សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី៣០ ខែធ្នូ ឆ្នាំ២០២២នេះ បន្តអំពាវនាវឲ្យប្រជាពលរដ្ឋ ចូលរួមប្រយុទ្ធប្រឆាំងនឹងជំងឺកូវីដ១៩ ជាពិសេសទៅទទួលយកវ៉ាក់សាំងដូសជំរុញ ដើម្បីបង្កើតភាពសុំាក្នុងខ្លួន ការពារទុកជាមុនពីជំងឺកូវីដ១៩ ដែលអាចនឹងបំប្លែងខ្លួនថ្មីៗថែមទៀត។
ការអំពាវនាវរបស់សម្តេចតេជោ ហ៊ុន សែន ធ្វើឡើងក្នុងឱកាសអញ្ជើញបើកការដ្ឋានស្តារ និងលើកកម្រិតគុណភាពផ្លូវពីរខ្សែទៀត ស្ថិតក្នុងភូមិសាស្ត្រខេត្តកំពត និងខេត្តកែប នាព្រឹកថ្ងៃទី៣០ ខែធ្នូ ឆ្នាំ២០២២។
សម្តេចតេជោ ហ៊ុន សែន បានថ្លែងថា «សូមបងប្អូនប្រជាពលរដ្ឋរបស់យើង ប្រុងប្រៀបខ្លួនទទួលយក កិច្ចការពារជាមុន ល្អជាងទុកឲ្យវាកើតហើយ ទើបដោះស្រាយវា នោះចាំបាច់ណាស់ ត្រូវតែមានភាពសុំាក្នុងខ្លួនជានិច្ច ទើបអាចទប់ទល់ជាមួយមេរោគ ដ៏អាក្រក់ គឺកូវីដ១៩ ដែលមានកំពុងតែមានវត្តមាន ក្នុងតំបន់របស់យើង ហើយវាក៏មានវត្តមានក្នុងប្រទេសរបស់យើងដែរ […] ទោះបីអូមីក្រុងក៏ដោយ ក៏វាអាចសម្លាប់យើងដែរ បើយើងអត់មានភាពសុំាក្នុងខ្លួន អីចឹងទេបានជាយើងត្រូវប្រើប្រាស់ ជាបន្តនូវការចាក់វ៉ាក់សាំង»។
សម្តេចតេជោនាយករដ្ឋមន្ត្រី បានសម្រេចរៀបចំនូវការចាក់វ៉ាក់សាំងដូសទី៤ សម្រាប់កុមារអាយុ៣ឆ្នាំ ដល់ ៥ឆ្នាំ, ចាក់ដូសជំរុញទី៥ ដល់កុមារអាយុពី ៥ឆ្នាំ ដល់ក្រោម ១២ឆ្នាំ និងចាក់ដូសជំរុញទី៦ មន្ត្រីរាជការជួរមុខ អាជ្ញាធរ និងប្រជាជនទូទៅ។
សម្តេចបន្ថែមថា បច្ចុប្បន្នមានមនុស្សមួយចំនួន បានចាក់ដល់ដូសទី៦រួចហើយ ប៉ុន្តែដោយសាររាជរដ្ឋាភិបាលមិនទាន់បានសម្រេច ទើបពួកគាត់មិនទាន់ហ៊ានចុះបញ្ជី សម្រាប់ការចុះដូសទី៦។ ជាមួយគ្នានេះ សម្តេចតេជោក៏បានប្រកាសកំណត់គម្លាត ៦ខែ ក្នុងការចាក់វ៉ាក់សាំងដូសជំរុញបន្តបន្ទាប់។
សម្តេចបន្ថែមទៀតថា «អ្វីដែលយើងត្រូវយកជាគោល ត្រូវចាក់ទៅជាទម្លាប់ធម្មតា ដោយប្រសិទ្ធភាពវ៉ាក់សាំង មានរយៈពេល៦ខែ ក្រោយរយៈពេល៦ខែ ត្រូវចាប់ផ្តើមចាក់វ៉ាក់សាំងតទៅទៀត បើទោះបីជាប្រទេសផ្សេងៗធ្វើខុសគ្នា ប៉ុន្តែការចាក់វ៉ាក់សាំងដើម្បីការពារខ្លួន ពីរោគរាតត្បាតនេះ វាជាការចាំបាច់ដើម្បីធ្វើ»។
សូមជម្រាបថា គិតត្រឹមថ្ងៃទី២៩ ខែធ្នូ ឆ្នាំ២០២២ រាជរដ្ឋាភិបាល បានចាក់វ៉ាក់សាំងការពារកូវីដ១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ១៥,២៤១,៣៧៦នាក់។ ក្នុងនោះរួមមាន៖
១៖ ចាប់ពីអាយុ១៨ឆ្នាំឡើង ១០,៣៨១,១៩៦នាក់
២៖ ចាប់ពីអាយុ១២ដល់១៨ឆ្នាំ ១,៨៤៩,៤៣៥នាក់
៣៖ ចាប់ពីអាយុ០៦ដល់១២ឆ្នាំ ២,០៩៤,៩៨៩នាក់
៤៖ អាយុ៥ឆ្នាំ ៤២៨,៥៩៣នាក់
៥៖ អាយុ៣ឆ្នាំដល់៥ឆ្នាំ ៤៨៧,១៦២នាក់
ដោយឡែកសម្រាប់អ្នកបានចាក់ដូសទី៣ចំនួន ១០,៤២៣,០៤៣នាក់, ដូសទី៤ចំនួន ៤,៧៦៤,១២៣នាក់ និងដូសទី៥ចំនួន ១,២២៥,០៦៦នាក់៕
