យោងច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា និងអនុក្រឹត្យលេខ០៣ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ឯកឧត្តមបណ្ឌិត សោម ពិសិដ្ឋ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកែប នៅថ្ងៃទី២៥ ខែឧសភា ឆ្នាំ២០២៦ បានប្តេជ្ញាចិត្តយ៉ាងមុតមាំ និងសច្ចាធានាជូនសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រួចហើយ ក្នុងការបោសសម្អាត និងលុបបំបាត់ ការឆបោកតាមប្រព័ន្ធបច្ចេកវិទ្យា ឱ្យអស់ពីភូមិសាស្ត្រខេត្ត ដើម្បីលើកកម្ពស់កិត្តិយសខេត្ត និងកិត្តិយសប្រទេសជាតិ។
ឯកឧត្តមអភិបាលខេត្ត ក៏បានប្រាប់ម្ចាស់ទីតាំងជួលស្នាក់នៅទាំងអស់ ក្នុងភូមិសាស្រ្តខេត្តកែបថា៖
*រាល់ការទទួលភ្ញៀវអន្តរជាតិ ដែលគ្មានឯកសារត្រឹមត្រូវ នឹងត្រូវពិន័យជាប្រាក់ចំនួន ៤លានរៀល (១ ០០០ដុល្លារ) ក្នុងម្នាក់ ឬអាចលើសពីនេះទៅតាមស្ថានភាពនៃបទល្មើស។
*ប្រសិនបើរកឃើញថាមានការសហការ ឬបើកទីតាំងឱ្យមានសកម្មភាពការឆបោកតាមប្រព័ន្ធបច្ចេកវិទ្យា ម្ចាស់ទីតាំង នឹងត្រូវទទួលទោសទណ្ឌតាមផ្លូវច្បាប់យ៉ាងធ្ងន់ធ្ងរបន្ថែមទៀត ដោយគ្មានការលើកលែងជាដាច់ខាត។
*ប្រជាពលរដ្ឋ និងម្ចាស់អាជីវកម្មទាំងអស់ កុំពាក់ព័ន្ធ កុំនៅពីក្រោយ កុំអន្តរាគមន៍ក្នុងគ្រប់ទម្រង់នៃបទល្មើស និងសូមរួមគ្នាថែរក្សាខេត្តកែបឱ្យមានសុវត្ថិភាពឌីជីថល គ្មានការឆបោកតាមប្រព័ន្ធបច្ចេកវិទ្យា ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេស និងសេដ្ឋកិច្ចជាតិឱ្យកាន់តែរឹងមាំ។
ឯកឧត្តមអភិបាកខេត្ត ក៏ស្នើឲ្យសហការរាយការណ៍ មកអាជ្ញាធរមានសមត្ថកិច្ច តាមរយៈលេខទូរសព្ទខាងក្រោម៖
* នាយករដ្ឋបាលខេត្ត៖ ០១១ ៧៩៧ ៦៧៩
* ស្នងការនគរបាលខេត្ត៖ ០១៧ ៧០៤ ៤៤៤
* មេបញ្ជាការកងរាជអាវុធហត្ថខេត្ត៖ ០៩៧ ៧៧៧ ៧៧៧១
* អភិបាលក្រុងកែប៖ ០៨៨ ៤៣២ ០០៣៤
* អភិបាលស្រុកដំណាក់ចង្អេីរ៖ ០៩៩ ៥៤៩ ៧៨៩។
នារសៀលថ្ងៃដដែល ឯកឧត្តមបណ្ឌិត សោម ពិសិដ្ឋ អភិបាលខេត្តកែប ក៏បានណែនាំ និងចាត់តាំងឲ្យលោក ប៊ុន យោង អភិបាលរងខេត្ត និងជាប្រធានលេខាធិការដ្ឋានគណៈបញ្ជាការឯកភាពរដ្ឋបាលខេត្ត ដឹកនាំក្រុមការងារពាក់ព័ន្ធ បន្តចុះធ្វើរដ្ឋបាលចំហលើទីតាំងស្នាក់នៅប្រមូលផ្តុំ របស់ជនបរទេស ក្នុងភូមិសាស្ត្រខេត្តកែប ស្របតាមអនុក្រឹត្យលេខ០៣ ចុះថ្ងៃទី៥ ខែមករា ឆ្នាំ២០២៥ របស់រាជរដ្ឋាភិបាលកម្ពុជា៕
