននឹងដួលរលំ ហើយបានចាប់ផ្តើមផ្លាស់ប្តូរទីតាំងផលិតកម្មរួចជាស្រេចចេញពីប្រទេសចិន”។
លោកស្រី Bonnie Tu ប្រធានក្រុមហ៊ុន Giant បានថ្លែងទៅកាន់ទីភ្នាក់ងារព័ត៌មាន Bloombergថា “កាលពីឆ្នាំមុនខ្ញុំបានកត់សម្គាល់ឃើញថា សម័យកាលផលិតនៅប្រទេសចិន និងការផ្គត់ផ្គង់នៅទូទាំងពិភពលោកបានបញ្ចប់”។
លោកស្រីបាននិយាយថា “នៅពេលលោកTrump ប្រកាសផែនការតម្លើងពន្ធចំនួន២៥ភាគរយ យើងបានគិតវាយ៉ាងហ្មត់ចត់។ យើងបានចាប់ផ្តើមផ្លាស់ប្តូរទីតាំងវិនិយោគ មុនពេលគាត់បិទមាត់”។
នៅឆ្នាំ២០១៨ រោងចក្រកម្ពុជាបានផលិតកង់ជិត ១,៤លានគ្រឿង ដែលស្មើនឹងទំហំទឹកប្រាកល់ ២៨៧លានដុល្លារ៕
