កម្ពុជានិងរុស្ស៊ី នៅថ្ងៃ ២៩ ខែមីនានេះ បានឯកភាពគ្នាលើ ១០ចំណុច ក្នុងកិច្ចប្រជុំលើកទី៩ នៃគណៈកម្មការអន្តររដ្ឋាភិបាលកម្ពុជា-រុស្ស៊ី សម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស។
កម្ពុជាកំពុងតំរង់ទិសដៅការអភិវឌ្ឍន៍ប្រទេស ដោយការបង្កើនកិច្ចសហប្រតិបត្តិការសេដ្ឋកិច្ច ជាមួយនឹងអង្គការនៃប្រទេសមហាអំណាចនានា ក្នុងនោះរួមមានទាំងប្រទេសរុស្ស៊ីដែរ និងកំពុងជម្រុញការចូលជាសមាជិកអង្គការកិច្ចសហប្រតិបត្តិការសៀងហៃ… និងសហភាពសេដ្ឋកិច្ចអឺរ៉ាស៊ី ផងដែរ ។ កិច្ចប្រជុំរវាងតំណាងប្រទេសទាំង២ នៅថ្ងៃអង្គារ៍ទី២៩ ខែមីនានេះ បានធ្វើរវាងរដ្ឋមន្ត្រីក្រសួងការបរទេសកម្ពុជា ឯកឧត្តមឧបនាយករដ្ឋមន្ត្រី ហោ ណាំ ហុង ជាមួយនឹងរដ្ឋមន្ត្រីក្រសួងគមនាគមន៍ និងព័ត៌មាននៃសហព័ន្ធរុស្ស៊ី ឯកឧត្តម នីកូឡៃ នីគីហ្វូរ៉ូហ្វ ដែលកំពុងបំពេញទស្សនកិច្ចនៅកម្ពុជា ។
ក្រសួងការបរទេសកម្ពុជា បានចេញសេចក្តីប្រកាសព័ត៌មានបញ្ជាក់ថា គណៈកម្មការបានពិភាក្សាលើបញ្ហាជាច្រើន នៃទំនាក់ទំនងទ្វេភាគី រួមមានៈ បញ្ហាសន្តិសុខ និងការអនុវត្តច្បាប់… បច្ចេកទេសយោធា ពាណិជ្ជកម្ម និងការវិនិយោគទេសចរណ៍ កសិកម្ម ព័ត៌មានវិទ្យា អាកាសចរណ៍ស៊ីវិល វិទ្យាសាស្ត្រ អប់រំ និងវប្បធម៌សុខាភិបាល និងថាមពល ។ យោងតាមសេចក្តីជូនព័ត៌មាន កិច្ចប្រជុំលើកទី១០នៃគណៈកម្មការអន្តររដ្ឋាភិបាលកម្ពុជារុស្ស៊ីភាគីរុស្ស៊ី គ្រោងនឹងធ្វើនៅប្រទេសរុស្ស៊ីវិញនៅឆ្នាំ ២០១៧ ។ នៅទន្ទឹមនឹងនេះដែរ សេចក្តីជូនព័ត៌មានដដែលបានអោយដឹងដែរថា ភាគីរុស្ស៊ីនឹងរង់ចាំស្វាគមន៍ទស្សនកិច្ចការងាររបស់ សម្តេចតេជោសែន ទៅកាន់ក្រុងមូស្គូនៅខែឧសភា ឆ្នាំ ២០១៦ ខាងមុខនេះ ។
