រដ្ឋមន្ត្រីពាណិជ្ជកម្មកម្ពុជា ជួបប្រជុំពិភាក្សាការងារជាមួយ រដ្ឋមន្ត្រីពាណិជ្ជកម្ម ឧស្សាហកម្ម និងអាកាសចរណ៍ស៊ីវិលឥណ្ឌា

ជាកិច្ចចាប់ផ្ដើម ឯកឧត្តមរដ្ឋមន្ត្រីកម្ពុជា បានថ្លែងអំណរគុណជូនចំពោះក្រសួងពាណិជ្ជកម្មឥណ្ឌា ដែលបានសហការយ៉ាងជិតស្និតជាមួយនឹងភាគីកម្ពុជា ក្នុងការរៀបចំវេទិកាជំនួបលើកទី៥នេះឡើង ដោយនេះជាលើកដំបូងហើយ ដែលវេទិកានេះត្រូវបានប្រារព្ធធ្វើនៅក្រៅប្រទេសឥណ្ឌា។ ឯកឧត្តម បន្តទៀត ដោយបានស្នើសុំឲ្យមានការពិនិត្យឡើងវិញនូវកិច្ចព្រមព្រៀងពាណិជ្ជកម្មដែលភាគីទាំងពីរ បានចុះហត្ថលេខាតាំងពីឆ្នាំ២០០២ ដើម្បីឲ្យឆ្លុះបញ្ចាំងស្ថានភាពសហប្រតិបត្តិការ និងអភិវឌ្ឍន៍ក្នុងពេលបច្ចុប្បន្ន ព្រមទាំងបង្កើតក្រុមការងាររួមកម្ពុជា-ឥណ្ឌា ដើម្បីពិនិត្យមើលការងារនេះ ក្រោមក្របខណ្ឌនៃកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។

ជាកិច្ចឆ្លើយតប ឯកឧត្តម Suresh Prabhu បានថ្លែងអំណរគុណជូនចំពោះក្រសួងពាណិជ្ជកម្មកម្ពុជា ដែលបានស្វាគមន៍យ៉ាងកក់ក្ដៅ និងរៀបចំយ៉ាងល្អនូវវេទិកានេះ។ ឯកឧត្តម បានវាយតម្លៃខ្ពស់លើការអភិវឌ្ឍន៍របស់ប្រទេសកម្ពុជា ព្រមទាំងកត់សំគាល់ផងដែរថា ប្រទេស CLMV នឹងមានកំណើនរឹតតែលឿនបន្ថែមទៀតនៅថ្ងៃមុខ យោងតាមសក្ដានុពលដែលលោកបានសង្កេតឃើញ។ ជាមួយនឹងសំណើរបស់កម្ពុជា ឯកឧត្តម បានទទួលយកទាំងស្រុង ព្រមទាំងផ្ដល់នូវជំនួយបន្ថែមទៀតដូចជា ជួយផ្សព្វផ្សាយផលិតផលកម្ពុជា តាមរយៈពិព័រណ៍នានានៅប្រទេសឥណ្ឌា សម្របសម្រួល និងជំរុញការវិនិយោគពីឥណ្ឌាមកកម្ពុជា ជាពិសេសក្នុងវិស័យកែច្នៃផលិតផលកសិកម្ម ឧស្សាហកម្ម និងថ្នាំពេទ្យ។ ដើម្បីគាំទ្រលើការជំរុញនេះ ឯកឧត្តម Suresh Prabhu បានឲ្យដឹងថា រដ្ឋាភិបាលបានរៀបចំកញ្ចប់ថវិកាមួយហៅថា Project Development Fund តាមរយៈធនាគារ EXIM Bank របស់ឥណ្ឌា ដើម្បីផ្ដល់ជាប្រាក់កម្ចីដល់ក្រុមហ៊ុនឥណ្ឌា ដែលមានបំណងមកវិនិយោគនៅប្រទេស CLMV។ ក្រៅពីនេះទៀត ក្រសួងពាណិជ្ជកម្មឥណ្ឌាក៏បានសន្យាថានឹងជួយគាំទ្រដល់ការអភិវឌ្ឍន៍ធនធានមនុស្សផងដែរ។

មុននឹងបញ្ចប់ភាគីទាំងពីរក៏បានព្រមព្រៀងពិនិត្យលទ្ធភាពលើការផ្ដួចផ្ដើម ឲ្យមានការចុះអនុស្សរណៈយោគយល់គ្នាមួយរវាង សភាពាណិជ្ជកម្មកម្ពុជា និងសហព័ន្ធឧស្សាហកម្មឥណ្ឌា ដើម្បីសម្របសម្រួលវិស័យឯកជននៃប្រទេសទាំងពីរ ឲ្យចាប់ជាដៃគូសហការជាមួយគ្នានាពេលអនាគត។