សម្តេចក្រឡាហោម ស ខេង បានថ្លែងបញ្ជាក់ថា ក្រសួងមហាផ្ទៃបានរកឃើញមានភាពមិនប្រក្រតីមួយ ពាក់ព័ន្ធជាមួយមន្ត្រីនគរបាល និងសមត្ថកិច្ចជំនាញពាក់ព័ន្ធមួយចំនួន ដែលបានចេញអត្តសញ្ញាណប័ណ្ណសញ្ជាតិខ្មែរ និងផ្តល់សញ្ជាតិខ្មែរឲ្យទៅជនបរទេស ។
សម្តេចក្រឡាហោម ស ខេង បានមានប្រសាសន៍ថា មន្ត្រីទាំងនោះ នឹងជៀសមិនផុតពីការពិន័យយ៉ាងធ្ងន់ធ្ងរ ហើយនឹងឈានទៅអនុវត្តច្បាប់ថែមទៀត ។ ការថ្លែងបញ្ជាក់របស់សម្តេចក្រឡាហោម បានធ្វើឡើងនៅក្នុងពិធីផ្ទេរតំណែងអភិបាលខេត្តស្ទឹងត្រែង កាលពីព្រឹកនៅថ្ងៃទី២៩ ខែធ្នូ ឆ្នាំ ២០១៥ ។
សម្តេចក្រឡាហោម ស ខេង បានមានប្រសាសន៍បញ្ជាក់ថា ការផ្តល់សញ្ជាតិ មិនអាចមានអ្នកណាអាចធ្វើបានឡើយ ក្រៅពីព្រះមហាក្សត្រ ។ សម្តេចបានបញ្ជាក់រឿងទាំងនេះ ដែលមានចំនួន ៣រឿង ទៅអគ្គស្នងការនគរបាលជាតិ… អគ្គនាយកដ្ឋានអត្តសញ្ញាណកម្ម… អគ្គនាយកដ្ឋានអន្តោប្រវេសន៍ និងអគ្គនាយកដ្ឋានរដ្ឋបាលនៃក្រសួងមហាផ្ទៃ ដើម្បីពិនិត្យនិងអនុវត្តច្បាប់យ៉ាងម៉ឺងម៉ាត់ ។
មិនមានសេចក្តីរាយការណ៍បញ្ជាក់ថាតើនគរបាលចំនួនប៉ុន្មាននាក់ ដែលស្ថិតក្នុងអំពើមិនប្រក្រតីទាំងនោះឡើយ ។
