ក្រុមមន្ត្រីកម្ពុជា និងក្រុមជំនាញបរិស្ថានអន្តរជាតិ បានជួបជុំគ្នានៅក្នុងរាជធានីភ្នំពេញ និងបានថ្លែងថា ពិភពលោកកំពុងឆ្លងកាត់សីតុណ្ហភាពដ៏ក្តៅបំផុតមួយ ដែលមិនធ្លាប់ជួបប្រទះ ក្នុងរយៈពេលជាង ១សតវត្សកន្លងមកនេះ ។ ការលើកឡើងសម្តែងក្តីព្រួយបារម្ភនឹងសីតុណ្ហភាពក្តៅនេះ បានធ្វើនៅក្នុងពិធីផ្សព្វផ្សាយក្របខណ្ឌជាតិសម្រាប់ត្រួតពិនិត្យ និងវាយតម្លៃការប្រែប្រួលអាកាសធាតុ ដែលរៀបចំក្នុងសណ្ឋាគារមួយក្នុងរាជធានីភ្នំពេញថ្ងៃទី៧ ខែមេសានេះ ដោយមានការចូលរួមពីមន្ត្រីជំនាញជាតិ និងអន្តរជាតិប្រមាណ ៦០នាក់ ។
អគ្គលេខាធិការក្រុមប្រឹក្សាជាតិអភិវឌ្ឍន៍ដោយចិរភាព ឯកឧត្តម ទិន ពន្លក បានថ្លែងថាពិភពលោក និងកម្ពុជាផងដែរ កំពុងរងគ្រោះទឹកជំនន់ គ្រោះរាំងស្ងួត និងខ្យល់ព្យុះ ដែលជាដើមចមអាចទាក់ទងនឹងការប្រែប្រួលអាកាសធាតុ ។ លោកបានថ្លែងថា របាយការណ៍របស់មជ្ឈមណ្ឌលជាតិសម្រាប់បរិស្ថានសហរដ្ឋអាមេរិក បានឱ្យដឹងថា សម្រាប់ឆ្នាំ២០១៥ និង២០១៦ នេះ គឺជាឆ្នាំក្តៅខ្លាំង ដែលពិភពលោកមិនធ្លាប់មានក្នុងរយៈពេល ១៣៦ឆ្នាំកន្លងមកនេះ ។ នៅក្នុងប្រទេសកម្ពុជានេះវិញ លោកបានថ្លែងថាគ្រោះរាំងស្ងួតនាពេលនេះ បាននឹងកំពុងរំខានដល់ការងារកសិកម្ម សុខភាពមនុស្ស សត្វ និងប៉ះពាល់ដល់ជីវភាពរបស់ប្រជាជន និងការអភិវឌ្ឍន៍សេដ្ឋកិច្ចជាតិ។ លោកបានបន្តថា ក្នុងការចូលរួមដោះស្រាយបញ្ហានេះជាមួយនឹងពិភពលោក កម្ពុជាបានអនុម័តជាផ្លូវការ នូវផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា ២០១៤-២០២៣ និងបានដាក់ជូនលេខាធិការដ្ឋាននៃអង្គការសហប្រជាជាតិ ស្តីពីរបាយការណ៍នៃការចូលរួមរបស់កម្ពុជា ក្នុងការអនុវត្តអនុសញ្ញា នៅមុនកិច្ចប្រជុំបណ្តាភាគីលើកទី២១ នៅទីក្រុងប៉ារីសប្រទេសបារាំង កាលពីចុងឆ្នាំ២០១៥ ថ្មីៗនេះ ។
