សម្តេចតេជោនាយករដ្ឋមន្រ្តី ហ៊ុន សែន បានថ្លែងពីក្នុងមន្ទីរពេទ្យនៃប្រទេសសឹង្ហបុរីថា គ្រូពេទ្យបានបញ្ជាក់ថា សុខភាពរបស់សម្តេចមានភាពល្អណាស់ ប៉ុន្តែបានស្នើអោយសម្តេចធ្វើការហាត់ប្រាណដោយការហែលទឹកបន្ថែមទៀត ។ ប្រសាសន៍បញ្ជាក់នេះ គឺនៅចំថ្ងៃទី៣ ដែលសម្តេចកំពុងពិនិត្យសុខភាពនៅក្រៅប្រទេស ។
សម្តេចបានដកស្រង់សម្តីគ្រូពេទ្យ សឹង្ហបុរីដែលបញ្ជាក់ទៀតថា គ្មានប្រភេទជម្ងឺណាមួយដែលត្រូវបារម្ភចំពោះសុខភាពសម្តេចទេ បើទោះបីជាសម្តេចមានអាយុច្រើនជាងមុនក្តី ។ សម្តេចបានថ្លែងថា ជាមួយនឹងសុខភាពល្អនេះ សម្តេចនឹងបន្តការពារសន្តិភាព និងជំរុញការអភិវឌ្ឍន៍សេដ្ឋកិច្ច សង្គម បំរើដល់ជាតិនិងប្រជាជនបន្តទៀត ។
សម្តេចតេជោសែន បានថ្លែងថា គ្រូពេទ្យបានសប្បាយចិត្តដោយសារសម្តេចបានឈប់ជក់បារី ដែលជាផ្នែកមួយនៃការធ្វើអោយសុខភាពកាន់តែល្អប្រសើរ ។ សម្តេចបានមានប្រសាសន៍ទៀតថា គ្រូពេទ្យក៏បង្ហាញក្តីរីករាយផងដែរ ដោយឃើញកម្លាំងដៃកម្លាំងជើងរបស់សម្តេចនៅខ្លាំង ក្នុងរាងកាយសម្តេចដែលជាកីឡាករវាយកូនគោល ។ ជាមួយនោះ សម្តេចបានប្រាប់គ្រូពេទ្យថា សម្តេចអាចបង្កើនពេលវាយកូនគោល ប្រសិនណាជាមានពេលវេលាសម្រាក និងមានការអនុញ្ញាតពីចៅ និងភរិយា ដោយសារតែពេលសម្រាកខ្លះ គឺសម្តេចត្រូវជួបចៅៗដែលមានពេលទំនេរ ក្នុងថ្ងៃដែលឈប់សម្រាកពីការរៀនសូត្រ ។
សម្តេចតេជោសែន បានថ្លែងមុននេះថា សម្តេចនឹងវិលត្រឡប់មកប្រទេសវិញនៅថ្ងៃទី២១ មករា នេះ បើសិនជាក្រុមគ្រូពេទ្យអនុញ្ញាត ។
