បេក្ខភាពបន្តវេនជានាយករដ្ឋមន្ត្រីមកពីគណបក្សប្រជាជនកម្ពុជា ឯកឧត្តមបណ្ឌិត ហ៊ុន ម៉ាណែត បង្រៀនអ្នកសារព័ត៌មានផ្សាយជាខេមរភាសា មានមូលដ្ឋាននៅអាមេរិកថា បើចង់បានវាយតម្លៃមួយត្រឹមត្រូវពីអត្តចរិត របស់លោក គួរតែទៅសម្ភាសន៍ ឬសាកសួរអ្នកដែលធ្លាប់ស្គាល់លោក ដូចជា គ្រូបង្រៀនរបស់លោកជាដើម មិនគួរទៅសម្ភាសន៍ ឬសួរអ្នកនៅចម្ងាយរាប់ពាន់ គីឡូម៉ែត្រ និងមិនដែលជួបលោកនោះទេ។
ការបង្ហាញពីរបៀបយកព័ត៌មានមួយបានល្អប្រសើរនេះ បានធ្វើឡើងបន្ទាប់ពីវិទ្យុអាស៊ីសេរី បានធ្វើបទសម្ភាសន៍មួយជាមួយព្រះតេជគុណ ហុក សាវណ្ណ ព្រះសង្ឃគង់នៅប្រទេសកាណា ជុំវិញអត្តចរិតរបស់ឯកឧត្តមបណ្ឌិត ហ៊ុន ម៉ាណែត កាលពីពេលកន្លងទៅ។
ពាក់ព័ន្ធការវិភាគអំពីអត្តចរិតដោយព្រះតេជគុណ ហុក សុវណ្ណ, ឯកឧត្តមបណ្ឌិត ហ៊ុន ម៉ាណែត មិនបានតបនោះទេ ដោយលោកបញ្ជាក់ថា លោកគោរពនូវសិទ្ធិសេរីភាពនៃការបញ្ចេញមតិរបស់ព្រះអង្គ និងគោរពជាសង្ឃមានការសិក្សារៀនសូត្រមួយអង្គ។ ឯកឧត្តមបណ្ឌិត ហ៊ុន ម៉ាណែត បានសន្និដ្ឋានថា គោលបំណងនៃការសម្ភាសន៍នេះ គឺអ្នកសម្ភាសន៍ចង់ឱ្យលោកប្រឈមមុខជាមួយនឹងព្រះសង្ឃ។
តាមរយៈវីដេអូបង្ហោះលើបណ្តាញសង្គមហ្វេសប៊ុក នៅរសៀលថ្ងៃទី២៨ ខែតុលា ឆ្នាំ២០២២នេះ ឯកឧត្តមបណ្ឌិត ហ៊ុន ម៉ាណែត បានគូសបញ្ជាក់ថា «ខ្ញុំមិនឆ្លើយតបព្រះអង្គដោយសារខ្ញុំគោរព មិនដូចបុគ្គលនយោបាយមួយចំនួន វាយប្រហារគ្មានហេតុផល។ ទោះបីជាការវិភាគទស្សនៈរបស់ព្រះអង្គ ខ្ញុំមិនឯកភាពលើការវិភាគទាំងនោះ ប៉ុន្តែខ្ញុំគោរពនូវសិទ្ធិបញ្ចេញទស្សនៈ របស់ព្រះអង្គ ព្រោះព្រះអង្គជាអ្នកចេះដឹងមួយអង្គហើយ អ្នកដែលចង់ឱ្យខ្ញុំឆ្លើយតបតតាំងជាមួយព្រះតេជគុណ កុំអន់ចិត្តអី ព្រោះខ្ញុំមិនឆ្លើយតបទេ ដោយសារការគោរព»។
បេក្ខជននាយករដ្ឋមន្ត្រីបន្តវេន ដែលមានចំណេះទាំងខាងយោធា សេដ្ឋកិច្ច និងនយោបាយពោរពេញដោយថាមពលរូបនេះ បានបន្ថែមថា «ព្រះតេជគុណចង់មានទស្សនៈបែបណា សម្រាប់ខ្ញុំអត់សំខាន់ទេ ព្រោះជាសិទ្ធិរបស់ព្រះអង្គ។ សម្រាប់ខ្ញុំ ខ្ញុំនៅតែជាខ្ញុំ។ ខ្ញុំនឹងជឿទៅលើអ្វីដែលខ្ញុំគិតថាត្រឹមត្រូវ ហើយខ្ញុំនឹងបន្តធ្វើការងារដែលខ្ញុំគិតថាត្រឹមត្រូវ ដោយខ្ញុំទទួលខុសត្រូវនូវសកម្មភាពរបស់ខ្ញុំ»។
