លោកជំទាវ ឃួន ឃុនឌី សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកកំពង់ស្វាយ ខេត្តកំពង់ធំ បានណែនាំដល់គណៈកម្មាធិការគណបក្សឃុំទាំងអស់ ឱ្យយកចិត្តទុកដាក់ពិនិត្យ និងធ្វើបច្ចុប្បន្នភាពស្ថានភាពអត្តសញ្ញាណប័ណ្ណសញ្ជាតិខ្មែរ ដើម្បីធានាឱ្យប្រជាពលរដ្ឋមានលក្ខណៈសម្បត្តិគ្រប់គ្រាន់សម្រាប់ការចុះឈ្មោះបោះឆ្នោត និងការបោះឆ្នោតនាពេលខាងមុខ។
ការណែនាំនេះ ធ្វើឡើងក្នុងកិច្ចប្រជុំបូកសរុបលទ្ធផលការងារគណបក្សស្រុកកំពង់ស្វាយ ប្រចាំខែកក្កដា ឆ្នាំ២០២៦ និងលើកទិសដៅអនុវត្តការងារបន្ត ដែលប្រារព្ធធ្វើនៅថ្ងៃទី១៨ ខែកក្កដា ឆ្នាំ២០២៦ ក្រោមអធិបតីភាពលោកស្រី ឃួន ឃុនឌី។
លោកជំទាវបានណែនាំឱ្យគណៈកម្មាធិការគណបក្សឃុំ ពិនិត្យស្ថានភាពអត្តសញ្ញាណប័ណ្ណរបស់ប្រជាពលរដ្ឋ រួមមានអត្តសញ្ញាណប័ណ្ណផុតសុពលភាព បាត់ ខូចខាត និងប្រជាពលរដ្ឋដែលទើបគ្រប់អាយុបំពេញសិទ្ធិបោះឆ្នោត ដើម្បីជួយសម្របសម្រួលឱ្យពួកគាត់អាចធ្វើអត្តសញ្ញាណប័ណ្ណថ្មី ឬប្តូរអត្តសញ្ញាណប័ណ្ណបានទាន់ពេលវេលា ស្របតាមនីតិវិធី។
ក្នុងឱកាសនោះ លោកជំទាវបានវាយតម្លៃខ្ពស់ចំពោះលទ្ធផលការងារដែលគណៈកម្មាធិការគណបក្សស្រុក និងគណៈកម្មាធិការគណបក្សឃុំសម្រេចបាននាពេលកន្លងមក និងបានជំរុញឱ្យបន្តពង្រឹងការកសាងគណបក្សនៅមូលដ្ឋាន ដោយអនុវត្តការងារប្រកបដោយស្មារតីទទួលខុសត្រូវ សាមគ្គីភាព និងផ្សារភ្ជាប់ទំនាក់ទំនងជិតស្និទ្ធជាមួយប្រជាពលរដ្ឋ។
លោកជំទាវក៏បានគូសបញ្ជាក់ថា ការធ្វើបច្ចុប្បន្នភាពស្ថានភាពអត្តសញ្ញាណប័ណ្ណ គឺជាការងារសំខាន់ដែលគណៈកម្មាធិការគណបក្សគ្រប់ថ្នាក់ ត្រូវសហការជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ដើម្បីសម្រួលដល់ប្រជាពលរដ្ឋក្នុងការធ្វើអត្តសញ្ញាណប័ណ្ណថ្មី ប្តូរអត្តសញ្ញាណប័ណ្ណផុតសុពលភាព ឬខូចខាត ព្រមទាំងជំរុញអ្នកដែលទើបគ្រប់អាយុឱ្យបានចុះឈ្មោះក្នុងបញ្ជីបោះឆ្នោតស្របតាមច្បាប់។
ជាមួយគ្នានេះ លោកជំទាវបានណែនាំឱ្យគណៈកម្មាធិការគណបក្សឃុំ បន្តចុះជាប់មូលដ្ឋាន ស្វែងយល់ពីស្ថានភាពជាក់ស្តែង និងតម្រូវការរបស់ប្រជាពលរដ្ឋ ដោះស្រាយបញ្ហាប្រឈមឱ្យបានទាន់ពេលវេលា ព្រមទាំងពង្រឹងការផ្សព្វផ្សាយគោលនយោបាយរបស់គណបក្សឱ្យកាន់តែទូលំទូលាយ ដើម្បីរួមចំណែកថែរក្សាស្ថិរភាពនយោបាយ សន្តិសុខ សណ្តាប់ធ្នាប់សង្គម និងជំរុញការអភិវឌ្ឍនៅតាមមូលដ្ឋានឱ្យកាន់តែមានប្រសិទ្ធភាព៕
