ក្រសួងសុខាភិបាល បានបន្តយុទ្ធនាការសម្លាប់មូស ដើម្បីបង្ការជម្ងឺគ្រុនឈាម និងជម្ងឺហ្ស៊ីកា។ ជម្ងឺហ្ស៊ីកា ទោះបីបានគម្រាមចំពោះបណ្តាប្រទេសនៅទ្វីបអាម៉េរិកនោះក្តី ប៉ុន្តែនៅកម្ពុជាជម្ងឺនេះ នៅមិនទាន់មានសេចក្តីរាយការណ៍ ថាបានឆ្លងចូលមកដល់នៅឡើយទេ ។
ទោះជាយ៉ាងណាក៏ដោយ មន្ត្រីអ្នកនាំពាក្យក្រសួងសុខាភិបាលនៅថ្ងៃនេះ បានមានប្រសាសន៍ប្រាប់ស្ត្រីមានផ្ទៃពោះ ដែលត្រូវប្រយ័ត្នចំពោះជម្ងឺហ្ស៊ីកានោះ ។
សូមជម្រាបថា នៅតាមប្រទេសដែលរងការឆ្លងជម្ងឺហ្ស៊ីកា មកលើស្រ្តីមានផ្ទៃពោះ គេសង្កេតឃើញទារកដែលបង្កើតចេញមកមានក្បាលតូច និងអវៈយវៈទន់ខុសធម្មតា ។ មន្ត្រីអ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជម្ងឺឆ្លង នៃក្រសួងសុខាភិបាល លោក លី សូវ៉ាន់ ក្នុងសិក្ខាសាលាផ្សព្វផ្សាយមួយពីជម្ងឺហ្ស៊ីកា ដែលមានការចូលរួមពីអ្នកសារព័ត៌មាននានា និងមន្ត្រីមួយចំនួនសរុបប្រមាណ ៤០នាក់ បានបញ្ជាក់យ៉ាងនេះថា ស្ថានភាពជម្ងឺហ្ស៊ីកានៅកម្ពុជាគឺ ស្ថិតនៅក្នុងហានិភ័យទាបនៅឡើយ ដោយសារការធ្វើដំណើរពីតំបន់ដែលរាតត្បាតមកកម្ពុជា មានចំនួនតិចតួច ។ លោកបញ្ជាក់ថា គេកំពុងធ្វើការស្រាវជ្រាវពីពូជមូសខ្លានៅកម្ពជា ថាតើអាចមានលទ្ធភាពផ្ទុក និងចម្លងជម្ងឺហ្ស៊ីកាដែរ ប៉ុន្តែគេមិនឃើញមានការរាតត្បាតបានកើតឡើងនោះទេ ។
វីរុសហ្ស៊ីកា ត្រូវគេរាយការណ៍ថា បានកើតមាននៅតំបន់ត្រូពិចដែលមានមូសច្រើន និងត្រូវបានគេដឹងថា បានចរាចរនៅទ្វីបអាហ្រ្វិកអាម៉េរិក អាស៊ីខាងត្បូង និងតំបន់ប៉ាស៊ីហ្វិកខាងលិចផងដែរ ។
