ជំនួបពិភាក្សាការងារ​រវាងថ្នាក់ដឹកនាំ​ខេត្តសៀមរាប​ និងប្រតិភូ​ពាណិជ្ជករជប៉ុន​-ថៃ​ និងអាឡឺម៉ង់


នៅរសៀលថ្ងៃ​អង្គារ​ ៨រោច​ ខែកត្ដិក​ ឆ្នាំកុរ​ ឯកស័ក​ ព.ស២៥៦៣​ ត្រូវនឹងថ្ងៃ​ទី​១៩​ ខែវិច្ឆិកា​ ឆ្នាំ​២០១៩​ នៅរដ្ឋបាលខេត្តសៀមរាប​ មានពិធីជួបពិភាក្សាការងារ​រវាងថ្នាក់ដឹកនាំ​ខេត្ត​ និងប្រតិភូ​ពាណិជ្ជករជប៉ុន​-ថៃ​ និងអាឡឺម៉ង់​ ដឹកនាំដោយ​ ​ឯកឧត្តម​ អ៊ូក​ សោភ័ណ​ ឯកអគ្គរាជទូត​កម្ពុជា​ប្រចាំប្រទេសថៃ​ និងលោក​ លី​ សំរិទ្ធ​ អភិបាលរង​ខេត្ត​ តំណាង​ដ៏ខ្ពង់ខ្ពស់​ ឯកឧត្តម​ ទៀ​ សីហា​ អភិបាល​ នៃគណៈអភិបាលខេត្ត​សៀមរាប​ និងមានការចូលរួមពី​ លោក​ លោកស្រី​មន្ត្រីរាជការ​តំណាង​មន្ទីរ-អង្គភាព​ លោក​ លោកស្រី​ប្រតិភូ​អមដំណើរ​មកពី​ ០៣ប្រទេស​ (ថៃ​ ជប៉ុន​ អាឡឺម៉ង់​)​ សរុបចំនួន​ ៤៥នាក់​។

ស្របតាមការអនុញ្ញាតដ៏ខ្ពង់ខ្ពស់របស់ឯកឧត្តមឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ក្នុងការជម្រុញការទូតបែបទំនើបដែលជាការទូតសេដ្ឋកិច្ច ទេសចរណ៍ និងវប្បធម៌ ដោយមានការគាំទ្រពីសំណាក់ក្រសួងការបរទេស និងសហប្រតិបត្តិការអន្តរជាតិ ស្ថានទូតកម្ពុជាប្រចាំប្រទេសថៃ រៀបចំដំណើរទស្សនកិច្ចសិក្សាសម្រាប់ពាណិជ្ជករថៃ-ពាណិជ្ជករជប៉ុន​ និងពាណិជ្ជករអាឡឺម៉ង់មកកម្ពុជា ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០១៩ នៅរាជធានីភ្នំពេញ និងខេត្តសៀមរាប។

ក្នុងជំនួបនេះដែរលោកអភិបាលរង​ខេត្ត​ និងឯកឧត្ដម​ឯកអគ្គរាជទូត​ បានពិភាក្សាលេីកិច្ចការងារមួយចំនួនដូចជា​ ទេសចរណ៍​ វប្បធម៌​ សុខាភិបាល​ ហេដ្ឋារចនាសម្ព័ន្ធ​ អចលនទ្រព្យ​ វិនិយោគ​ កសិកម្ម​ ម្ហូបអាហារ​ បរិស្ថាន​ ការទុកដាក់កាកសំណល់​ ការកែច្នៃសំរាម​ ការអភិវឌ្ឍន៍​នានា​ ពិសេស​វិស័យ​ទេសចរណ៍​សម្រាប់​ខេត្ត​សៀមរាប​ ព្រោះ​ខេត្តសៀមរាប​ គឺជាប៉ូលសេដ្ឋកិច្ច​ និងគោលដៅទេសចរណ៍ដ៏ធំ​ និងជាទឹកដីប្រវត្តិសាស្ដ្រ​បេតិកភណ្ឌ​ពិភពលោក​ ប្រជុំដោយប្រាសាទបុុរាណល្អៗ​ ល្បីរន្ទឺពេញពិភពលោក​។

ក្នុងនោះដែរ​ លោកអភិបាលរងខេត្ត​ និងឯកឧត្ដម​ឯកអគ្គរាជទូត​ ក៏បានលេីកឡេីងពីខួបលេីកទី៧០​ នៃចំណងមិត្តភាពកម្ពុជា​-ថៃ​ និងចំណងមិត្តថៃ​-ឡាវ​ និងពិភាក្សា​លេីគម្រោងទាក់ទាញភ្ញៀវទេសចរណ៍​ចិនដែលបានមកទស្សនាកំសាន្តខេត្តសុរិន្ទ​ និងខេត្តបុរីរ៉ាំ​ ប្រទេសថៃឲ្យមកទស្សនាខេត្តសៀមរាប​ ប្រទេស​កម្ពុជា​តាមច្រកអន្តរជាតិអូស្មាច់​ និងច្រកអន្តរជាតិផ្សេងទៀតរបស់ខេត្តឧត្ដរមានជ័យ​ នៅពេលអនាគត ហើយប្រតិភូ​ពាណិជ្ជករជប៉ុន​-ថៃ​ និងអាឡឺម៉ង់ ក៏បង្ហាញពីគោលបំណងចង់មកធ្វើការវិនិយោគនៅប្រទេសកម្ពុជាយើងផងដែរ៕