អភិបាលខេត្តបន្ទាយមានជ័យឯកឧត្តម អ៊ុំ រាត្រី បានបញ្ជក់ថា ក្នុងនាមជាអាជ្ញាធរខេត្តនឹងបន្តសហការជាមួយដៃគូសង្គមស៊ីវិលដោះស្រាយបញ្ហាក្នុងខេត្តឱ្យតូចទៅៗរហូតដល់អស់ឆ្លើយតបនឹងគោលនយោបាយរាជរដ្ឋាភិបាល ដើម្បីជំរុញល្បឿនការអភិវឌ្ឍខេត្តឱ្យកាន់តែរីកចម្រើន។
ការលើកឡើងបែបនេះរបស់ឯកឧត្តម អ៊ុំ រាត្រី បានធ្វើឡើងក្នុងវេទិកាពិគ្រោះយោបល់ ជាមួយអង្គការសង្គមស៊ីវិលក្នុងខេត្តបន្ទាយមានជ័យ កាលពីថ្ងៃព្រហស្បតិ៍ ៣រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែមិថុនា ឆ្នាំ២០១៩ ក្រោមប្រធានបទ «ការ ពង្រឹងកិច្ចសហការរវាងអង្គការសង្គមស៊ីវិលនិងរាជរដ្ឋាភិបាល សំដៅសម្រេចបាននូវក្រប ខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា» ដោយមាន ការចូលរួមពីតំណាងមន្ទីរ អង្គភាពចំណុះសាលាខេត្ត ព្រមទាំងតំណាងអង្គការ សមាគម សហជីព និងសហគមន៍នានា នៅក្នុងខេត្តបន្ទាយមានជ័យ ក្រោមវត្តមានឯកឧត្តម កឹម រ័ត្នវិសិដ្ឋ រដ្ឋលេខាធិការទីស្តីការ គណៈរដ្ឋមន្រ្តី និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស.)។
ឯកឧត្តមអភិបាលខេត្តបន្ទាយមានជ័យបានបន្តទៀតថា ឱ្យតែកិច្ចប្រតិបត្តិការរបស់អង្គការសមាគមហ្នឹងបម្រើដល់ផលប្រយោជន៍ជាតិប្រជាពលរដ្ឋស្របទៅនឹងគោលនយោ បាយរបស់រាជរដ្ឋាភិបាលធ្វើអ្វីក៏បាន និងជំរុញការគាំទ្រឱ្យអាជ្ញាធរឃុំ សង្កាត់និងស្រុកក៏ដូច ជាមន្ទីរជំនាញឆ្លើយតបនឹងធ្វើការងារជាមួយ។
ឯកឧត្តម កឹម វិសិដ្ឋ បានថ្លែងថា វេទិកានេះធ្វើឡើងក្នុងគោលបំណងដើម្បីឱ្យអង្គការសង្គមស៊ីវិលនៅក្នុងខេត្តបន្ទាយមានជ័យ បានឈ្វេងយល់ស៊ីជម្រៅអំពីគោលដៅអភិវឌ្ឍន៍ប្រកបដោយចីរភាពកម្ពុជា សំដៅពង្រឹងនិងពង្រីកកិច្ចសហប្រតិបត្តិការជិតស្និទ្ធ រវាងរាជ រដ្ឋាភិបាល អាជ្ញាធរមូលដ្ឋាន និងអង្គការសង្គមស៊ីវិល ដើម្បីធានាបាននូវការអភិវឌ្ឍប្រកប ដោយនិរន្តរភាពនៅកម្ពុជា។
នៅក្នុងវេទិកាសម្ព័ន្ធសង្គមស៊ីវិលនេះ អាជ្ញាធរខេត្ត និងតំណាងអង្គការ សមាគម សហ ជីពនិងសហគមន៍ក៏បានជជែកពិភាក្សាដោយត្រង់ទៅត្រង់មកជាមួយគ្នាពាក់ព័ន្ធនឹងបញ្ហាប្រឈមជាក់ស្តែងដែលកើតមាននៅក្នុងមូលដ្ឋាននៃខេត្តបន្ទាយមានជ័យរួមទាំងសំណូមពរមួយចំនួនផងដែរដើម្បីសហការស្វែងរកដំណោះស្រាយជាមួយគ្នាសំដៅជំរុញការអភិវឌ្ឍមូលដ្ឋានឱ្យកាន់តែរីកចម្រើនថែមទៀត៕