ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំក្រុមការងារចុះមូលដ្ឋានក្រុងសិរីសោភ័ណ នាំយកអំណោយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផ្តល់ជូនបងប្អូនប្រជាពលរដ្ឋមានជីវភាពខ្វះខាតចំនួន ៤៣២គ្រួសារ នៅរសៀលថ្ងៃទី១៩ ខែកក្កដា ឆ្នាំ២០២៦។
ពិធីប្រគល់អំណោយនេះបានធ្វើឡើងនៅក្នុងសង្កាត់ទាំង៧ នៃក្រុងសិរីសោភ័ណ ដោយមានការចូលរួមពីឯកឧត្តម-លោកជំទាវ អ្នកតំណាងមណ្ឌលបន្ទាយមានជ័យ និងមន្ត្រីពាក់ព័ន្ធជាច្រើនរូបទៀត។
ក្នុងឱកាសនោះ ឯកឧត្តម អ៊ុំ រាត្រី បានបញ្ជាក់ថា ប្រមុខរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត ក៏ដូចជាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា តែងតែយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋគ្រប់រូប។ រាជរដ្ឋាភិបាលតែងតែគិតគូរ និងចាត់ក្រុមការងារចុះតាមមូលដ្ឋាន ដើម្បីដោះស្រាយបញ្ហា និងជួយសម្រាលការលំបាករបស់ប្រជាពលរដ្ឋ បានទាន់ពេលវេលា មិនថាក្នុងកាលៈទេសៈណានោះទេ។
អំណោយដែលបានចែកជូនដល់ប្រជាពលរដ្ឋទាំង ៤៣២គ្រួសារ រួមមានអង្ករ ២០គីឡូក្រាម និងមីមួយកេស សម្រាប់មួយគ្រួសារ។ ប្រជាពលរដ្ឋដែលទទួលបានអំណោយទាំងនេះមាននៅក្នុងសង្កាត់កំពង់ស្វាយ ១០២គ្រួសារ, សង្កាត់កោះពង់សត្វ ២០គ្រួសារ, សង្កាត់ម្កាក់ ៨៨គ្រួសារ, សង្កាត់អូរអំបិល ៥០គ្រួសារ, សង្កាត់ភ្នៀត ៥៨គ្រួសារ, សង្កាត់ព្រះពន្លា ៦៤គ្រួសារ និងសង្កាត់ទឹកថ្លា ៥០គ្រួសារ។ ការចែកអំណោយនេះបានឆ្លុះបញ្ចាំងពីការយកចិត្តទុកដាក់ និងការគិតគូររបស់ថ្នាក់ដឹកនាំចំពោះជីវភាពរស់នៅរបស់ប្រជាពលរដ្ឋ ជាពិសេសអ្នកដែលមានជីវភាពខ្វះខាត៕
