សាលារៀន ៤ខ្នង នៅតំបន់អារ៉ែង ខេត្តកោះកុង គ្រោងនឹងសម្ពោធដាក់ឲ្យប្រើប្រាស់ជាផ្លូវការ នៅដើមសប្ដាហ៍ក្រោយនេះហើយ ។
តំបន់អារ៉ែង មានចម្ងាយជិត ១០០គីឡូម៉ែត្រ ពីទីរួមខេត្តកោះកុង គឺជាតំបន់ដាច់ស្រយាលក្នុងព្រៃ ដែលមានចំនួន ៣ឃុំ គឺឃុំប្រឡាយ, ឃុំជំនាប់ និងឃុំថ្មដូនពៅ ស្ថិតក្នុងស្រុកថ្មបាំង ខេត្តកោះកុង ។ តំបន់អារ៉ែងដាច់ស្រយាល គឺជាតំបន់ដែលមានផ្លូវពិបាកធ្វើដំណើរ ខ្វះប្រពន្ធ័ទូរសព្ទ័ទំនាក់ទំនង ខ្វះចរន្តអគ្គិសនី និងខ្វះសាលារៀនជាដើម ។ នៅទីនោះប្រជាពលរដ្ឋខ្វះសាលារៀន… ខ្វះគ្រូបង្រៀន ដែលតម្រូវឲ្យសិស្សដែលមានចំនួនច្រើន ត្រូវផ្លាស់ប្ដូរគ្នា ២វេន ក្នុង១ថ្ងៃ ដើម្បីអាចចូលរៀនបានច្រើនថ្នាក់ ។
ដោយមើលឃើញពីការលំបាកចំពោះសិស្សថ្នាក់បឋមសិក្សាចំនួន ២៤៣នាក់ និងប្រជាពលរដ្ឋរួមទាំងអាជ្ញាធរដែនដីនៅទីនោះដែលខ្វះសាលារៀន ទើបនៅឆ្នាំ ២០១៥ ចលនាយុវជនកម្ពុជាក្រុម១៥៧ បានចុះពិនិត្យដោយផ្ទាល់ និងជួយសាងសង់សាលារៀនជូនចំនួន ៤ខ្នង ។ សាលារៀនទាំង ៤ខ្នង ស្ថិតក្នុងឃុំប្រឡាយ និងឃុំជំនាប់ ស្រុកថ្មបាំង ខេត្តកោះ សាងសង់ពីឥដ្ឋ ប្រក់សង្ក័សី និងមានបង្គន់អនាម័យត្រឹមត្រូវ មានអណ្ដូងទឹកស្អាតជាដើម ។
ក្នុងចំណោមសាលារៀនទាំង ៤ខ្នង មាន ៣ខ្នង ជាអំណោយរបស់សមាគមចលនាយុវជនកម្ពុជា (ក្រុម១៥៧) និង ១ខ្នងទៀត ជាអំណោយរបស់ប្រជាពលរដ្ឋខ្មែររស់នៅរដ្ឋកាលីហ្វរញ៉ា សហរដ្ឋអាមេរិក ។ ពិធីដាក់សម្ពោធឱ្យប្រើប្រាស់ជាផ្លូវការសាលារៀនទាំង៤ នឹងធ្វើនៅថ្ងៃទី២៩ ខែកុម្ភៈ ឆ្នាំ ២០១៦ ដើមសប្ដាហ៍ក្រោយនេះ ក្រោមអធិបតីភាព បណ្ឌិត ហ៊ុន ម៉ាណែត ដែលជាស្ថានិកចលនាយុវជនកម្ពុជាក្រុម១៥៧ ។
តំបន់អារ៉ែង គឺចាប់តាំងពីចលនាយុវជនកម្ពុជាក្រុម១៥៧ បានចុះទៅពិនិត្យ និងសាកសួរសុខទុក្ខប្រជាជននៅទី នោះមកក្រុមយុវជន១៥៧ ត្រូវគេឃើញបានសហការជាមួយប្រជាពលរដ្ឋនៅតំបន់នោះ ជួសជុលផ្លូវ ស្ពាន ជួយអណ្ដូងទឹក ម៉ាស៊ីនបូមទឹក គោយន្តភ្ជួរស្រែ គោយន្តដឹកជញ្ជូន និងការជួយវត្តអារាមផងដែរ ។