រដ្ឋមន្ដ្រីក្រសួងការបរទេសអាម៉េរិកក័ង លោក John Kerry បានអញ្ជើញមកកម្ពុជាល្ងាចថ្ងៃទី ២៥ មករានេះ ក្រោយការបញ្ចប់ទស្សនកិច្ចក្នុងប្រទេសឡាវ រួចមក ។
លោក John Kerry គឺជារដ្ឋមន្ដ្រីការបទេសអាម៉េរិកក័ងលើកទី៦៨ ក្រោយការចូលកាន់តំណែងតាំងពីថ្ងៃទី១ ខែកុម្ភៈ ឆ្នាំ ២០១៣ បន្ទាប់ពី លោកស្រី ហ៊ីល ឡារីគ្លីនតុន បានលាលែងចេញពីតំណែង។ ដំណើររបស់ លោក John Kerry នៅកម្ពុជា និងតាមបណ្ដាប្រទេសខ្លះក្នុងអាស៊ាន ត្រូវគេរាយការណ៍ថា គឺជាដំណើរមួយ ក្នុងការត្រួសត្រាយផ្លូវរកកិច្ចប្រជុំកំពូលអាស៊ានអាម៉េរិកក័ង នៅខែកុម្ភៈ ខាងមុខនេះ ក្នុងរដ្ឋកាលីហ្វ័រនី ។ កិច្ចប្រជុំកំពូលអាស៊ានអាម៉េរិក ក្នុងរដ្ឋកាលីហ្វ័រនី ត្រូវគេជូនដំណឹងថា និងធ្វើពីថ្ងៃទី១៥ ដល់១៦ ខែកុម្ភៈ នៅក្រុងជាប់មាត់ទឹក Rancho Mirage ។
សហរដ្ឋអាម៉េរិកចង់ប្រើប្រាស់អាស៊ាន ក្នុងការរកតុល្យភាពមួយទប់ទល់ នឹងឥទ្ធិលរបស់ប្រទេសចិនផងដែរ ។ កិច្ចប្រជុំកំពូលអាស៊ានអាម៉េរិកនៅពាក់កណ្ដាលខែកុម្ភៈនេះ នឹងមានការចូលរួមដោយប្រធានាធិបតីអាម៉េរិក លោក បារ៉ាក់ អូបាម៉ា ។
រដ្ឋលេខាធិការក្រសួងការបរទេស ឯកឧត្តម អ៊ុច បូរិទ្ធ បានដឹកនាំគណៈប្រតិភូកម្ពុជា ក្នុងការទទួលស្វាគមន៍ដំណើរអញ្ចើញមកដល់របស់ លោក John Kerry នៅព្រលានយន្ដហោះអន្តរជាតិភ្នំពេញ ។ មន្ដ្រីក្រសួងការបរទេសកម្ពុជាបានថ្លែងថា ដំណើរទស្សនកិច្ចរបស់ លោក John Kerry គឺដើម្បីជម្រុញ និងពង្រឹងបន្ថែមទៀត នូវទំនាក់ទំនងទ្វេភាគីរវាងប្រទេសទាំង២ ។
នៅថ្ងៃទី២៦ ខែមករានេះ លោក John Kerry នឹងជួបសម្ដែងការគួរសមចំពោះ សម្ដេចតេជោសែន នាយករដ្ឋមន្ដ្រី និងជួបចរចាផ្លូវការជាមួយ នឹង ឯកឧត្តមឧបនាយករដ្ឋមន្ដ្រី ហោ ណាំហុង រដ្ឋមន្ដ្រីក្រសួងការបរទេស ។
