កម្ពុជាអបអរចិនបង្ហូរទឹកចូលទន្លេមេគង្គ


Mekong River 17 03 16 2 copy

     ប្រទេស​ទន្លេ​មេគង្គ​ក្រោម​ដែល​រង​ភាព​ខ្វះ​ទឹក បាន​សម្តែង​ក្តី​រីក​រាយ ដោយ​សារ​ប្រទេស​ចិន​បាន​បើក​ទំនប់​ទឹក​វារី​អគ្គិសនី ជីង ហុង នៃ​ខេត្ត​យូ​ណាន បង្ហូរ​ចុះ​ឱ្យ​ប្រើ​ប្រាស់ ។ ប្រទេស​ទន្លេ​មេគង្គ​ក្រោម​ដែល​ទទួល​បាន​ទឹក​បង្ហូរ ​រួម​មានៈ ប្រទេស​ឡាវ ថៃ វៀត​ណាម និង​កម្ពុជា ។

     ព័ត៌មាន​នៃ​ការ​បង្ហូរ​ទឹក​ប្រើ​ប្រាស់​នេះ បាន​ឱ្យ​ដឹង​តាម​មន្ត្រី​អ្នក​នាំ​ពាក្យ​ចិន និង​បាន​ទទួល​ការ​អបអរ​សាទរ​ពី​ប្រទេស​ដែល​ស្ថិត​នៅ​ភាគ​ខាង​ក្រោម​ទន្លេ​មេគង្គ ។ យោង​តាម​​ព័ត៌មាន​ដែល​ប្រកាស ការ​បង្ហូរ​ទឹក​ឱ្យ​ប្រទេស​នៅ​ខាង​ក្រោម​នេះ បាន​ធ្វើ​ចាប់​ពី​ថ្ងៃ​ទី១៥ ខែ​មីនា រហូត​ដល់​ថ្ងៃ​ទី១០ ខែ​មេសា ឆ្នាំ ២០១៦ ។

     ក្រសួង​ការ​បរទេស​កម្ពុជា បាន​ចេញ​សេចក្តី​ប្រកាស​ព័ត៌មាន​មួយ​នៅ​ថ្ងៃ​នេះ ស្វា​គមន៍​ចំពោះ​ការ​បង្ហូរ​ទឹក​នោះ និង​ចាត់​ទុក​ថា ការ​បង្ហូរ​ទឹក​ចូល​មក​ទន្លេ​មេគង្គ បាន​បង្ហាញ​ជា​ថ្មី​ម្តង​ទៀត ពី​កិច្ច​​​សហ​ប្រតិបត្តិ​ការ​ល្អ​លើ​ការ​គ្រប់​គ្រង​ធន​ធាន​ទឹក រវាង​បណ្តា​ប្រទេស​មេគង្គ និង​ចិន​ ដែល​ជា​ផ្នែក​មួយ​ដ៏សំខាន់​នៃ​យន្ត​ការ​កិច្ច​សហ​ប្រតិបត្តិ​ការ​មេគង្គ-ឡាន​ឆាង ។

     គួរ​កត់​សម្គាល់​ថា ការ​បង្ហូរ​នេះ​ គឺ​លើក​ទី២ ហើយ​ក្នុង​ឆ្នាំ ២០១៦​នេះ ដែល​ការ​បង្ហូរ​ទឹក​លើក​​ទី១ ចំនួន​ ២ពាន់ ៣០០​លាន​ម៉ែត្រ​គូប បាន​ធ្វើ​រវាង​ពី​ខែ​មករា ដល់​ ខែ​កុម្ភៈ ឆ្នាំ ២០១៦ ដោយ​ការ​បង្ហូរ​នោះ ត្រូវ​គេ​ចាត់​ទុក​ថា​ជួយ​សម្រាល​ផល​ប៉ះ​ពាល់​ដែល​បណ្តាល​មក​ពី​គ្រោះ​រាំង​ស្ងួត ។

Mekong River 17 03 16 3 copy