តំណាងឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ដឹកនាំដោយឯកឧត្តមបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា និងសហការី នាថ្ងៃទី២៩ ខែកក្កដា ឆ្នាំ២០២៥ នេះបានចុះពិនិត្យទីតាំងបងប្អូនជនភៀសសឹក និងបានរៀបចំតបណ្តាញអគ្គិសនី និងអំពូលបំភ្លឺនៅទីតាំងបងប្អូនជនភៀសសឹក ដែលរងគ្រោះពីសង្គ្រាមនៅតំបន់បាត់ថ្កៅ ស្រុកចុងកាល់ ខេត្តឧត្តរមានជ័យ ដើម្បីសម្រួលដល់ការរស់នៅ ការប្រើប្រាស់ក្នុងពេលស្នាក់នៅ បណ្តោះអាសន្ននៅទីសុវត្ថិភាពដល់ប្រជាពលរដ្ឋ និងសម្រួលដល់សន្តិសុខសណ្តាប់ធ្នាប់។
ជាមួយគ្នានេះ អគ្គិសនីកម្ពុជា បន្តរៀបចំដល់តំបន់បងប្អូនភៀសសឹកផ្សេងៗទៀត ដែលមានគោលការណ៍ដូចគ្នា។
បន្ថែមពីនេះប្រតិភូអគ្គិសនីកម្ពុជា ក៏បានចុះសួរសុខទុក្ខកងកម្លាំងក្នុងកងពល និងបងប្អូនយុទ្ធជនផ្សេងទៀត ដែលកំពុងសម្រាកព្យាបាលនៅមន្ទីរពេទ្យ និងនាំយកអំណោយជាសម្ភារៈ គ្រឿងឧបភោគ-បរិភោគ និងថវិកា ជូនដល់កងពលតូចថ្មើជើងលេខ៤២ និងវរសេនាតូចលេខ៧០២ និងកងពលតូចអន្តរាគមន៍លេខ១៤ ដែលកំពុងឈរជើងការពារបូរណភាពទឹកដី។
ព្រមទាំងបាននាំនូវការផ្ដាំផ្ញើសាកសួរសុខទុក្ខ ពីសំណាក់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ និងថ្នាក់ដឹកនាំនិយោជិតកម្មករទាំងអស់របស់អគ្គិសនីកម្ពុជា ដែលជានិច្ចកាលលោកតែងតែគិតគូរ ពីសុខទុក្ខរបស់បងប្អូនកងកម្លាំងរបស់យើង នៅគ្រប់កាលៈទេសៈទាំងអស់ ដោយបង្ហាញអំពីការសាមគ្គីភាព រវាងសមរភូមិក្រោយ និងសមរភូមិមុខ។
បន្ថែមពីនេះឯកឧត្តមបណ្ឌិត បានជម្រាបជូនអំពីសភាពការនៅសមរភូមិមុខ និងកិច្ចខិតខំប្រឹងប្រែងរបស់រាជរដ្ឋាភិបាលក្នុងការចរចា រកសន្តិភាពបញ្ចប់សង្គ្រាម ហើយសង្ឃឹមថា បងប្អូនប្រជាពលរដ្ឋអាចនឹងវិលត្រឡប់ ទៅលំនៅដ្ឋានវិញក្នុងពេលឆាប់ៗនេះ៕
