រាជរដ្ឋាភិបាលកម្ពុជា កំពុងសិក្សាលទ្ធភាពបើកឲ្យភ្ញៀវទេសចរថៃ អាចចូលមកកម្សាន្ដនៅក្នុងប្រទេសកម្ពុជា ដោយមិនចាំបាច់ប្រើប្រាស់លិខិតឆ្លងដែន ពោលប្រើប្រាស់ត្រឹមប័ណ្ណព្រំដែន ឬ Border Pass។
នេះជាការលើកឡើងរបស់ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅព្រឹកថ្ងៃទី០៤ ខែតុលា ឆ្នាំ២០២៣ ក្នុងឱកាសអញ្ជើញរួមពិធី បិទវគ្គសុក្រឹតការថ្នាក់ដឹកនាំនគរបាល កម្រិត២ ជំនាន់ទី៤ និងវគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៧ លើកទី២ នៅបណ្ឌិត្យសភានគរបាលកម្ពុជា។
ឧបនាយករដ្ឋមន្ដ្រី ស សុខា បានថ្លែងយ៉ាងដូច្នេះថា «រាជរដ្ឋាភិបាលកម្ពុជា តាមការសំណូមពររបស់នាយករដ្ឋមន្ដ្រីថៃ កំពុងគិតគូរក្នុងការបើកទេសចរណ៍កម្រិតណាមួយនោះ ដោយមិនចាំបាច់ប៉ាស្ព័រ (លិខិតឆ្លងដែន) ត្រឹម Border Pass»។
បើតាមឧបនាយករដ្ឋមន្ដ្រី ស សុខា, ការប្រើប្រាស់ប័ណ្ណព្រំដែន ឬ Border Pass កំពុងតែអនុវត្តស្រាប់ហើយនៅពេលបច្ចុប្បន្ននេះ ប៉ុន្ដែជនជាតិថៃ អាចចូលមកកម្ពុជាត្រឹមតែខេត្តជាប់ព្រំដែនតែប៉ុណ្ណោះ មិនអាចចេញហួសការកំណត់នេះបានឡើយ។
ប៉ុន្ដែទោះជាយ៉ាងណា នេះគ្រាន់តែជាលទ្ធភាពដែលត្រូវយកមកសិក្សាប៉ុណ្ណោះ ហើយការសម្រេចយ៉ាងណានោះ រង់ចាំគ្រប់ភាគីពាក់ព័ន្ធពិភាក្សាគ្នានៅពេលក្រោយ។ នេះជាអ្វីដែលលោកអភិសន្ដិបណ្ឌិត ស សុខា បានគូសបញ្ជាក់បន្ថែម។
យោងតាមរបាយការណ៍របស់ក្រសួងទេសចរណ៍ បានបង្ហាញថា ក្នុងរយៈពេល៨ខែ ឆ្នាំ២០២៣នេះ ចំនួនភ្ញៀវទេសចរថៃមកកម្សាន្ដនៅប្រទេសកម្ពុជា មានជាង១លាននាក់។ ចំនួននេះមានការកើនឡើង បើធៀបរយៈពេលដូចគ្នាទៅនឹងឆ្នាំ២០២២។
សូមជម្រាបថា សព្វថ្ងៃនេះប្រជាពលរដ្ឋកម្ពុជា និងថៃ ដែលរស់នៅក្នុងខេត្តជាប់ព្រំដែនប្រទេសទាំងពីរ អាចធ្វើដំណើរចេញចូលទៅវិញទៅមកបាន ដោយមិនចាំបាច់ប្រើប្រាស់លិខិតឆ្លងដែនោះទេ ពោលប្រើប្រាស់ត្រឹមប័ណ្ណព្រំដែន ឬ Border Pass ប៉ុណ្ណោះ ប៉ុន្ដែប័ណ្ណព្រំដែននេះ អនុញ្ញាតឲ្យប្រើប្រាស់ក្នុងពេលកំណត់ណាមួយមិនអចិន្ដ្រៃយ៍នោះទេ៕
