អភិបាលខេត្តស្ទឹងត្រែង បានក្រើនរំលឹកបន្ថែមឱ្យប្រជាពលរដ្ឋ ដែលរស់នៅតាមមូលដ្ឋានទីជនបទ ត្រូវលើកកម្ពស់ ថែរក្សាសុខភាពឱ្យបានល្អ ដោយប្រុងប្រយ័ត្នចំពោះជំងឺឆ្លងផ្សេងៗនៅពេលទឹកស្រកចុះទៅវិញ និងខិតខំដាំដំណាំរួមផ្សំផង។
ក្នុងឱកាសចុះផ្តល់អំណោយកាកបាទក្រហមកម្ពុជាខេត្តស្ទឹងត្រែង ជូនប្រជាពលរដ្ឋ២៦០គ្រួសារដែលរងផលប៉ះពាល់ពីជំនន់ ទឹកភ្លៀងទន្លេស្រែពកនិងទន្លេសេសាន នៅឃុំតាឡាត និងឃុំ ក្បាលរមាស ក្នុងស្រុកសេសានខេត្តស្ទឹងត្រែង កាលពីទី៣១តុលា ឯកឧត្តម ស្វាយសំអ៊ាង អភិបាលខេត្ត បានមានប្រសាសន៍ដាស់តៀនបន្ថែមដល់បងប្អូនប្រជាពលរដ្ឋរស់នៅតាមបណ្តាឃុំទីជនបទ ជាពិសេសបងប្អូនដែលរងផលប៉ះពាល់ពីទឹកជំនន់ទឹកភ្លៀង ត្រូវលើកកម្ពស់ថែទាំសុខភាពកូនចៅតូចៗ ក្រុមគ្រួសារ ជាពិសេសមនុស្ស មានវ័យចំណាស់។
ឯកឧត្តមមានប្រសាសន៍បន្ថែមថា៖ប្រការនេះ ចូរបងប្អូនអនុវត្តតាមមន្ត្រីសុខាភិបាលដែលបានណែនាំកន្លងមកដូចជា(រស់នៅស្អាត ផឹកស្អាត ហូបស្អាត) ជាប្រចាំ និងអនុវត្តវិធានការ (បីកុំ-បីការពារ )ចូលរួមទប់ស្កាត់ជំងឺកូវីដ១៩ផង និងនាំគ្នាខិតខំដាំដំណាំរួមផ្សំឱ្យបាន ច្រើន និងធ្វើការស្តាឡើងវិញនូវផលខូចខាត និង ពិនិត្យមើលទៅលើផ្ទៃដីដែលមានប្រភពទឹកគ្រប់គ្រាន់ ហើយនាំគ្នាដាំដុះដំណាំកសិកម្ម ដើម្បីបង្កើនសន្តិសុខស្បៀងប្រចាំគ្រួសារ។
លោក សុវណ្ណ ពិសេដ្ឋ អភិបាលស្រុកសេសានសង្ឃឹមថា៖ បងប្អូនប្រជាពលរដ្ឋទាំងអស់បានត្រៀមខ្លួនរួចរាល់ នៅពេលទឹកស្រក ទៅវិញនេះ និងប្រឹងប្រែងប្រកបរបរចិញ្ចឹមជីវិត និងថែទាំសុខភាពបានល្អ។
លោកបន្តថា៖ជាមួយគ្នានេះមន្ត្រីសុខាភិបាលបានណែនាំរួចមកហើយឱ្យបងប្អូនយើងទទួលទានអាហារឱ្យបានត្រឹមត្រូវ ពិសាទឹកដាំឆ្អិនល្អ រស់នៅក្នុងបរិស្ថានស្អាតប្រកបដោយអនាម័យ និងអនុវត្តឱ្យបានខ្ជាប់ខ្ជួននូវវិធានការរបស់រាជរដ្ឋាភិបាលកម្ពុជា ដែលដាក់ចេញដោយ សម្តេចតេជោ ហ៊ុន សែន នាយករដ្ឋមន្ត្រី គឺ៖(៣ការពារនិង៣កុំ)ដើម្បីរួមគ្នាប្រយុទ្ធប្រឆាំងនឹងជំងឺកូវីដ១៩ ឱ្យមានប្រសិទ្ធភាព ។
លោក គង្គ ធា ប្រជាពលរដ្ឋនៅភូមិស្វាយរៀង ឃុំតាឡា បានបញ្ជាក់ថា៖ បងប្អូនយើងតែងទទួលបានបានការណែនាំពីអាជ្ញាធរ រួចមកហើយ ជាងនេះទៀតប្រជាពលរដ្ឋនឹងអនុវត្តតាមការណែនាំរបស់ឯកឧត្តមអភិបាលខេត្ត ដែលបានដាស់តឿនឱ្យធ្វើអនាម័យ ក្នុងការរស់នៅ។
សូមបញ្ជាក់ថា៖អំណោយដែលសាខាកាកបាទក្រហមកម្ពុជាខេត្តផ្ដល់ជូននាពេលនេះ ក្នុង១គ្រួសារទទួលបាន អង្ករ២៥គីឡូក្រាម, មី ១កេស, ត្រីខ១យួរ, ទឹកស៊ីអ៊ីវ១យួរ,ទឹកត្រី១យួរ, ម៉ាស់១០សន្លឹក និងម៉ាស់ក្រណាត់១បន្ទះ ផងដែរ ដើម្បីបង្ការទប់ស្កាត់ការឆ្លងរីករាល ដាលនៃជំងឺកូវីដ១៩៕
