ក្នុងឱកាសនាំយកអំណោយរបស់ សាខាកាកបាទក្រហមកម្ពុជាខេត្តបន្ទាយមានជ័យ ផ្តល់ឱ្យមជ្ឈមណ្ឌលស្តារនីតិសម្បទាជីវិតថ្មីភ្នំបាក់ ក្រុងសិរីសោភ័ណ កាលពីរសៀលថ្ងៃអង្គារ ៦កើត ខែស្រាពណ៍ ឆ្នាំកុរ ឯក ស័កព.ស២៥៦៣ត្រូវនឹងថ្ងៃទី០៦ ខែសីហា ឆ្នាំ២០១៩ អភិ បាលខេត្តបន្ទាយមានជ័យឯកឧត្តម អ៊ុំ រាត្រី បានធ្វើការអប់រំដាស់តឿនក្រើនរម្លឹកដល់យុវជន យុវតី ប្រមាណ ៧០០នាក់ ដែលកំពុងកែប្រែបន្សាបគ្រឿងញៀននៅក្នុងមជ្ឈមណ្ឌលនេះគប្បី ត្រូវយកចិត្តទុកដាក់ខិតខំអប់រំ ចិត្តកែខ្លួន និងត្រូវបញ្ឈប់ការសាកល្បងគ្រឿងញៀន ដែលនាំ ឱ្យបំផ្លាញអនាគតខ្លួននោះ។
ឯកឧត្តម អ៊ុំ រាត្រី បានឱ្យដឹងទៀតថា បច្ចុប្បន្ននេះមានយុវជន យុវតី និងពលរដ្ឋមួយ ចំនួនកំពុងចង់ដឹង និងចង់សាកល្បងនូវការសេពគ្រឿងញៀន តែវាបង្កឱ្យប៉ះពាល់ដល់សុខ ភាពយ៉ាងធ្ងន់ធ្ងរ និងធ្វើឱ្យមនុស្សបាត់បង់អនាគតរបស់ខ្លួន។ ដូច្នេះហើយសូមក្មួយៗយុវជន យើងត្រូវតែចៀសឱ្យឆ្ងាយ និងឆ្លើយថាទេចំពោះគ្រឿងញៀន។
ជាមួយនេះឯកឧត្តមអភិបាលខេត្តបន្ទាយមានជ័យបានជំរុញដល់យុវជនយុវតីត្រូវប្រឹងប្រែងហាត់ពាត់លត់ដំខ្លួន ធ្វើការបន្សាបគ្រឿងញៀនចេញពីខ្លួនឱ្យអស់ ទៅតាមការអប់រំណែ នាំរបស់មជ្ឈមណ្ឌលនោះ ទើបអាចត្រឡប់ទៅកាន់ផ្ទះសម្បែងវិញ។ ឯកឧត្តមបានសង្កត់ធ្ងន់ ថា តែទោះជាយ៉ាងណាមិនត្រូវសាកល្បងគ្រឿងញៀនសារជាថ្មីឡើយ បើមិនដូច្នេះទេអ្នកទាំងអស់គ្នានឹងទទួលការចាប់ចងពីកម្លាំងសមត្ថកិច្ចជំនាញយកមកចាត់ការទៅតាមនីតិវិធីច្បាប់។
ឯកឧត្តម អ៊ុំ រាត្រី បានប្រាប់ឱ្យដឹងទៀតថានៅក្នុងខេត្តបន្ទាយមានជ័យរយៈពេលកន្លងមកនេះកងកម្លាំងប្រដាប់អាវុធគ្រប់ប្រភេទ មន្ត្រីរាជការ អង្គការសង្គមស៊ីវិល អាជ្ញាធរមូលដ្ឋាននិងប្រជាពលរដ្ឋគ្រប់ស្រទាប់ជាន់ថ្នាក់ បានខិតខំប្រឹងប្រែងអប់រំ ផ្សព្វផ្សាយលើកកម្ពស់ការយល់ដឹងអំពីផលប៉ះពាល់នៃគ្រឿងញៀនសហការបង្ការទប់ស្កាត់ និងបង្ក្រាបការជួញដូរចរា ចរ និងប្រើប្រាស់គ្រឿងញៀន ការបន្សាប ការព្យាបាល និងស្តារនីតិសម្បទាអ្នកជាប់សារធាតុ ញៀនក្នុងខេត្តឱ្យមានការថយចុះជាលំដាប់ហើយបានកំពុងបន្តសកម្មភាពនេះដើម្បីសង្គម យើងចៀសផុតពីគ្រឿងញៀន។
អភិបាលខេត្តបន្ទាយមានជ័យឯកឧត្តម អ៊ុំ រាត្រី ជាប្រធានគណៈកម្មាធិការសាខាកាក បាទក្រហមកម្ពុជាខេត្តបន្ទាយមានជ័យ បានឱ្យដឹងថា ដោយមើលឃើញពីការលំបាករបស់ មជ្ឈមណ្ឌលជីវិតថ្មីភ្នំបាក់ សាខាកាកបាទក្រហមខេត្ត ក្រោមការណែនាំពីសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែយកចិត្ត ទុកដាក់ ជួយដោះស្រាយរាល់ការលំបាករបស់ប្រជាពលរដ្ឋនៅគ្រប់ទីកន្លែង បាននាំយកអង្ករ ចំនួន ២តោន ស៊ីតែនទឹក១ចំណុះ ១០.០០០លីត្រ ទឹកស៊ីអ៊ីវ ១២០ដប និងនំធុង ១៤ធុង ដើម្បី ជួយផ្គត់ផ្គង់ដល់ជីវភាពរបស់យុវជនដែលកំពុងបន្សាបគ្រឿងញៀនកុំឱ្យមានការខ្វះខាត។
សូមបញ្ជាក់ថា មជ្ឈមណ្ឌលស្តារនីតិសម្បទាជីវិតថ្មីភ្នំបាក់នេះ មានអគារ ៨ខ្នង មានសេវាអប់រំចិត្តសាស្ត្រ ការធ្វើលំហាត់ប្រាណ ការងាររបណ្តុះបណ្តាល ជំនាញវិជ្ជាជីវៈដល់យុវ ជន ដែលចូលមកអប់រំបន្សាបគ្រឿងញៀនថែមទៀតផង៕