ឯកឧត្តមបណ្ឌិតសភាចារ្យ ហង់ជូន ណារ៉ុន រដ្ឋមន្រ្តីក្រសួងអប់រំយុវជន និងកីឡា នៅព្រឹកថ្ងៃចន្ទ ទី០៧ ខែកញ្ញា ឆ្នាំ២០២០នេះ បានចុះពិនិត្យមើលតាមសាលារៀនមួយចំនួននៅក្នុងខេត្តសៀមរាប ដែលបានបើកឱ្យសិស្សចូលរៀនថ្ងៃដំបូង ជាពិសេសផ្តោតសំខាន់ទៅលើកុមារតូច បន្ទាប់ពីបានបិទអស់មួយរយៈដោយសារតែជំងឺកូវីដ-១៩។
ឯកឧត្តម បណ្ឌិតសភាចារ្យ ហង់ជូន ណារ៉ុន បានមានប្រសាសន៍ថា នៅថ្ងៃដំបូងនៃការបើកឱ្យសិស្សចូលរៀនឡើងវិញនេះ ឃើញថា នៅតាមសាលានានាក្នុងខេត្តសៀមរាបមានការអនុវត្តវិធានការសុវត្ថិភាព របស់ក្រសួងសុខាភិបាលបានយ៉ាងល្អប្រសើរ។ ប៉ុន្តែទោះជាយ៉ាងនេះក្តី ឯកឧត្តមបានជំរុញ និងលើទឹកចិត្តឱ្យគ្រប់សាលារៀនទាំងអស់ បង្កើនការអនុវត្តវិធានការសុវត្ថិភាព ដើម្បីបង្ការការឆ្លងមេរោគកូវីដ-១៩ ឱ្យកាន់តែល្អប្រសើរបន្ថែមទៀត ដូចជា ក្រៅពីការបាញ់កម្ដៅ លាងសម្អាតដៃជាមួយសាប៊ូ និងទឹកស្អាត ឬ អាល់កុល និងរក្សាគម្លាតសុវត្ថិភាព ត្រូវបង្កើតកន្លែងលាងដៃ និងសាប៊ូឱ្យបានច្រើន។ លោកគ្រូអ្នកគ្រូត្រូវធ្វើជាគំរូដល់សិស្សក្នុងការអនុវត្តនូវវិធានការអនាម័យ និងសុវត្ថិភាព ដើម្បីឱ្យសិស្សក្លាយទៅជាទម្លាប់ ហើយពួកគាត់ នឹងទៅបង្រៀនដល់ក្រុមគ្រួសារគាត់ឱ្យអនុវត្តន៍វិធានការសុវត្ថិភាពនេះដែរ។
ឯកឧត្តមរដ្ឋមន្ត្រីបានបន្តថា ការចូលរៀនដំបូងនេះសម្រាប់ថ្នាក់រៀនមួយបន្ទប់ អាចដាក់សិស្សឱ្យសិក្សាត្រឹមពី១៥នាក់ ទៅ២០នាក់ប៉ុណ្ណោះ។ ក្នុងនោះដែរសម្រាប់ថ្នាក់មធ្យមសិក្សាមានថ្នាក់ទី៩ និងថ្នាក់ទី១២ សិស្សត្រូវសិក្សាចំនួន ១៨ម៉ោង ក្នុងមួយសប្ដាហ៍ ចំណែកសិស្សបឋមសិក្សាចំនួន ៨ម៉ោង ក្នុងមួយសប្ដាហ៍ និងមានចែកជាបីក្រុម។
សូមបញ្ជាក់ថា រាជរដ្ឋាភិបាលបានប្រកាសបិទសាលារៀនទាំងអស់នៅទូទាំងប្រទេស នៅថ្ងៃទី១៤ ខែមីនា ឆ្នាំ២០២០កន្លងទៅ ដោយសារវិបត្តិនៃជំងឺកូវីដ-១៩។ បន្ទាប់ពីស្ថានភាពជំងឺកូវីដ-១៩បានធូរស្រាល ក្រសួងអប់រំយុវជន និងកីឡា បានជូនដំណឹងជាបន្តបន្ទាប់ ស្តីពីដំណើរការបើកសាលារៀនឡើងវិញ ជាបីដំណាក់កាល រួមមាន៖ ដំណាក់កាលទី១-សាលារៀនមានស្តង់ដារសុវត្ថិភាពខ្ពស់។ ដំណាក់កាលទី២-សាលារៀនមានស្តង់ដារមធ្យម និងដំណាក់ កាលទី៣-សាលារៀនមានស្តង់ដារអប្បបរមា៕
