សម្តេចតេជោនាយករដ្ឋមន្រ្តី ហ៊ុន សែន និងគណៈប្រតិភូ បានវិលត្រឡប់មកកម្ពុជាវិញ នៅយប់ថ្ងៃទី១៨កុម្ភៈនេះ ក្រោយការចូលរួមកិច្ចប្រជុំកំពូលអាស៊ាន-អាម៉េរិក រយៈពេល ២ថ្ងៃ លើទឹកដីសហរដ្ឋអាម៉េរិក រដ្ឋកាលីហ្វ័រនីញ៉ា ។
កិច្ចប្រជុំកំពូលអាស៊ាន-អាម៉េរិក នៅក្នុងរដ្ឋកាលីហ្វ័រនីញ៉ា បានបញ្ចប់ទៅ បន្ទាប់ពីមានការលើកឡើង នូវទស្សនៈពីបណ្តាមេដឹកនាំចូលរួមនានា ដែលជម្រុញស្ថានភាពអនាគតពាណិជ្ជកម្ម និងការចូលរួមរក្សាសន្តិភាពក្នុងតំបន់ និងពិភពលោក ។ កិច្ចប្រជុំចំនួន ២ថ្ងៃនោះ បានចេញសេចក្តីថ្លែងការណ៍រួមគ្នាចំនួន ១៧ចំណុច ដែលបានលើកឡើងបង្ហាញពីចំណុចទំនាក់ទំនងយុទ្ធសាស្ត្រសម្រាប់អនាគត នៃការធ្វើពាណិជ្ជកម្មរវាងអាស៊ាន និងសហរដ្ឋអាម៉េរិក… បញ្ហាដោះស្រាយជម្លោះក្នុងសមុទ្ទចិន… ការគោរពទៅវិញទៅមកនូវអធិបតេយ្យភាព បូរណភាពទឹកដី សមភាព និងឯករាជ្យនយោបាយរបស់ប្រជាជាតិអាស៊ាន និងអាម៉េរិក… គាំទ្រធម្មនុញ្ញអាស៊ាន… ធម្មនុញ្ញអង្គការសហប្រជាជាតិ និងច្បាប់អន្តរជាតិផងដែរ ។
ប្រធានាធិបតីអាម៉េរិក លោក បារ៉ាក់ អូបាម៉ា បានបង្ហាញពីនយោបាយអាម៉េរិក ដែលរកតុល្យភាពសាឡើងវិញ ក្នុងតំបន់អាស៊ីប៉ាស៊ីហ្វិក និងប្រកាសថា សហរដ្ឋអាម៉េរិកនឹងបន្តដើរតួនាទីនៅក្នុងតំបន់អាស៊ីប៉ាស៊ីហ្វីកនេះវិញហើយ ។ សម្តេចតេជោ ហ៊ុន សែន បានសរសេរក្នុងហ្វេសប៊ុកថា កិច្ចប្រជុំមេដឹកនាំ អាស៊ាន-អាម៉េរិក បានប្រព្រឹត្តក្នុងស្មារតីសាមគ្កីភាព និងការទទួលខុសត្រូវ និងកិច្ចប្រជុំនេះ បានបញ្ចប់ទៅប្រកបដោយជោគជ័យ។ សម្តេចតេជោសែន បានមានប្រសាសន៍បន្តថា តាមរយៈកិច្ចប្រជុំកំពូល ២ថ្ងៃនេះ ភាពជាដៃគូយុទ្ឋសាស្ត្រត្រូវបានពង្រឹងថែមមួយកំរិតទៀត រវាងអាស៊ាន និងសហរដ្ឋអាម៉េរិក ។
