ឯកឧត្តម​ នាយឧត្តមសេនីយ៍​ កែ គឹមយ៉ាន​ ប្រាប់ប្រជាពលរដ្ឋ​ចំនួនជាង៤១០០នាក់ឲ្យទៅបោះឆ្នោតជូនបំពេញកាតព្វកិច្ចជាពលរដ្ឋល្អ​ ដើម្បីបន្តសន្តិភាព​ និងសម្បូររុងរឿង


បន្ទាយមានជ័យ ៖ ថ្ងៃច័ន្ទ១១កើត ខែទុតិយាសាឍ ឆ្នាំច សំរឹទ្ធិស័ក ពស.២៥៦២ត្រូវនឹងថ្ងៃទី២៣​ ខែកក្កដា ឆ្នាំ២០១៨​ ​ឯកឧត្តម​ នាយឧត្តមសេនីយ៍​ កែ គឹមយ៉ាន ឧបនាយករដ្ឋមន្រ្តី​ អ្នកតំណាងរាស្រ្ត​ ប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ​និងលោកជំទាវ​ ម៉ៅ​ ម៉ាល័យ​ អមដំណើរដោយក្រុមការងារថ្នាក់ជាតិ​ ខេត្ត​ ក្រុង​ ស្រុក​ និងមូលដ្ឋាន អញ្ជើញជាអធិបតីក្នុងពីធីសម្ភោធដាក់ឲ្យប្រើប្រាស់ជាផ្លូវការនូវផ្លូវខេត្តលេខ២៥៦៣ប្រវែង២២.៣គីឡូម៉ែត្រភ្ជាប់ពីថ្មពួក​ ផ្លូវជាតិលេខ៥៦​ ទៅដល់បឹងត្រកួនផ្លូវជាតិលេខ៥៨​ ស្រុកថ្មពួក​ ខេត្តបន្ទាយមានជ័យ​ ក្រោមហិរញ្ញប្បទានពីធនាគារអភិវឌ្ឍអាស៊ី​ (ADB)និងបន្តជួបសំណេះសំណាលជាមួយសមាជិក​ សមាជិកា​ ប្រជាពលរដ្ឋ​ ស្រុកថ្មពួក ខេត្តបន្ទាយមានជ័យ​ ដែលមានអ្នកចូលរួមជាង៤១០០នាក់។

ក្នុងឱកាសនោះ​ ឯកឧត្តម នាយឧត្តមសេនីយ៍​ កែ​ គឹមយ៉ាន​ បានមានមតិសំណេះសំណាលនិងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិមាន​សម្ដេចអគ្គមហាសេនាបតីតេជោ ហ៊ុន សែន​ នាយករដ្ឋមន្រ្តី សម្ដេចអគ្គមហាពញាចក្រីហេង សំរិន ប្រធានរដ្ឋសភា​ ។

ក្នុងឱកាសនោះដែរ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានបន្ថែមថា​ :​ កម្ពុជាដឹកនាំដោយសម្តេចតេជោហ៊ុនសែន​ប្រទេសជាតិមានការរីកចម្រើន​លើគ្រប់វិស័យ​ ​ប្រែក្លាយតំបន់វាយប្រយុទ្ធគ្នាទៅជាតំបន់អភិវឌ្ឍរីកចម្រើន ប្រជាពលរដ្ឋនៅរស់សុខសាន្តសម្បូរសប្បាយជាមួយនឹងសន្តិភាព​ សន្តិសុខពេញផ្ទៃប្រទេស​ មានផ្លូវគមនាគមន៍កាន់តែសម្បូរខ្វាត់ខ្វែងពាសពេញនិងជុំវិញប្រទេសដែលប្រជាពលរដ្ឋអាចធ្វើដំណើរបានយ៉ាងស្រួលចំណេញពេលវេលាទាំងការដឹកជញ្ជូន​កសិផល និងដំណើរកំសាន្ត​ជាមួយក្រុមគ្រួសារហើយសមិទ្ធិផលផ្លូវថ្នល់​ស្អាត​ ងាយស្រួលធ្វើដំណើរ​យ៉ាងសប្បាយរីករាយនេះ​ អាចកើតមានតែក្នុងប្រទេសមានសន្តិភាពទេ​ គឺមិនអាចកើតមានក្នុងសង្រ្គាមវាយប្រយុទ្ធបង្ហូរឈាមគ្នាព្រឹកល្ងាចនោះឡើយ។

ជាមួយគ្នានេះ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានថ្លែងអំណរគុណនិងដឹងគុណដល់ប្រជាពលរដ្ឋទាំងអស់នៃគ្រូសារអ្នកស្រុកថ្មពួកដែលបានចូលរួមថែរក្សាគាំទ្រសន្តិភាព​ជាមួយរាជរដ្ឋាភិបាល​ដឹកនាំដោយសម្តេចតេជោហ៊ុន​ សែន​ ហើយសូមបងប្អូនប្រជាពលរដ្ឋទាំងអស់ចូលរួមបំពេញកាតព្វកិច្ចជាពលរដ្ឋល្អអញ្ជើញទៅបោះឆ្នោតថ្ងៃទី២៩​ ខែកកក្កដា​ ឆ្នាំ២០១៨​ ជ្រើសយកគណបក្សណាដែលបងប្អូនពេញចិត្តដើម្បីការរីកចម្រើនក្នុងមូលដ្ឋានរបស់បងប្អូនជាបន្តទៀត​ ។