ជាមួយការបញ្ជាក់ជំហរមិនតបតទៅនឹងព្រះតេជគុណ ហុក សាវណ្ណ ហើយនោះ ឯកឧត្តមបណ្ឌិត ហ៊ុន ម៉ាណែត ក៏បានឆ្លៀតបង្រៀនរបៀបយកព័ត៌មានបានល្អទៅអ្នកសារព័ត៌មាន «ឌឹ ខេមបូឌា ដេលី» ផងដែរ។ លោកបណ្ឌិត បានបង្រៀនថា ប្រសិនបើចង់បានព័ត៌មានមួយត្រឹមត្រូវ និងច្បាស់លាស់ពាក់ព័ន្ធនឹងអត្តចរិតរបស់លោក គួរទៅសួរអ្នកដែលស្គាល់លោក ដូចជាគ្រូធ្លាប់បង្រៀនលោក ឬសាលាដែលលោកធ្លាប់រៀនជាដើម។
ឯកឧត្តមបណ្ឌិត ហ៊ុន ម៉ាណែត បានបង្ហាញពីបច្ចេកទេសយកព័ត៌មានបានល្អបែបនេះ «ខ្ញុំសូមផ្តាំ និងជូនយោបល់ទៅ [ឌឹ ខេមបូឌា ដេលី] ឬអ្នកព័ត៌មានមួយចំនួនដែលចង់វិភាគប្រធានបទអំពីអត្តចរិតរបស់ខ្ញុំ បើអ្នកចង់ធ្វើការស្រាវជ្រាវ ធ្វើការផ្សាយព័ត៌មានដោយសុក្រឹត ឱ្យគ្រប់ជ្រុងជ្រោយដោយមិនមានចេតនាលំអៀង សូមស្រាវជ្រាវតាមវិជ្ជាជីវៈរបស់ខ្លួន។ គេមិនដែលសួរមនុស្សម្នាក់ដែលមិនដែលស្គាល់គ្នា ឱ្យវាយតម្លៃមនុស្សម្នាក់ទេ»។
ឯកឧត្តមបណ្ឌិតបន្តថា «ខ្ញុំជូនយោបល់ បើចង់ដឹងអត្តចរិតខ្ញុំបែបណា តើធម្មជាតិខ្ញុំពីក្មេងបែបណា គួរទៅសួរគ្រូខ្ញុំ សួរចាស់ៗដែលស្គាល់ខ្ញុំពីក្មេង សួរគ្រូបឋមរបស់ខ្ញុំ សួរគ្រូមធ្យមរបស់ខ្ញុំថា ម៉ាណែតហ្នឹង សិស្សយ៉ាងម៉េច? សិស្សព្រហើនកោងកាច ទំនើងតាំងពីក្មេង ឬមួយសិស្សសុភាពស្លូតបូតសុភាពរាបសាយ៉ាងម៉េច?»។
ជាមួយនឹងការឆ្លើយតបជុំវិញការសម្ភាសន៍ពាក់ព័ន្ធអត្តចរិតរបស់លោកហើយនោះ ឯកឧត្តមបណ្ឌិត ហ៊ុន ម៉ាណែត ក៏បានកត់សម្គាល់ផងដែរថា ចាប់តាំងពីលោកត្រូវបានបក្សប្រជាជនកម្ពុជា ជ្រើសតាំងជាបេក្ខភាពនាយករដ្ឋមន្ត្រីបន្តវេន គឺលោកបានក្លាយទៅជាបាវសាក់របស់ក្រុមជំទាស់វាយយ៉ាងខ្លាំងក្លា។ លោកបណ្ឌិត បានលើកការប្រៀបធៀបមួយថា ដើមឈើដែលកាន់តែខ្ពស់ គឺត្រូវខ្យល់បោកបក់កាន់តែខ្លាំង។ លោកបណ្ឌិតចាត់ទុកការបោកបក់ មិនអាក្រក់ទេ ព្រោះធ្វើឱ្យឈើនោះកាន់តែរឹងមាំ។
ឯកឧត្តមបណ្ឌិត បានសន្និដ្ឋានថា ការប្រឌិតរឿងវាយប្រហារជាច្រើនលើរូបលោក គឺមានគោលដៅពីរ ដែលជាយុទ្ធសាស្ត្រនយោបាយចំណេញ-ចំណេញ។ លោកបណ្ឌិត បានគូសបញ្ជាក់ថា បើលោកមិនតប គេនឹងបន្តនិយាយរហូតដល់អ្នកស្តាប់យល់ច្រឡំ ឬគិតថា រឿងដែលគេនិយាយជាការពិត។ ប៉ុន្តែបើលោកតប គេនឹងចោទថាលោកឆេវឆាវ គេនិយាយប៉ះបន្តិចបន្តួចមិនបាន។
ឯកឧត្តមបណ្ឌិត ក៏បានគូសរំលេចដែរថា អ្នកប្រឹងវាយប្រហាររូបលោក គឺសុទ្ធតែអ្នកចង់បានការឆ្លើយតបពីរូបលោក ដើម្បីមានប្រជាប្រិយភាព។ តែលោកមិនមានពេលទំនេរចេះតែឆ្លើយតបនោះទេ ព្រោះលោករវល់ និងមមាញឹកការងារបម្រើជាតិខ្លាំងណាស់ សូម្បីតែថ្ងៃខួបកំណើតរបស់លោក ក៏មិនមានពេលជួបជុំជាមួយភរិយា និងកូនៗនោះដែរ៕
