សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី២០ ខែតុលា ឆ្នាំ២០២៥នេះ បានបញ្ជាក់ឲ្យដឹងថា អាកាសយានដ្ឋានអន្តរជាតិតេជោ (TIA) លំដាប់ថ្នាក់ 4F ក្រុងតាខ្មៅ ខេត្ដកណ្ដាល នឹងរៀបចំទៅជាមជ្ឈមណ្ឌលភស្ដុភារកម្ម ដូច្នេះសេវាកម្មគយ ឬនីតិវិធី ត្រូវកាត់បន្ថយ ដោយរកបទពិសោធន៍ប្រទេសមួយចំនួន ខណៈក្រុមហ៊ុនឯកជនទាំងអស់ ត្រូវមានការបញ្ចុះតម្លៃដល់អ្នកធ្វើដំណើរ ដើម្បីឲ្យព្រលានយន្ដហោះ ទទួលបានអ្នកដំណើរកាន់តែច្រើន។
ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល សម្ដេចបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីភាព សម្ពោធដាក់ឲ្យប្រើប្រាស់ជាផ្លូវការ អាកាសយានដ្ឋានអន្តរជាតិតេជោ នាព្រឹកថ្ងៃទី២០ ខែតុលា ឆ្នាំ២០២៥នេះ។
សម្ដេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «យើងចង់រៀបចំកន្លែងនេះ (អាកាសយានដ្ឋានអន្ដរជាតិតេជោ) ទៅជាមជ្ឈមណ្ឌលភស្ដុភារកម្មមួយ ចឹងត្រូវទាក់ទង ជាមួយនឹងនីតិវិធី ក្នុងការឆ្លងកាត់ធ្វើឲ្យកាន់តែមានប្រសិទ្ធភាព កន្លងទៅមានក្រុមហ៊ុនភស្ដុភារកម្មខ្នាតយក្សរបស់អន្ដរជាតិមួយ មកសិក្សានៅទីនេះ ចឹងដើម្បីឲ្យកន្លែងនេះ ទៅជាភស្ដុភារកម្ម ទាល់តែសេវា និងនីតិវិធីគយ បានលឿន និងប្រសិទ្ធភាព»។
ទន្ទឹមគ្នានេះ សម្ដេចបវរធិបតី ហ៊ុន ម៉ាណែត ក៏បានកោតសរសើរ ដល់អគ្គនាយកដ្ឋានអន្ដោប្រវេសន៍ ដែលកែសម្រួល និងកាត់បន្ថយនីតិវិធី នៃការប្រើប្រាស់ក្រដាស មកប្រើប្រាស់ប្រព័ន្ធបច្ចេកវិទ្យា។
សម្ដេចបវរធិបតី ហ៊ុន ម៉ាណែត បានណែនាំឲ្យអគ្គនាយកដ្ឋានគយ និងរដ្ឋាករកម្ពុជា ត្រូវសិក្សាដកពិសោធន៍កាត់បន្ថយនីតិវិធី នៅអាកាសយានដ្ឋានអន្ដរជាតិតេជោ។ ជាមួយគ្នានេះ សម្ដេចបវរធិបតី ក៏បានណែនាំឲ្យកាត់បន្ថយតម្លៃ ក្នុងការដាក់បន្ទុកដល់អ្នកដំណើរផងដែរ។
បន្ថែមពីនេះ សម្ដេចបវរធិបតី ហ៊ុន ម៉ាណែត បានលើកឡើងថា ក្រុមហ៊ុនឯកជនទាំងអស់ កុំដាក់បន្ទុកតម្លៃបន្ថែម នៅព្រលានយន្ដហោះ ដូច្នេះរដ្ឋលេខាធិការដ្ឋានអាកាសចរណ៍ស៉ីវិល និងក្រសួងសេដ្ឋកិច្ច ត្រូវធ្វើការជាមួយវិស័យឯកជន។ សម្ដេចបវរធិបតី បានថ្លែងថា ព្រលានយន្ដហោះ ដែលជាប់លេខខ្ពស់បំផុត គឺមានអ្នកដំណើរច្រើន និងពួកគាត់សប្បាយចិត្ត។
សូមជម្រាបថា អាកាសយានដ្ឋានអន្តរជាតិតេជោ មានផ្ទៃដីដ៏ល្វឹងល្វើយជាង ២ ៦០០ហិកតា ជាប្រភេទព្រលានយន្តហោះខ្នាតធំ ប្រភេទ 4F ដែលអាចស្រូបយក និងទទួលបានការហោះហើរ ពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។
បើតាមលោកអ្នកឧកញ៉ាបណ្ឌិត ពុង ឃាវសែ ប្រធានក្រុមប្រឹក្សាភិបាលក្រុមហ៊ុន ខេមបូឌា អ៊ែរផេត អ៊ុនវេសមិន ឯ.ក (CAIC), ការវិនិយោគសាងសង់ អាកាសយានដ្ឋានអន្តរជាតិតេជោ (TIA) ដំណាក់កាលទី១ ចំណាយអស់ទឹកប្រាក់ប្រមាណ២,៣០០លានដុល្លារសហរដ្ឋអាមេរិក។
ការចំណាយនេះ ដោយរួមបញ្ចូលចំណាយ សាងសង់ស្ថានីយ៍អ្នកដំណើរ ស្ថានីយ៍អ្នកដំណើរពិសេស (VVIP Terminal) ទីលានចុះចតយន្តហោះ អគារ និងហេដ្ឋារចនាសម្ព័ន្ធទ្រទ្រង់ ប្រតិបត្តិការអាកាសយានដ្ឋាន រួមមាន៖ ផ្លូវ ស្ពានអាកាស ឃ្លាំងទំនិញ ចំណាយហិរញ្ញប្បទាន និងចំណាយសម្រាប់ការផ្ទេរប្រតិបត្តិការពីអាកាស យានដ្ឋានអន្តរជាតិភ្នំពេញ មក TIA។
អាកាសយានដ្ឋានអន្តរជាតិតេជោ ត្រូវបានសាងសង់បីដំណាក់កាល ដោយដំណាក់កាលទី១ មានសមត្ថភាពអាចទទួលអ្នកដំណើរ បាន១៥លាននាក់ ក្នុងមួយឆ្នាំ។ ដំណាក់កាលទី២ អាចទទួលអ្នកដំណើរ បាន៣០លាននាក់ ក្នុងមួយឆ្នាំ និងដំណាក់កាលទី៣ អាចទទួលអ្នកដំណើរ បាន៥០លាននាក់ ក្នុងមួយឆ្នាំ។
បើយោងតាមការវាយតម្លៃ របស់អាកាសចរណ៍ស៊ីវិល ព្រលានហោះយន្ដអន្ដរជាតិតេជោនេះ បានជាប់ចំណាត់ថ្នាក់លេខ៩ ក្នុងពិភពលោក ក្នុងចំណោមព្រលានយន្តហោះប្រភេទ 4F។ ជាមួយគ្នានេះ ព្រលានយន្តហោះនេះ បានក្លាយជាស្ថាបត្យកម្មដ៏មានឥទ្ធិពល ក្នុងចំណោមស្ថាបត្យកម្មចំនួន១១ លើពិភពលោកផងដែរ៕
