កុមារពិការ និងផ្ទុកមេរោគអេដស៏ជាង១០០នាក់ បានទទួលអំណោយពីកាកបាទក្រហមកម្ពុជានារសៀលថ្ងៃទី ១៦ មីនា ឆ្នាំ ២០១៦ នេះ។ ការចុះចែកអំណោយទាំងនេះ ធ្វើឡើងដោយក្រុមការងារសាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោកជំទាវ ឡោក ខេង ។
លោកជំទាវ ឡោក ខេង អនុប្រធានគណៈកម្មាធិការសាខា បានអញ្ជើញចុះសួរសុខទុក្ខកុមារកំព្រា ចំនួន ១១០នាក់ ក្នុងនោះមានកុមារពិការ ៩០នាក់… និងកុមាររស់នៅជាមួយមេរោគអេដស៍-ជំងឺអេដស៍ ១៩នាក់ ដែលរស់នៅក្នុងមណ្ឌលកុមារកំព្រាបុរីទារក និងកុមារជាតិ រាជធានីភ្នំពេញ ។
បន្ទាប់ពីប្រសាសន៍សំណេះសំណាលដែលបានពាំនាំនូវការសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជារួចមក អំណោយដែលរួមមានម្សៅបំប៉នសុខភាពរបស់មូលនិធិខ្មែរអភិវឌ្ឍ សម្តេចអគ្គមហាធម្មពោធិសាល ជា ស៊ីម ដែលបានផ្តល់ឲ្យពីមូលនិធិកាឡូគ្រីស ដែលមានទីតាំងនៅសហរដ្ឋអាមេរិក ចែកជូនកុមារក្នុងមណ្ឌលជាលើកទី៦ ផងដែរ ។
