ពិធីសំណេះសំណាល ថ្លែងអំណរគុណដល់មន្ត្រីរាជការ កងកម្លាំង និងសប្បុរសជនដែលបានចូលរួមប្រតិបត្តិការ ជួយសង្គ្រោះប្រជាពលរដ្ឋក្នុងឧបទ្ទវហេតុបាក់រលំអគារ នៅខេត្តព្រះសីហនុ បានប្រព្រឹត្តទៅនាថ្ងៃទី ១៣ ខែកក្កដា ឆ្នាំ២០១៩ នៅខេត្តព្រះសីហនុ ដែលមានការចូលរួមពីសំណាក់អ្នកសង្គ្រោះ កងកម្លាំងប្រដាប់អាវុធ មន្ត្រីរាជការ និងសប្បុរសជន ចំនួន១៤៧២ នាក់ ក្រោមអធីបតីភាព របស់ឯកឧត្តម ហ៊ុន ម៉ានី សមាជិករដ្ឋសភានៃព្រះរាជាណាចក្រកម្ពុជា ឯកឧត្តម សាយ សំអាល់ ប្រធានក្រុមការងារថ្នាក់ជាតិចុះជួយខេត្តព្រះសីហនុ និងឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ។
មានប្រសាសន៍ឯកឧត្តម ហ៊ុន ម៉ានី ស្តែងចេញពីឧបទ្ទវហេតុនៃការរលំអគារ បានបង្ហាញពីការចូលរួមរបស់ប្រជាជនខ្មែរមិនថាមកពីទីណាដើម្បីរំដោះ និងសង្គ្រោះអាយុជីវិតប្រជាជនខ្មែរ។ ក្នុងថ្ងៃកើតហេតុនោះ ទោះបីជានៅឆ្ងាយយ៉ាងណា ឬនៅទីកន្លែងណាក៏ប្រជាជនខ្មែរនៅតែខ្វល់ខ្វាយ តាមដានពីសុខទុក្ខ និងបន់ស្រន់សូមអោយបងប្អូនខ្មែរមានសុវត្ថិភាព ក្រុមការងារស្ថាប័នទាំងអស់ មានសរុបជាង១១ស្ថាប័នមករួបរួមគ្នា មកសហការរួមគ្នា មកជាកម្លាំងរួមផ្សំគ្នា។ នេះជាគំរូវីរៈភាពសម្រាប់មនុស្សជំនាន់ក្រោយ និងបានបញ្ជាក់រឹតតែច្បាស់ថា កម្ពុជាមិនមែនជាសង្គមសក់អ្នកណាក្បាលអ្នកនោះ។ បេសកកម្មនេះ គឺមិនមែនជាការចាត់តាំង តែជាសកម្មភាពដែលកើតចេញពីចិត្តយ៉ាងពិតប្រាកដ មិនថាជាការវិនិយោគនៅថ្ងៃនេះ ឬថ្ងៃក្រោយ ត្រូវតែដាក់ផលប្រយោជន៍ខ្មែរជាចម្បង
ជាទីបញ្ចប់ ឯកឧត្តម ហ៊ុន ម៉ានី បានថ្លែងអំណរគុណដល់ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដែលបានយកចិត្តទុកដាក់ និងបានលើកទឹកចិត្តដល់ក្រុមសង្គ្រោះក្នុងឧបទ្ទវហេតុ។