ថ្ងៃចន្ទ ១៥កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែមិថុនា ឆ្នាំ២០១៩ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានទទួលជួបសម្តែងការគួរសមពីសំណាក់លោក Mark Wong នាយកប្រតិបត្តិរបស់ក្រុមហ៊ុន Huawei នៅកម្ពុជា។ លោក Wong គឺជានាយកប្រតិបត្តិថ្មីរបស់ក្រុមហ៊ុន Huawei នៅកម្ពុជាជំនួសលោកDavid Li ដែល បានបញ្ចប់អាណត្តិរបស់ខ្លួននៅព្រះរាជាណាចក្រកម្ពុជា។
ជំនួបនេះមានគោលបំណងពិភាក្សាអំពីកិច្ចសហការរបស់ក្រុមហ៊ុនHuawei និងការគាំទ្រដល់ការ អភិវឌ្ឍហេដ្ឋារចនាសម្ព័ន្ធព័ត៌មានវិទ្យារបស់ក្រសួង ដោយប្រើប្រាស់ដំណោះស្រាយបច្ចេកវិទ្យាទូរគមនាគមន៍ របស់ក្រុមហ៊ុន។
ឯកឧត្តមទេសរដ្ឋមន្រ្តី បានអញ្ជេីញ ក៏ដូចជាណែនាំលោក Wong ដើម្បីសិក្សាស្វែងយល់ពីលទ្ធភាព សហការជាមួយក្រសួង តាមរយៈ នាយកដ្ឋានព័ត៌មានវិទ្យា និងទំនាក់ទំនងសាធារណៈរបស់ក្រសួង ដោយប្រេីប្រាស់បច្ចេកវិទ្យាក្នុងជំនាញឯកទេសរបស់ខ្លួន។
លោក Wong ក៏បានជម្រាបជូនឯកឧត្តមទេសរដ្ឋមន្រ្តីអំពីវឌ្ឍនភាពនៃគំនិតផ្តួចផ្តើមដ៏សំខាន់មួយរបស់កម្ពុជា (ដោយសហការជាមួយក្រុមហ៊ុន China Communications Construction Co.) ដែលពាក់ព័ន្ធ នឹងការដំឡើងខ្សែកាបអុបទិកក្រោមសមុទ្រស្ថិតនៅចន្លោះហុងកុង និងខេត្តព្រះសីហនុ។ នៅពេលបានដំឡើងរួចរាល់ បណ្តាញខ្សែកាបអុបទិកក្រោមដីទាំងនេះ នឹងអាចឱ្យកម្ពុជាតភ្ជាប់បណ្តាញប្រកប ដោយប្រសិទ្ធភាពខ្ពស់ និងភាពជឿទុកចិត្តបាន។